- Заманхат
- 06 Қаңтар, 2014
ҚОҒАМ – БІРТҰТАС ОРГАНИЗМ, ОНЫ СЫРТТАН БАСҚАРУ МҮМКІН ЕМЕС
Амангелді Айталы,
философия ғылымдарының
докторы, Қ.Жұбанов атындағы Ақтөбе өңірлік мемлекеттік университетінің профессоры
Дін - өмірдің айнасы
Бүгінгі қоғамдық ғылымдар, соның ішінде дін социологиясы, дін психологиясы, дін тарихы, дін философиясы мен теология, дін географиясы тағы да басқа ғылыми салаларда дінге алуан түрлі анықтама беріледі, себебі, дін өте күрделі, көпастарлы құбылыс. Бір ақиқат анық: адамзат өмір, өлім, уақыт, табиғат, жақсылық пен жамандық туралы әрқашанда ойланған. Әлемнің жаратылысын, тепе-теңдігін, үйлесімін тамашалаған пенде осы жұмбақтың шешілуін діннен іздеген, дінге мұқтаж болған.
Дін – қоғамның айнасы. Ол бұқаралық деңгейде діни сана, наным-сенімнен көрініс алады. Екінші жағынан, дін діни институттардың, нақтылап айтсақ, діни бірлестіктердің қызметінен, беделінен, діни әдебиет, діни насихаттан, мемлекеттік органдардың дінмен қарым-қатынасынан, өзара сыйластығы, болмаса, біржақты үстемдігінен байқалады. Назар салып зерделесек, діни ахуалдың күрделілігін, өмірдің сан қилы астарларымен байланыстарын көреміз. Діни ахуалды діни бірлестіктерінің қызметімен, болмаса, дінді реттейтін мемлекеттік органдардың іс-әрекеттерімен байланыстыру келтелеу пайымдау болар еді. Сол себепті, діни ахуалға экономикалық, нарықтық қатынастардың дамуы, елдің бай мен жарлыға жіктелуі, діні басқа адамдардың ұлттық экономикадағы ролінің өсуі, шаруашылықтың тұтқаларының шетелдіктердің қолында болуы зор әсер етеді. Сонымен бірге, еркіндік адамдарды жаңа іс-әрекеттерге, әртүрлі ағымдарды таңдауына мүмкіндік туғызады, итермелейді. Әлі де ысылмаған, оңын-солын танымағандар жетекке ере берді. Діни ахуалға ұлттық факторлардың тікелей ықпалы барлығы белгілі. Қазақстанда қазақ тілінің мемлекеттік тіл ретінде әлсіздігі, Ресей телеарналарының үстемдігі, теледидардағы ислам дәстүріне жат зорлық-зомбылықтың, порнографияның кең тарауы бөтен тілдің, мәдениеттің өктемдігі ғана емес, бөтен діннің де мұсылмандарға шабуылы деп қабылданатыны анық.
Діни ахуалға мемлекетаралық, халықаралық қатынастар да ықпал ететіні сөзсіз. Әлемдегі, әсіресе, Батыстағы ислам дініне, мұсылмандарға деген қарсылықтан бөліп қарау мүмкін емес. Мысалы, Палестина мәселесі барлық мұсылмандар үшін маңызды мәселе.
2009 жылғы халық санағы бойынша, Қазақстан халқының 70,2%-ы мұсылмандар, 26,3%-ы христиандар, 0,1%-ы буддистер, 2,8%-ы ешқандай дінге сенбейтіндер, 0,5%-ы жауап беруден бас тартқан. Әдетте түркі тілдес халықтарды мұсылман дініне ойланбай жатқызады. Бірақ, халық санағы көрсеткендей, қазақтардың 0,4%-ы (39,172) адам христиан дініне, 1 923-і иудаизмге, 749-ы-буддизмге , 1 612 адам басқа діндерге өткен. 98 511 қазақ ешқандай дінде жоқ. 26 085 адам жауап бермеген. Сонымен бірге, өзбектердің де 0,4%-ы, ұйғырлардың – 0,5%-ы, татарлардың – 10,2%-ы, түріктердің - 0,3%-ы, әзербайжандардың – 2,5%-ы, қырғыздардың - 0,9%-ы христиандар екен. Сондай-ақ, орыстардың – 1,4%-ы, украиндардың – 0,9%-ы, немістердің – 1,6%-ы, корейлердің – 5,2%-ы, белорустардың – 0,8%-ы, поляктардың – 0,7%-ы, басқа ұсақ этностық топтардың 34,7%-ы исламды қабылдаған. Қазақстандықтардың дін таңдауында, сөз жоқ, аралас некенің де ықпалы бар. Тағы бір назар аударарлық мәселе: украиндықтардың – 7,3%-ы, немістердің – 14%-ы, корейлердің – 28,5%-ы, белорустардың – 7,8%-ы ешқандай дінде жоқ.
Әртүрлі этностар дін ілімін терең білмегенмен, «қазақ болғандықтан мұсылманбыз», «орыс болғандықтан православпыз» дегендей өздерін белгілі бір дінге, конфессияға жатқызады, сондай-ақ, дінге сенбейтіндер де бар. «Дүние – шыр айналған бір дөңгелек» дегендей, өзгермелі, құбылмалы заманда бірқатарымыз дүрмекке еріп, әртүрлі топтың жетегінде де кетіп жатырмыз. Қазақстандағы ислам дінін біркелкі, біртекті, бірыңғай және бір мазмұнда, мәнде, мағынада деу әртүрлі себептерге байланысты айту қиын. Қазақ елінде исламның бай тарихи дәстүрі болғанымен, постсоветтік бүгінгі кездегі үрдістер сөз жоқ ерекше ахуал туғызып отыр.
Бүгін Қазақстандағы исламды тек діннің өзінің ішінен емес, әлеуметтік, мәдени ортамен астарласып жатқанын ескеру жөн. Дін бүгінгі қоғамда адамдардың іс-қимылын, әдебін, тәртібін, адамгершілік келбетін айқындайтын, реттейтін құбылысқа айналып барады. Дін, сондай-ақ, нарық жағдайында «тауарға» да айналды: өлім-жітім атқару басқа да салт-жоралар атқару ақылы қызмет түріне де айналды.
Ислам ең бастысы , байырғы бабалар наным-сенімінің , ұлт болып ұюымыздың негізі болды. Дін адамдардың рухани тірегіне, бағыт-бағдарына айналды. Ислам елдерінің экономикалық дамуына («халял индустриясына»), қаржы саласына ықпал етіп бизнеске, кәсіпкерлікке өз ықпалын тигізуде. Отбасын құрғандар жастар да азаматтық құндылықтардан гөрі мешітте неке қидырады. Киім киюлерінде жаңа көріністер бар. Жаңа жас мұсылман қыздар мен жігіттер өз қадірлерін біледі, өздерінің «нағыз» ислам екеніне сенімді, шет елде алған білімдері дүниетанымының, мінезінің ішкі негізіне айналған.
Конфессияшілік қайшылықтар
Бірақ ислам дінінің «оралуы» тек Қазақстан емес, бүкіл постсоветтік кеңістікте өте күрделі болып отыр. Екінші жағынан, ел арасында «Қандай исламға ораламыз?» – деген сауал туды. Сондықтан, ғылыми әдебиетте 1980 жылдардың аяғы мен 1990 жылдардың аяғы исламның «қайта жаңару», 70 жылдық атеизм үстемдігінен кейін тарихи дәстүрлерді жаңарту кезеңі деп те аталынады. Бірақ, ХХІ ғасырдың басында «Қайта жаңарған ислам» революцияға дейінгі канондардан ерекше болатындығына белгілі бола бастады. «Исламдық жаһандану» ұғымы өмірге келді. Түркі рухани кеңістігінің бұрынғы кеңестік аймақтарына исламның арабтық версиясы, қағидалары, шариғат үкімдері ене түсті. Шығыс ислам рухани ұстаздары мен уағыздаушылары, шет елдерде білім алған жас имамдар, молдалар, бабалар дәстүрлерін қайта қарап, нағыз, шынайы дін үлгісін сырттан іздеді. Исламның арабтық моделін ғана неофиттер, жаңа бағытты уағыздаушылар, діни ақиқат деп таныды. Сонымен, конфессияшілік қайшылық бүгін алға шықты.
Бұл жерде Қазақстан, басқа да Орта Азия мемлекеттеріндегі ислам дін өкілдерінің кеңес заманында әлсіз, көп жағдайда биліктің сойылын соққанын жасыра алмаспыз. Польша католиктері, мысалы, сталинизмге, Кеңес Одағының өктемдік саясатына, неміс фашизміне қолына қару алып күресті осылай, ұлттың абыройына ие болды. Бүгін де католиктер Польшада зор беделге ие. Біздегі жаңа исламды уағыздаушылар, сондықтан кеңестік ислам отарлау саясатына қызмет жасады, атеистік саясаттың қысымымен ислам өзгерді, табиғатынан алыстады, күшпен орыстандырылды, делінеді. Кеңес заманында білім алған молдалар мен имамдар, болмаса білімі таяз, кейін дінге келгендер, сол бұрмалаған исламның насихаттаушылары, бақылауда болғандар деп шет елде оқыған жас исламдар олардан бөлініп бойларын аулақ ұстайды. Олардың өздерінің өз қауымдастықтары, әлеуметтік ортасы, мәжілістері, жиындары болуы да осыдан. Сонымен бірге, жас имамдар шет елдердегі мұсылмандардың күнделікті өмірімен біздің қоғамды салыстырып, бағалап, маскүнемдік, нашақорлық, жезөкшелік, жемқорлық пен ысырапшылдыққа жол берген біздің бүгінгі өмірімізді, әрине, қабылдамайды. Осыдан келіп рухани тазаруды, құтқаруды діннен іздейді. Бірақ, үлгіні дәстүрлі ұлттық салтымыз бен дінімізден емес, «шынайы» шығыстағы араб елдерінен алады. Осылай, дін ұлттық құндылықтардан жоғары қойылып отыр. Жаңашыл исламшылар ұлттық және діни феномендердің қазақ ұлт болмысында ажырамастай біте қайнасып, қабысып жатқанына, ұлттық дүниетанымын ескере бермейді. Діни ой-пікір, ұстаным, дүниеге көзқарас қазақ даласында ұлттық сана-сезімге, дәстүрге, наным-сенімге, үйлесімді бейімделгені тарихтан белгілі.
Біздің қоғам жаңа ағымды әртүрлі деңгейде қабылдайды, қолдайтындары да, қолдамайтындары да бар. Ол жастар өз ұстанымдарын әке-шешелеріне де таңады. «Жас» уағыздаушылардың шектеулері, өздерін жоғары ұстауларын, ымыраға келмейтін тәртібі қалған елді бүгін ойландырып та отыр. Ұстанымдар қайшылықтары ұлттық салт-дәстүрлерімен араласып жатырған, әсіресе, өлікті жерлеу, ас беру, марқұмдарды есте қалдыруға арналған шаралар, үйлену, отбасы, ырым- нышандар төңірегінде жиі байқалады. Исламды «жаңаша» және дәстүрлі пайымдаудың астарында, өз орталарына ықпал жасау, бәсекелестік те жатыр. Бұрынғы имамдар билік пен тіл табысып қалған өз позицияларынан айырылғысы келмей, жастарды «уахапшылар» деп кіналауға үйір, тіпті, оларды қудалауды да қолдайтын сыңай танытатындар бар. Шет елден діни білім алған жастар қазақ халқының теологиялық мұрасына, дәстүріне мән берсе ғана ортодоксалдық пайымдаудан арыла бастар еді, ал, бұрынғы имамдардың да мұсылмандардың мүддесінің тұтастығын, бірлігін көздеуі парыз.
Еліміздегі діннің сөз жоқ аймақтық ерекшеліктері де бар. Кей тұста «Батыс Қазақстанда неге экстремизмнің көріністері жиі байқалады?» деген сауал туады. Күрделі аймақтың бірі-расында да Батыс Қазақстан облыстары. Батыс Қазақстан конфессияаралық өзара келісім, көп ұлтты еліміздің қоғамдық тұрақтылығының маңызды негізі болып отырған өлке. Тұрақтылықтың тамырын тереңдетуі үшін мемлекеттік органдардың, діни бірлестіктердің, қоғамдық ұйымдардың мүмкіндіктері де зор. Аймақта ислам, христиан, басқа да діни бірлестіктердің ғасырлар бойы жинақталған тәжірибелері, әлеуметтік, ұлттық, мәдени қайшылықтарды алдын алу жолдары айқындалған. Айта кету керек, діни бірлестіктердің беделі де жылдан жылға өсіп келеді. Аймақта ұлттар мен конфессиялар арасында ерекше сыйластық, бір-бірін қабылдайтын ортақ ахуал қалыптасқан, ашық өштесудің нышандары көрінбейді. Бұны әртүрлі дін өкілдерінің тарихи қалыптасқан тығыз әлеуметтік-экономикалық өзара байланыстарымен түсіндіруге болады. Өз діни ұстанымдарын сақтай отырып, аймақтағы дін өкілдері мәдени және әлеуметтік салада тіл табысып келеді. Батыс Қазақстанда діндер арасында ерекше мәдениет қалыптасқан.
Ақтөбе мемлекеттік педагогикалық институттың «Білім мен тәрбиенің дүниетанымдық және әлеуметтік мәселелерін зерттеу орталығының» 2011 жылы зерттеулері мектеп мұғалімдерінің діни бағыт-бағдарын анықтауға арналғанды. Сұрыптау, іріктеу (выборка) толық деп айта алмаймыз, қазақ, орыс мектептерінің 196 мұғалімдерімен ғана жүргізген сауалнама. Жастары 40-қа дейінгілердің сауалнама жауап бергендердің 60 % жуық, қалғандары 40-нан асқандар, ауыл мектеп мұғалімдердің – 70 % құрайды, басқалары қала мектеп мұғалімдері. Мұғалімдердің негізінен дін жолында болмаса да, ізденіс жолында екендігін көрсетеді. Олардың арасында әсіресе жасы 40-тан асқандардың ішінде атеистер де бар. Ал, дінге бет бұрғандардың арасындағылардың басым көпшілігі ислам мен христиан дініндегілер. Осындай жағдай көрші ресейлік мұғалімдерінің ұстанымдарына да тән, оларда бірақ татар, башқұрт мұғалімдерінің православ дініне, орыстардың протестанттық бағытқа, кришнайттерге өткені байқалады. Орыстанып, тілінен айырыла бастаған башқұрт, татарлар, діндерін де ауыстырған. Бүгін ол республикалардағы православия шіркеуінің священниктерінің 10 % ұлты жағынан башқұрттар мен татарлар (1).
Сонымен бірге, мұғалімдердің дінге бетбұрысы олар дінді терең меңгерді дегенді білдірмесе керек. Сондықтан, олардың елге рухани ықпалы өсуде деп те айта алмаймыз. Ислам дініне іш тартатын мұғалімдердің әлі, суннит пен шиит ағымдары, әртүрлі мағзабтар, олардың ерекшеліктері туралы мағлұматтары өте тайыз. Бір жағымды жағдай, мұғалімдер әртүрлі дінге жатқандарымен, басқа дінге сыйластықпен қарайды. Ал, мысалы, Башқұртстандағы мұсылмандар, әсіресе, татарлар мен башқұрттар арасында қарым-қатынастар шиеліністі жағдайда, олардың астарында этникалық бәсекелестік те жатыр. Сондай-ақ, мұғалімдердің бір тобын діни бағыт-бағдарлары анықталмағанын, кеңес заманында атеист болып бүгін ізденіс, ой, күдік үстіндегілер, олар 10 % жуық құраса да, олардың болашақ таңдаулары бізді ойландырса керек.
Мұғалімдерге тағы да бір қойылған сауал «Сіздің көзқарасыңыз бойынша, бала тәрбиесінің негізі неде?» Олардың 60% бірінші орынға білімді қояды, 35% тек қана білім дейді, ал, 20% тәрбиенің негізі дін, жаратушыға сенім депті. Құдайсыз адам, құдайдан қорықпаған адам адамгершіліктен аттайды, ондай адамда шек, тартыну жоқ дегенді меңзейді. Бұл пікір бүгінгі дінтану әдебиетінде үлкен талас туғызуда. Коммунистер, атеист болғандар адамгершіліктен аулақ болып, тек діндар адамдар мейірімді ме деген сауал төңірегінде алуан түрлі пікір айтылуда. Сонымен қатар, жастардың тәрбиесінде материалдық құндылықтар емес, мәдениет-әдебиеттің, өнердің ықпалына да мұғалімдер назар аударады, олар бірақ 5-6% аспайды.
Тағы да бір жағдай ойландырмай қоймайды. Сауалдар жүргізу барысында бүгінгі ақпарат құралдарында ислам дініндегілерді «экстремист», «вахабит» деп оңды солды сынау, сот үкімін күтпей асығыс бағалау, бір жағынан, мұсылмандар арасында абыржулық туғызса, екінші жағынан осы ахуалды пайдаланып, кейбір шетелдік тіпті тіркелмеген топтар бедел алып, кейбір жастардың басқа дінге өтуіне негіз болып отыр. Егер бұл ахуал өзгермесе, басқа дінге өту жалғаса берсе, біз бара-бара мұсылман елі болудан, тұтас ұлт болудан қалармыз деген мазасыздану байқалады. Бұндай алаңдаушылық бүгін Ресейде, басқа да мемлекеттерде өткір қойылып тұр. Сонымен бірге, Батыс Қазақстан еліміздің өркениеттер қиылысындағы әртүрлі этникалық, экономикалық, саяси, мәдени процестердің астасып жатырған, геосаяси тұрғысынан маңызды аймақ. Бұл табиғи байлыққа бай өлкеде АҚШ, Қытай, Ресей басқа да ірі мемлекеттің мүдделері тоғысып жатыр. Сондықтан, еңбек қатынастары, өндірістегі еңбек бөлісі діни-этникалық сипат алуда.
Батыс Қазақстан табиғи байлығы мол өлке, бірақ, байлық шет елдіктердің қолында. Қасиетті кітаптар Таурат, Забур, Інжіл, Құран табиғатты қастерлеуге шақырады. Сонымен бірге, қазақ халқының табиғатты зор құрметтеу, онымен сүйсіну қазақ мәдениеті мен дәстүрінде терең орын алған. Табиғи байлықты ысырап ету, табиғатқа деген зорлық, оны ластау айналып келгенде сол байлықтың иесі ұлтқа, дінге деген зорлықтың көрінісі болып қабылданады.
Совет заманынан қазақ ұлты ауылдық жерде, негізінен мал шаруашылығында, білім, мәдениет қара қызметте болса, орыстар өнеркәсіпте , ғылыми- техникалық, инженерлік қызмет атқарды. Қазақтардың өнеркәсіптен алшақ болуы, кеңсе жұмысы, мал шаруашылығымен айналысуы ұлттың психологиясына әсер етіп, тіпті, қазақтар табиғатынан ғылыми-техникалық мамандықтарға бейім емес деген пікір қалыптастырды. Сонымен бірге, өндірістегі ұлттық алалық қазақтардың қоныстануына, денсаулығына, материалдық және рухани игіліктерге қол жеткізуіне , түгелдей ұлттық болмысына жағымсыз ықпалын тигізді.
Табиғи ресурстары бай елде байырғы халықтың кедей болуы ойландыратын мәселе. Экономикалық және әлеуметтік салаларда қазақтардың үлес салмағы артпай, қазақ мәселесі шешілді, тұрақтылыққа қол жетті деу қиын. Кезінде Малайзия «бумипутра»- байырғы халықтың дамуына әдейі жағдай туғызған. Олардың білім алуына, еңбек етуіне, кәсіпкерлікке бейімделуіне, ақшаны тиімді пайдалануына, қолда бар байлықты ақылмен жұмсауына, уақытты бағалауға үйреткен. Байырғы халыққа өсімсіз кредиттер, пайдалы мемлекеттік тапсырыстардың басым көпшілігі беріліп, олардың ісін жолға қоюға көмектескен. Сонымен бірге, ағайыншылыққа, сыбайластыққа жол берілмеді. Мұндай шаралар отаршылдық заманында кемсітушіліктің орнын толтырып, қазақтарды да басқалармен тең етер еді.
Әлемде байырғы халықты қорғайтын басқа да тәжірибелер бар. Олар қоныстанған аймақтардағы табиғи байлықты игергенде әділдікті сақтап, мүдделерін ескеру заңдастырылған. АҚШ-тың «Арктик-слоп» компаниясы Аляскада газ құбырын жүргізгенде, сол жердің байырғы тұрғындары-эскимостарды – акционерлік қоғамның жарнашылары ретінде тіркеп, оны АҚШ-тың Конгресі бекіткен. «Арктик-слоп» компаниясында кез келген ұлттың өкілі жұмыс жасауға құқылы. Бірақ, оның акцияларын сатып алуға, табиғи ресурстан түскен пайдаға эскимостар ғана ортақтаса алады. Этностық қауымдастық бірыңғай қоныстанған территорияның жерлері сатылмайды, жалға берілмейді, олар салық төлемейді, мемлекеттен арнайы жәрдем, тегін медициналық көмек алады. Осындай жеңілдіктер байырғы этностар тұратын Канада да көзделген.
Қазақ ұлты резервация тұратын шеттетілген халық болмағанымен, мұнай, газ, басқа да табиғи байлықты игеріп жатқан өңірлерде олардың мүддесі резервация тұратын ұсақ этностардан төмен, қазақтардың маңдайына тек экологиялық ауыр жағдайдың құрбаны болу жазылған сияқты. Ұлттың меншікке ие болуы деген ірі өндіріс орындары тек ұлт өкілдерінің болуы дегенді білдірмейді. Оны қаржыландыратын инвесторлар сырттан болуы мүмкін, бірақ, ол өндірісте жұмыс жасаушы, оның басты менеджерлері мен орта және төменгі деңгейдің мамандары , жұмысшылары негізінен байырғы елдің өкілдері болуы бүгін көптеген елдерде дағдыға айналды және өндірістің негізгі пайдасы осы мемлекетке қызмет жасауы тиіс. Шағын және орта бизнесте ұлттың іскер топтарының қалыптасуы оның тұрмыс деңгейіне тікелей әсер етеді. Бұл, әсіресе, мемлекет құраушы ұлттың ел халқының басым көпшілігіне айналған тұста маңызды мәнге ие болып отыр. Басқа ұлт, тіл өкілдерінің үстемдігі, табиғи байлыққа қожалығы, байырғы халықтың кедейлігі басқа мәдениеттің, діннің үстемдігі деп қабылдайтыны белгілі. Осы тұста халықты мемлекетке қарсы үгіттейтін «көсемдер» де табылады. Олар мемлекеттік құрылымды өзгертуге, біржақты, тек шариғатқа негізделген, «әділ» мемлекет құруға шақырады.Сондықтан, экстремизмнің себебін тек шет елдерде діни білім алған жастардан ғана көрмей, оның әлеуметтік-психологиялық себептерін де есепке алуымыз жөн. Мемлекет ішкі саясатты саралап, өзіне де сын көзбен қарамайынша, экстремизммен күрес тиімді болмайды.
Мемлекет пен дін қарым-қатынасы
Діни ахуалға дін мен мемлекет арасындағы қарым-қатынастардың ықпалының зор екендігі айтылды. Қазақстан Республикасының Конституциясы мен заңдарында зайырлы мемлекеттің басты қағидалары айқындалған, бірақ, біз әлі де ізденіс жолындамыз, себебі, зайырлы мемлекеттің әртүрлі модельдері барлығы белгілі. Атеистік идеология үстем болған елдің дінге оралуы ерекше тәжірибе, оның үлгісі тарихта болмаған, сондықтан, оның өз ерекшеліктері барлығы сөзсіз. Соңғы уақытта, бір жағынан, қылмыстық іс-әрекеттер мен экстремизм арасын, екінші жағынан, экстремизм мен халықтың наным-сенімін, ажырата алмай келеміз, қылмысты іс-әрекетке діншіл адамдардың қатысы болса, діни экстремизм деп жатамыз, ел оның астарында экономикалық, әлеуметтік себептер, есеп айырысу, тіпті өш алу, ашу-ыза жатуы да мүмкін. Ал, экстремизм саяси мақсатты көздейтін іс-әрекеттер.
Ғылыми әдебиетте Орталық Азия елдеріндегі экстермизмнің мынандай себептеріне назар аударады. Бірінші, рухани дағдарыс, сенім дағдарысы экстермистік идеяға бой алдыру мүмкіндік туғызады. Екінші, кедейшілік, жұмыссыздық әсіресе ауылдық жерлерде түрліше қылмыстық істерге, радикалдық әрекеттерге итермелейді. Үшінші, саяси биліктің бір қолда шоғырлануы, оппозицияны қудалау жасырын радикалдық топтардың пайда болуына әкеледі (2).
Экстремизм, оның ішінде дін атын жамылатындар да көбейсе, қоғамның өзінің саяси жүйесінде бір осал тұстары бар деген сөз. Тіпті, ғалымдар экстремизм организмдегі құрт ауруының таяқшалары сияқты мемлекеттің организміне іштей тән деп есептейді, қолайлы жағдайда тез тарап кетуі мүмкін. М.Вебердің айтуынша, мемлекеттің күш жұмсауға құқылығының өзі қарсылық туғызады. Ал, тек күшке салу, мәселені мылтықпен шешуге тырысу экстремизм мен жанжалдарды одан әрі өрбітеді. Ал, азаматтық қоғамның мүмкіндіктері, үкіметтік емес ұйымдардың ықпалын пайдалана алмай отырмыз.
Діни бірлестіктермен қарым-қатынаста әлі де олармен оркестрдің дирижеріндей билеп-төстеу, есеп алу, қадағалау, бақылау көріністері барлығы байқалып қалады. Құқық қорғау органдарының қызметкерлері өздерін дөрекі, әдепсіз ұстаулары, өктемдікпен дауыс көтеріп сөйлеуі, адамгершілік қағидалары мен конституциялық талаптарға, азаматтардың діни сеніміне қарамастан құқын сыйламау дау-жанжалдарға да итермелеуі мүмкін. Діни бірлестіктердің ішкі ісіне араласу, азаматтарды заңсыз қамау, ұстау, үйін тінту, суретке түсіру, басқа да қудалау экстремистік психологияны қоздырады.
Қоғам – біртұтас ажырамас организм. Оның бір бөлігінде болған өзгеріс тез, қалай болғанда да басқа бөліктеріне ықпал етеді. Рухани процестерде жеке адам санасынан тәуелсіз, үзіліссіз жүріп жатады, оны сырттан басқару мүмкін емес. Сонымен бірге, олар адамдардың іс-әрекетіне, тәртібіне әсер етеді. Елдің басын біріктіретін, мәдениетінің тірегіне, тәрбиенің негізі дін екенін талай ғасырлық тәжірибе дәлелдеді.
ПАЙДАЛАНЫЛҒАН ӘДЕБИЕТТЕР:
1. «Религия и право» №1,2012,19 бет.
2. Экстремизм в Центральной Азии. Алматы, 2000г.13 бет.
302 рет
көрсетілді0
пікір