- Тарих толқынында
- 08 Желтоқсан, 2011
Айтары мол, шежірелі «Ақиқат»
Әл-Фараби атындағы Қазақ ұлттық университетінің Бас ғимаратындағы ғылыми кеңестің мәжіліс залында Қазақстан Республикасы Тәуелсіздігінің 20 жылдығы және «Ақиқат» ұлттық қоғамдық-саяси журналының 90 жылдығына арналған «Қазақстандағы ақпараттық процестер: тәуелсіздікті нығайтудағы БАҚ рөлі» атты халықаралық ғылыми-тәжірибелік конференция өтті.
ХІХ ғасырдың бірінші ширегінен бастап, яғни 1921 жылдан бері жарық көре бастаған «Ақиқат» журналының тарихи-тағылымдық шежіресі халқымыздың тәуелсіздік жолындағы өсіп-өркендеуімен тығыз байланысты. Тұтас бір ұлттың бет-бейнесін айшықтайтын, бір ғасырға жуық жолды жүріп өткен басылымның айтары да, жазары да қашанда мол. «Ақиқат», шын мәнінде, көпшіліктің ықыласына бөленген басылым екенін уақыттың өзі дәлелдеді. 90 жылдық нөмірлерінің сарғайған беттерінде «Ақиқаттың» көтерген мәселелері аз болған жоқ. Ел мен жер, халықтың әл-ауқаты, саяси-экономикалық бағыт-бағдар, әлемдік өркениеттер тоғысы тәрізді күрделі мәселелерді күн тәртібіне шығарып, оқырманға ой салып, көкірек көзін ашатын сарабдал басылымға айналды. Журнал заман мен уақыттың саяси-әлеуметтік көріністерін сипаттап бейнелеген, осылайша, болып жатқан рухани-мәдени құбылыстарды саралап, тасқа басқан тірі шежіреге ұласты. «Ақиқат» халық өмірінің айнасы болуымен бірге, қазақ халқының болмысына, дүниетанымына жақын тақырыптарды қозғай алды, рухани байлықты дәріптеді, ғылым мен білімді ту етіп, ізгілікті арқау еткен бірегей басылым ретінде қызмет етті.
Кеңес дәуірінің кезінде «Ақиқат» журналының атауы басқа болғанымен, мақсаты-мұраты, көтерген тақырыптары тап қазіргідей ұшан-теңіз еді. «Қызыл Қазақстан», «Ауыл коммунисі», «Коммунист», «Қазақстан коммунисі» деген атаумен жарық көріп, бүгінде «Ақиқат» атын ұстанып келе жатқан журнал, шын мәнінде, өзінің ұлттық келбетін айшықтауда ақиқаттың, шындық пен шынайылықтың үлгісін насихаттауға бағыт алды. Бір кездері «Ақиқаттың» тоталитарлық жүйенің қылышынан қан тамған заманында идеологиялық құралға айналған кездері де болды, алайда қасиетті Тәуелсіздіктің келуімен журнал әрбір тақырыпқа еркін бойлап, цензуралық шектеуден біржола арылды. Ол бүгінде мемлекет дербестігінің нығаюына өзіндік сүбелі үлесін қосып келеді. Басылым беттерінде зиялы қауым өкілдерінен бастап, жас ғалым зерттеушілердің ойлы мақалалары жарық көріп, қоғамдық пікірталастың өзегіне айналды. Журналды басқарған әр жылдардағы редакторлары – Камал Смайылов, Сарбас Ақтаев, Ахат Жақсыбаев, Нұрмахан Оразбек, Темірхан Медетбек, Жұмабек Кенжалин, Самат Ибраим сынды қарымды қаламгерлер журналдың бастапқы редакторлары Абдолла Асылбеков, Ерғали Алдоңғаров, Мырзағұл Атаниязов, Нәзипа Құлжанова, Нығмет Нұрмақовтар салып кеткен сара жолды табысты да сәтті жалғастыра білді. «Ақиқаттың» редакторлық ұжымы уақыт пен заман талабына сай өзгеріп келсе де, басылымның ел өміріндегі бет-бейнесі дәл сол қалпында. 90 жылдық белесіне үлкен табыс пен ғибраты мол өнегелі өмірімен келіп отырған басылымның алдағы уақытта да қазақ руханиятының шамшырағы болып қала беретіні сөзсіз.
Басылымның 90 жылдық мерейтойына арналған ғылыми басқосуға еліміздің БАҚ өкілдері, алыс-жақын шетелдерден келген құрметті қонақтар, бір топ зиялы қауым өкілі, магистранттар мен студенттер қатысты. Осынау айтулы күнге орай үкімет және министрлік басшыларынан келіп түскен құттықтау хаттарының легі мол болды. Олардың арасында Қазақстан Республикасының Премьер-министрі Кәрім Мәсімовтен, Мәдениет министрі Мұхтар Құл-Мұхаммедтен, Байланыс және ақпарат министрі Асқар Жұмағалиевтен, Білім және ғылым министрі Бақытжан Жұмағұловтан, «Егемен Қазақстан» республикалық газеті» акционерлік қоғамының президенті Сауытбек Абдрахмановтан, Қазақстанның басты жоғары оқу орындары ректорларынан келген жылы лебізге толы хаттарды ерекше атап өтуге болады. Жиын барысында сөз алған «Ақиқаттың» әр жылдардағы редакторлары мен конференция қонақтары журнал ұжымын айтулы мерейлі шағымен құттықтап, жүрекжарды лебіздерін білдірді.
«Қазақ газеттері» ЖШС-ның бас директоры, редакторлар кеңесінің төрағасы Жұмабек Кенжалин басылымның әр кездердегі редакторлары болған белгілі қаламгерлер Сарбас Ақтаев, Ахат Жақсыбаев, Нұрмахан Оразбек, Темірхан Медетбек, Самат Ибраимге «Ақиқат» журналына сіңірген еңбектері үшін марапаттау мен бағалы сыйлықтар табыстады. Осы алқалы жиын барысында «Ақиқат» журналының бас редакторы Мұхитдин Салқынбаевқа, «Ана тілі» газеті бас редакторының бірінші орынбасары Нұрперзент Домбайға «ҚР Мәдениет қайраткері» белгісі табыс етілді. Сондай-ақ «Мәдениет қайраткері» белгісімен «Қазақ газеттері» ЖШС-ның Қарағанды облысындағы өкілі Батырбек Мырзабеков марапатталды. «Ақиқат» журналының бұрынғы басшысы Сарбас Ақтаев пен басылым бас редакторының орынбасары Қыдыралы Қойтайға Қазақстан Журналистері одағының «Қазақстан журналистикасына 50 жыл» мерекелік медалі табысталды. Басылым қызметкерлері де мерекелі күнге орай дипломдармен марапатталып, бағалы сыйлықтар табыс етілді.
Дәуіржан Төлебаев
882 рет
көрсетілді0
пікір