- Тарих толқынында
- 23 Желтоқсан, 2013
Мемлекеттік және қоғамдық басқару саласының түйткілді мәселелері
Мырзагелді КЕМЕЛ,
экономика ғылымдарының докторы, профессор
Біздің еліміздегі жоғарғы оқу орындарындағы мемлекеттік басқару саласына мамандар дайындау қандай күйде екеніне назар салып қарасақ, Қазақстан Республикасы Президентiнiң жанындағы Мемлекеттiк басқару академиясының магистратурасында соңғы он-он екі жылдың көлемінде 900-дей мемлекеттік басқару магистрі даярланыпты. Ал, елдегі тек мемлекеттік қызметшілердің саны бұдан жүз есе көп екенін еске алсақ, онда арнайы дайындалған маманданған кадрлар саны теңіздегі тамшыдай ғана екені түсінікті. Бакалаврлар даярлау ісін алып қарасақ, деректерге қарағанда біздегі 59 жоғарғы оқу орнында «мемлекеттік басқару» мамандығы бойынша жоғарғы білімді мамандар дайындалады екен. Сол мамандардың қалай оқытылып жатқанын Астана және Алматы қалаларында орналасқан іргелі оқу орындарында бақылап көргенде, оқыту үдерісіндегі жағдай көңіл көншітерліктей емес екеніне көз жеткіздім. Олардың барлығына қатысты мынадай бірыңғай кемшіліктер байқалады:
– Білім және ғылым министрлігіне қарасты бір де бір жоғарғы оқу орындарында мемлекеттік басқару мамандығы бойынша кадр даярлайтын (бакалавр және магистр) арнайы факультеттер мен кафедралар жоқ, олар негізінен «Экономика» немесе «Менеджмент» кафедраларына бекітілген.
– Осы мамандыққа байланысты оқу жоспары сонау кездегі «Нархоз» аталатын, қазіргі Экономика университетінің тәуелсіздіктің бастапқы кезеңіндегі жоспарының көшірмесі секілді көрінеді. Тек бірен-саран ғана өзгешеліктер қосылған, мысалы «социалистік жарыс» деген сөздер «бәсекеге қабілеттілік» деген сөздермен алмастырылып, «сыбайлас жемқорлыққа қарсы күрес» сынды жаңа тараулар қосылған да қойған. Бұл жоспарды Білім және ғылым министрлігі бекітті деудің өзі ұят.
– Дипломдарында жазылатын мамандығы «мемлекеттік басқару» бола тұра, студенттердің алып жатқан дәрістерінің 90 пайызы экономика тақырыбына арналған. Ал, ғылыми тұрғыдан алғанда мемлекеттік басқару саяси, экономикалық, әлеуметтік, құқықтық, психологиялық, этикалық және де басқа аспектілерді қамтиды. Сәйкесінше мемлекеттік басқару: философия (мемлекеттің, қоғамның саяси құрылымындағы мәні, рөлі мен орны), саясаттану (мемлекеттің мәні мен қызметі билік ету категориясы арқылы көрінеді), әлеуметтану (мемлекет – әлеуметтік институт ретінде), экономика (өндірісті басқару), тарих (даму жолы), құқық (рұқсат етілген әрекеттер шекарасы), психология (адамның санасы, мінез-құлқы) сияқты түрлі ғылымдар мен ғылыми пәндерді зерттейді, бұл салаға маманданғысы келген әрбір студент осы салалардың бәрінен азды-көпті жүйелі білім алып шығуы тиіс.
– «Мемлекеттік басқару» мамандығын алып шығатын болашақ бакалаврлар мен магистрлердің диплом қорғардағы диссертациялық тақырыптарында мемлекеттік басқару саласына қатысты негізгі мәселелердің өзі жоқ, бірді-екілі тақырыптар болмаса, қалғандары таза экономикалық тақырыптар. Олардың мазмұнында мемлекеттік басқаруға қатысты зерттеулер мен тұжырымдар жоқ. Мәселен, диплом қорғау тақырыбына мемлекеттік басқаруға да, экономиканы дамытуға да қатысты мынадай келелі мәселелердің кейбірін қарастыруға болар еді: Қазақстан Республикасындағы қазіргі мемлекеттік басқару: стратегиялар, уәждемелер, технологиялар; Мемлекеттік басқаруды модернизациялаудың құқықтық аспектілері; Атқарушы билік органдарының БАҚ-пен өзара іс-қимылы; Мемлекеттік басқару жүйесіндегі билік тармақтарының өзара әрекеттестік тетіктері; Агроөнеркәсіп кешенін мемлекеттік басқару; Халық денсаулығын қорғау саласындағы мемлекеттік басқару; Әлеуметтік-экономикалық сала қызметін мемлекеттік басқару (сала, өңір мысалында); Қазақстан Республикасындағы өңірлік басқару; Әкімдік институты мемлекеттік басқару жүйесінде: даму бағыттары және болашағы; Мәслихаттардың әлеуметтік-экономикалық мәселелерді шешудегі рөлі (нақты өңір мысалында).
– Мемлекеттік басқарудың теориясына, мемлекеттік қызметті жетілдіруге, мемлекеттік басқару саласына кадр даярлауға т.с.с. бағыттарға оқулықтар мен оқу құралдарын әзірлеу де жүйесіз күйде. Әркім қолына түскен оқулықтарды пайдаланады, олардың барлығы дерлік (В.Н.Уваровтың «Теория государственного управления» деген оқулығынан басқасы) Ресей ғалымдарының еңбектері. Біздегі мемлекеттік басқарудың Ресейдікімен салыстырғандағы ерекшеліктері ескерілмей қалады. Өзімізде мемлекеттік басқару ғылымымен айналысатын ғалымдар жоқ десе де болады, өйткені, оларды бағыттап, ынталандырып отыратын ешбір мекеме жоқ.
Осылардың салдарынан келіп шығатын қорытынды – біздегі оқу орындарында мемлекеттік басқаруға кадр дайындауда білікті ұстаздар өте тапшы. Ал, ұстаздың тапшылығы болған жерде олардың орнын өмірге бейімделіп алған, қай салаға болса да сабақ бере кетуге құлшына кірісетін «икемділер» басады, сөйтіп таңдаған саласына қатысты мамандық ала алмайтын, дипломы бар, білімі жоқ адамдарды молайтамыз.
Бір ғана пәнді, «Мемлекеттік басқарудың теориясы мен тәжірибесі» пәнін алсақ, оны оқыту тыңдаушылардың мемлекеттік басқару саласында, мемлекеттік аппаратта кәсіби қызмет атқару үшін қажетті білік пен машық алу жолында толыққанды жүйелі білім алуын қамтамасыз етуге бағытталған. Сонымен бірге, мемлекеттік басқарудың қазіргі заманғы кадрларын даярлау үшін мәдениет пен қызметтік этиканың жоғарғы деңгейі, экономикалық ой-өріс пен қажетті құқықтық дайындық, мемлекеттік қызмет тәжірибесіне ғылыми талдау жасай білу тәжірибесін енгізу талап етіледі.
Пәнді оқытудың негізгі мақсаттарының бірі – басқару мәселесінде ғылыми-тәжірибелік ыңғай қалыптастыру. Яғни, оқу барысында тек ғылыми тұрғыдан ғана білімге ие болмай, алған білімін өмірде пайдалануға да жетісу. Мемлекеттік басқарудың теориясы мен тәжірибесі пәні ғылыми пән ретінде нақты басқару мәселелерін шешуде тәжірибелік дағды қалыптастыру тәсілдерін де қоса қарастырады. Осы талаптар тұрғысынан білім ала алған шәкірт ертең өзі де дәріс беру дәрежесіне жетер еді.
Біздің оқу орындарында «Мемлекеттік басқарудың теориясы», «Жергілікті мемлекеттік басқару және өзін-өзі басқару» мен «Мемлекеттік органдардағы персоналды басқару» пәндерінен басқа: «Мемлекеттік басқаруды құқықтық реттеу», «Мемлекеттік қызметті жетілдіру», «Мемлекеттік қызметті ақпараттық қамтамасыз ету», «Мемлекеттік қызметтер көрсетудің сапасын басқару», «Мемлекеттік қызметтің этикасы және оң имиджі», «Басқару психологиясы» сынды үлкенді-кішілі пәндер оқытылмайды, оқытылған күнде сапасыз. Осыларды ойлағанда, біз мамандануға мүмкіндік ала алмай отырған студенттердің алдында (олардың біразы жылына 600 мың теңгеге жуық ақша төлейді) ұяттымыз дегім келеді. Бұл – күрт жөндеуді талап ететін іс.
Өзім тек мемлекеттік қызмет саласында ғана 40 жыл еңбек етіп, зейнетке шыққанмын. Мемлекеттік басқару саласында теориялық білімім де, тәжірибем де жетерлік. Кезінде өзіміздің мемлекеттік қызметке қалай бейімделгенімізді еске алсақ, бала күнімізден пионер, комсомолдың, соңыра сол кездегі Коммунистік партияның тәрбиесінен өттік. Ол кездің тәрбиесі – көнбістікке, басшыға көзсіз бағынуға негізделген болатын. Нарыққа көшкелі ақша культке айналды. Бірақ, болашақтағы культ – білім мен адал еңбек болады деп үміттенеміз. Елбасымыз да осыған бағыттап отыр.
Қоғамда байқалып жүрген, тағы бір айта кетуімізге тиіс мәселе бар: мемлекеттік басқару органдарында мемлекеттік басқару саласына маманданып, жоғары білім алған жас азаматтарды жұмысқа алғысы келмейді, қызметке алуды ұйымдастырушылар «Біз бұл мамандықтан гөрі мекемеміздің саласына қатысты мамандарды алғымыз келеді» деп ашық айтады. Сонда, мекемедегі әкімшілік жұмыстарды атқаратын ұйымдастыру, кадр, жалпы бөлімдерге де экономист не заңгер болғаны дұрыс па, жоқ, мемлекеттік басқару теориясын, мемлекеттік басқаруды модернизациялаудың өзекті тұстарын, персоналды басқарудың қыр-сырын, мемлекеттік басқару жүйесіндегі билік тармақтарының өзара әрекеттестік тетіктерін, мемлекеттік басқару жүйесіндегі мемлекеттік қызмет институтының басымдықтарын, мемлекеттік қызметтегі этикалық нормалардың сақталу ережелерін, мемлекеттік қызметтің оң имиджін қалыптастыру мәселелерін, мекеменің қоғаммен байланысын, мемлекеттік қызметтер берудің сапасы туралы талаптарды білетін дайын маманның ешкімге керек болмағаны ма?!
Айта берсе, мәселе көп.
Істің оңалуы үшін біз ең алдымен мемлекеттік басқару саласына оқытушылар және оқытуға қажетті оқулықтар әзірлеуді қолға алуымыз керек. Ол үшін:
- жоғарғы оқу орындарында мемлекеттік басқару мамандығы бойынша мамандықтарға бөлінетін грант санын көбейтіп, ол мамандықтарды шоғырландырып, Мемлекеттік басқару академиясында және Астана мен Алматыдағы екі ұлттық университетте (Еуразия ҰУ мен ҚазҰУ) және де мемлекеттік басқару саласына қойылатын биік талаптарға сай келетіндігін дәлелдеген іргелі оқу орындарында ғана даярлаған жөн. Олардың саны 5-6 болса жетерлік. Себебі, мемлекеттік басқару саласына кадр даярлауға дайындықтары толық, сапалы білім бере алатын мұғалімдер барлық оқу орындарында бірдей жетіспейді. Онсыз білім сапасы болмайды. Мемлекеттік басқару академиясында да тек магистрлер даярлап қана қоюмен шектелмей, Ресейдің үлгісімен бакалавриат ашу керек;
– жоғарғы оқу орындарында (Мемлекеттік басқару академиясынан басқа) мемлекеттік басқару мамандығы бойынша болашақ осы мамандыққа оқытушылар әзірлеуге септігін тигізетін ғылыми-педагогикалық бағытқа магистрлерді көптеп әзірлеуді қолға алуға тиіспіз, оларды да жоғарыда айтқан оқу орындарында ғана даярлау жөн;
– мемлекеттік басқару мамандығы бойынша болашақта осы мамандыққа оқытушыларды даярлауға бағытталған Phd докторлығын қорғайтын ғылыми кеңес тек Мемлекеттік басқару академиясында ғана бар, ондай кеңестер кадр даярлауға мамандануға ұсынылып отырған екі университетте де болуы тиіс;
– мемлекеттік басқару магистрлерін негізгі жұмысын атқара жүріп оқитын кешкі мерзімде даярлауды тоқтату керек, өйткені жұмыстан шаршап шыққан тыңдаушыларда сабақты ұғынып алу қабілеті төмендейді, олар дәрісті тыңдаушыларға емес, дәріске қатысушыларға айналып кеткен;
– мемлекеттік басқару саласына кадр даярлаудың нақты бір жолы – біздің мемлекеттің ерекшеліктерін, жаңа бағыттарымызды қамтитын, шетелдік тәжірибеге, басқару ғылымына негізделген жаңаша оқулықтар мен оқу құралдарын әзірлеуге мықтап кірісу. Ол үшін Білім және ғылым министрлігінің Ғылым комитетінің немесе Л.Гумилев атындағы Еуразия ұлттық университетінің жанынан мемлекеттік басқаруға қатысты оқулықтар мен әдістемелік және әдіснамалық кітаптар мен нұсқаулықтар әзірлейтін орталық ашып, оларда әзірленген оқулықтардың жазба және электрондық нұсқаларын барлық оқу орындарының кітапханаларына таратқан жөн болар еді.
Осы орайда, тағы бір келелі мәселе жөнінде айтпай кетуге болмас. Біздің еліміздегі қоғамдық басқару саласына кадр даярлау ісін де қолға алғанымыз жөн. Ғылымда «мемлекеттік басқару» «қоғамдық басқарудың» бір түрі деген де тұжырым бар. Бірақ, біздегі қалыптасқан қоғамдық пікір «қоғамдық басқаруға» мемлекеттен тыс тұрған салаларды жатқызады. Мысалы, кәсіподақ, қоғамдық бірлестіктер (Азаматтық альянс, «Атамекен», түрлі әлеуметтік қорғау, экология, дін салаларына қатысты Үкіметтік емес ұйымдар). Бұл салалардың кәсіподақ пен «Атамекеннен» басқалары сырт жақтан біршама уақыт қаржыландырып келгені белгілі. «Атамекен» кәсіпкерлердің қолдауында. Басқа қоғамдық бірлестіктерге елдегі қалыптасқан жағдайға байланысты оларға сырттан қаржы алуға тыйым салынды. Қазір олар біршама байсалды қалыпқа көшті. Кәсіподақ мүшелік жарна мен жарым-жартылай жекеменшікке өтіп кеткен санаторийлер, демалыс үйлері мен қонақүйлерден түскен қаржымен күн көріп келеді. Ал, енді, заман өзгерді, кәсіптік одақтарға қоғамдық ұйымдардың ішіндегі ең мол халық өкілеттілігіне ие болған ұйым ретінде өзгеруге тура келеді. Кәсіптік одақтардың негізгі мақсаты бүгіндегідей ұйымды қалай да сақтап қалу үшін күресуге айналып кетпеуі, олар алдымен қоғамның қалыпты дамуына, мемлекеттілігімізге қызмет етуі тиіс.
Кәсіподақтар түрлі мамандық, кәсіп, біліктілік адамдарының типтік кәсіби мүдделерін білдіретіні ежелден қалыптасқан. Көптеген дамыған мемлекеттердің тәжірибесі көрсеткендей, кәсіподақтар еңбекші мүдделерінің өкілеттілігінде маңызды рөлге ие болады, еңбек қарым-қатынасы саласында олардың құқықтарын қорғайтын тиімді құрал болып саналады. Коллективті келісімдер, ұжымдық келісімдерге отыру, Үкіметпен келісім – кәсіподақтардың өздерінің өкілеттілік қызметтерін атқаруы: жұмысшының жұмыс берушінің алдында әлеуметтік-экономикалық мүддесін, құқықтарын қорғау және сақтау – кәсіптік одақтардың басты мақсаты.
Кәсіптік одақтар мемлекеттік органдармен диалог сипатына ие болып, жеке адамдардың мүдделерін нақты анықталған ортақ талаптарға өзгертіп, мүдделерді артикуляциялауы (мысалы, Үкіметтен әлеуметтік төлемақы көлемін жоғарылатуды, жалақыны көтеруді, еңбекті қорғау мақсатында салық саясатын өзгертуді сұрауы) тиіс. Ол үшін кәсіподақтардың орталық және облыстық өкілдіктері, салалық органдарының басшылығы ортақ мүдделілік таныта, белсене қызмет атқаруы тиіс. Қазірше кәсіподақ органдарында ондай бірлік көрінбейді, ортақ көрпені әрқайсысы өзіне тартуы басым. Мұның себебі, кәсіподақ органдарының басшылығында сабақтастық қалыптаспаған, яғни басшылықтың жаңа кадрлармен толықтырылуында сабақтастықтан гөрі монополистік басым. Салалық кәсіподақ басшыларының алды сексен жасты жағалаған болса, ең жастарының өздері алпысты алқымдағандар және ол орында ұзақ отырып, бауыр басып, өзгеруге ықылассыз болып қалғандар. Орталық және жергілікті жұмыспен қамту бағдарламалары шаруашылық қажеттіліктерін дамыту үшін әр деңгейдегі кәсіподақ басшылығы тиісті кадрлар дайындығына бейімделу керек, жұмыс күші нарығының қажетті инфрақұрылымының қалыптасуын қамтамасыз ету, кәсіпкерлердің әр аймақта жұмыссыздық проблемасын шешу үшін бірігуді ұйымдастыруы тиіс. Сондықтан, біз кәсіподақтарда митингішіл әпербақан басшылар болуын қолдай түсу емес, білім-білікті, жаңа заман ағымын түсінетін, істі жаңаша ұйымдастыруға қабілетті кадрлар даярлау ісін қолға алуымыз керек.
Кадр даярлау ісіне еркін түрде ұйымдасқан топтар мүддесін қорғай алатындар келуі және олар белгілі бір теориялық дайындықтан өтуі тиіс. Кәсіподақ басшысының мақсаты белгілі шешімді қолдау немесе оны болдырмау мақсатында мемлекеттік органдарға ықпал ету болғанымен, ұраншылдықтан ада болуы, алдымен мемлекеттік мүддені қорғауы, яғни мемлекетшілдік мінезіне ие болуы шарт. Кәсіподақтардың корпоративизмі латентті сипатқа ие болғаны дұрыс. Осы мақсаттарды орындау үшін елдегі жоғарғы оқу орындарында мемлекеттік басқару саласына сапалы кадрлар даярлауда кәсіподақтарға да білікті мамандар дайындауды қолға алған жөн. Бұл салаға дайындалмақ мамандарды кәсіподақ ұйымдары өз есептерінен оқытуды да үйлестірсе артық болмайды.
Осы жылғы сәуір-мамыр айларында өткен «А» және «Б» корпустарының бос мемлекеттік әкімшілік лауазымдарына орналасуға үміткерлердің білімдеріне және қабілеттеріне тестілеу өткізудің нәтижесі бәрімізге белгілі, онда барлық үміткерлердің 37 пайызы лайықты жауап бере алмай, өтпей қалды. Бұл мемлекеттік органдардағы қызметтегілер мен осы қызметке тұруға талаптанушылардың білім сапасы, әсіресе, еліміздің заңнамасын білуі төмен екенін көрсетті. Егер, жаңадан ауыл әкімдерінің білімдері тексерістен өтер болса, онда жоғарыда өтпей қалғандардың пайызы екі еселенуі мүмкін. Сол үшін жоғарыда аталған орталықтарда бір айлық және екі апталық оқу курстарын ұйымдастыруға, оларды тек Астанада ғана емес, облыстар мен ірі қалалар мен аудандардың өздерінде де теориялық және заңнамалық тұрғыдан оқытып алуды ұйымдастыруға болар еді.
Істі осылайша ұйымдастырмасақ, «Мемлекеттік қызметшілердің ар-намыс кодексінде» айтылатын мемлекеттік қызметшілердің білімсіздігі, соның нәтижесінде пайда болатын іске ықылассыздық, заңды білмегендіктен мойындамау, төрешiлдiк және сөзбұйдаға салу көрiнiстерiне жол беретін мамандар легі жалғаса түсері хақ. Тек өрелі білім мен биік мәдениетке негізделген мемлекеттік қызметшілер тобын әр мемлекеттік органда қалыптастыра алғанымызда ғана кодекстің 18-тармағындағы «кәсiби дайындықтың, оның iшiнде орындалуы бағынысты қызметкерлердiң функционалдық мiндеттерiне жатқызылған мәселелер бойынша, қажеттi деңгейiне ие болуға» тиістілік талабы орындалар еді.
«Қазақстан Республикасы Президентi бекіткен «Қазақстан Республикасы мемлекеттiк қызметi жаңа моделiнiң тұжырымдамасына сәйкес мемлекеттік қызметшілердің «А» корпусының лауазымына тағайындалған мемлекеттiк қызметшiлер үшiн лауазымдық мiндеттерiн тiкелей орындауға кiрiсу алдында менеджмент, стратегиялық жоспарлау, тиiмдi басқару шешiмдерiн қабылдау саласында бiлiм алуға бағытталған қысқа мерзiмдi оқытудан өту мүмкiндiгi жоспарланып отыр. Оқытуды ұлттық басқару элитасын даярлауды қамтамасыз етуге арналған Ұлттық мемлекеттiк саясат мектебi жүзеге асыратын болып белгіленген. Бұл – өте құптарлық іс.
Осы тұжырымдамада тағы да: «А» басқарушылық корпусының қызметшiлерi және оның кадр резервiне қосылған қызметшiлер үшiн кәсiби және жеке құзыреттерiн бағалау негiзiнде белгiлi бiр күнтiзбелiк кезеңге арналған кәсiби дамыту мен оқытудың дара жоспарлары жасалады. Дара жоспар оқытудың мазмұндық бөлiгiнде де оқу орнын таңдау да мемлекеттiк қызметшiлердiң кәсiби қажеттiктерi ескеріледі» делінген. Бұл – өте тамаша идея. Мәселен, «экономика», «менеджмент», «қаржы», «заңгерлік» секілді мамандық иелері сол мамандықтарды дұрыс оқытуға өз жобаларын ұсынып, жеңіп шыққанда оқу орындарында білімдерін шәкірттерге жеткізуге мүмкіндік туар еді.
«Қазақстан Республикасы Президентi бекіткен «Қазақстан Республикасы мемлекеттiк қызметi жаңа моделiнiң тұжырымдамасында: «жоғары бiлiктi мемлекеттiк қызметшiлердi даярлау жөнiндегi базалық бiлiм беру орталығын қалыптастыру» және «нәтижеге бағдарланған мемлекеттiк басқару жүйесiнiң технологиялары мен қағидаттарына негiзделген жаңартылған оқыту бағдарламаларын енгiзу» нақтыланған.
Тұжырымдаманың «Мемлекеттік қызметшілерді оқыту» бөлімінде:
«Мемлекеттiк қызметшiлердi даярлау, қайта даярлау және олардың бiлiктiлiгiн арттыру бағдарламаларының мазмұндық бөлiгiн сапалық тұрғыдан жаңғырту, оның iшiнде қазiргi заманғы бiлiм беру технологияларының және нәтижеге бағдарланған мемлекеттiк басқару жүйесi қағидаттарының негiзiнде оқыту бағдарламаларын жаңарту маңызды шара болмақ. Мемлекеттiк әкiмшiлiк қызметшiлердiң басқарушылық және атқарушылық корпустарға бөлiнуi ескерiле отырып, оларды оқыту үдерістерiн құруға қойылатын саралау тәсiлдерi көзделетiн болады» деп атап көрсетілген.
Бұл тұжырымдар біздердің ұсыныстарымызға дөп келіп тұр.
Қазақстан Республикасы Конституциясының 30 бабында: «Мемлекет білім берудің жалпыға міндетті стандарттарын белгілейді. Кез келген оқу орнының қызметі осы стандарттарға сай келуі керек» деген талап негізінде мемлекеттік басқару саласына кадрлар даярлауды, ол үшін алдымен сол кадрларды сапалы даярлаушы ұстаздарды даярлауды жедел түрде жаңғырту қажет деп санаймыз.
478 рет
көрсетілді0
пікір