- Заманхат
- 19 Сәуір, 2012
Рухани мұра
Кәмия Сүндетқалиева, ғылыми қызметкер
Тәуелсіздіктің жиырма жылдығында Қазақстан Ғылым Академиясының мүше-корреспонденті, Қазақстан Республикасының көрнекті қайраткері, профессор Сәтбаева Шәмшиябану Қанышқызының «Бес томдық шығармалар жинағы» жарыққа шықты. Ғалымның «Әдеби байланыстар» «Өрнекті өріс», «Казахско-европейские литературные связи XIX и первой половины XX века», «Казахская литература и Восток», «Шокан Валиханов – филолог», «Чокан Валиханов и русская литература», «Шакарим Кудайбердиев» атты монографиялары және Абай, М.Әуезов, М.Дулатов, А.Байтұрсынов, Ы.Алтынсарин, Т.Шевченко, Л.Н.Толстой, С.Сейфуллин, Г.Плеханов және т.б. туралы зерттеулері жарық көрді. Оның басшылығымен көне сөз мұраларын зерттеуде ауқымды жұмыстар атқарылды. Ш.Қ.Сәтбаева Шәкәрім Құдайбердиевтің және Ахмет Байтұрсыновтың шығармашылық мұраларын зерттеуде де өзінің жеке үлесін қосты. Қазақ әдебиетінің ұлтаралық байланыстары қазақ әдебиеттанушыларының әрдайым назарында, соның ішінде Ш.Қ. Сәтбаеваның кітаптары ерекше орын алады. Ш.Қ.Сәтбаева классикалық салыстырмалы әдебиеттанудың дәстүрлерін дамыта отырып, нақты жазушылардың шығармашылығын, әдеби бағыттар мен мектептерді зерттеді. Әдебиеттанушы-ғалым салыстырмалы талдау арқасында тарихи, мәдени және эстетикалық тәжірибемен ортақтасқан әр түрлі ұлттық әдебиеттер контекстілеріндегі (қазақ, орыс, шығыс және батыс-еуропалық) тікелей әсерлерді, саналы түрде алып пайдалануды, типологиялық ұқсастықты анықтап отырды. Әрдайым интеллектуалды ізденіс – Ш.Қ. Сәтбаеваның өрнегі өзгеше қайталанбас ғылыми стилінің ерекшелігі. Қазіргі оқырман Ш.Қ.Сәтбаеваның жаңадан басылып шыққан көптеген зерттеулерімен танысуына мүмкіндіктері көп. Ш.Қ.Сәтбаеваның бес томдық шығармалар жинағы оның өмірлік жолдасы, Қазақстанның көрнекті мемлекет және қоғам қайраткері Оразай Батырбекұлы Батырбековтың еңбегінің арқасында жарық көрді. Ол шығармалар жинағын шығару туралы идеясын ұсынушы, оның негізгі құрастырушысы болды. Дана уақыт категориясы туралы басылымның жауапты редакторы, С.Аманжолов атындағы Шығыс-Қазақстан университетінің ректоры филология ғылымының докторы, профессор, Қазақ Пен-клубының мүшесі, өзінің ұстазының осы бес томдық жинағын шығаруға үлкен септігін тигізген Б.Б.Мамраев былай дейді: «Шәмшиябану Қанышқызы арқасында мен сол керемет уақыт туралы көп хабар алдым (Академия ғылымының құрылуы туралы сөз болады – С.А.) адам баласы мансапты, мақтауды талап етпей ғылымға адал еңбек еткен кез... Әрбір кітабының шығуына тынымсыз, тиянақты еңбегі себепкер болды. Ш.Қ.Сәтбаеваның еңбекқорлығы өмірінің соңына дейін жалғасты. Шамшиябану Қанышқызының көптеген ғылыми жоспарлары іске асуы керек еді...» Жылдар өтуде. Ш.Қ.Сәтбаеваның ғылыми қызметі тікелей байланысты болған М.О.Әуезов атындағы Әдебиет және өнер институты биыл жартығасырлық мерекесін тойлап өтті. Шәмшиябану Қанышқызының оқушылары, оның ғылыми мектебін жалғастырушылар, Қазақстан жоғарғы оқу орындарының мұғалімдері, әдебиеттанушылар Шәмшиябану Қанышқызының қазақ әдебиетінің тарихы мен даму заңдылықтарын, оның ССРО құрамында болған халықтар және шетел әдебиетімен қарым-қатынасын зерттеуден тұратын негізгі бағыттары болған ғылыми жұмысының нәтижесі, еңбегі отандық әдебиеттану тарихындағы фундаментальды, классикалық бөлімінің бірі екеніне көздері әбден жетті. Ш.Қ.Сәтбаеваның монографиялары ой кендігімен, жан-жақты талдау тереңдігімен, бай фактілі материалдармен, нақты дәлелдермен, мұқият ойластырылған құрылысымен, тиянақтылығымен, ғылыми стилімен ерекшеленеді. Аға буын ғалым-филологтар салып кеткен әлем халықтары тарихындағы ортақты және ерекшеліктерді жан-жақты зерттеу арқылы мәдениеттер өзара байланысының тарихи дәстүрлерін сақтап қалу және оны әрі қарай өркендету өте маңызды.
620 рет
көрсетілді0
пікір