- Ұлттану
- 19 Қараша, 2014
Арзан мұнайдың дәуірі басталды ма?
Мұнай бағасының күрт құлдырауына не себеп? Расында, арзан мұнайдың дәуірі басталды ма? Әлде мұнайды саяси ойынға тетік еткен алпауыттардың ойыны ма? Мұнай бағасының төмендеуінде саяси астар бар ма? Бар болса, кімге бағытталған?
Әлде әлемдік экономика өсуін тоқтатып, тежелу үрдісін бастан кешуде ме? Қара алтынға сұраныс содан төмендеді ме? Сұрақ көп, жауап тұщымды емес. Дегенмен, мұнай бағасының құлдырауына байланысты қазір әлемде бірнеше болжам айтылады.
Біріншісі, әлемде мұнайдың тым көп өндірілуі. Яғни «араб көктемі» бұлғағы тұсында тас-талқан болған Ливия секілді мұнайлы елдер, қазір аз да болса, ес жиып, мұнайды мол өндіре бастады. 2003 жылғы АҚШ бастаған коалиция әскерінен күйреп, қырық құрау болған Ирак та (әлемдегі ең арзан мұнай осы елде өндіріледі) жыл басынан бастап қара алтынды қара жерден молдау сорып, әлемдік мұнай нарығына тастады. Ядролық бағдарламасына байланысты Иранға салынған санкция жұмсарды, біразы тоқтатылды. Осылайша, сыртқа мұнай сата алмай келген Иран енді сыртқы рынокқа қара алтынды молдап жібере бастады. Осының бәрі жалпақ дүниеде мұнайдың көбеюіне әсер етіп, тұтынушылардың сұранысынан асып түсті. Бұл жерде айтпай кетуге болмайтын тағы бір мәселе, ол АҚШ-тың мұнай өндіруде Сауд Арабиясын ысырып алға шығуы. Соңғы екі-үш жылда ол елде тақтатас (сланцы) мұнайын өндіру күрт артты. Демек, мұнайдың аса көп өндірілуі сұраныстан асып түсіп, бағаның құлауына әсер етті. Бұдан тыс 2007 – 2009 жылдағы дағдарыстан әлем әлі бетін тіктеп кете алған жоқ. Әлемдік экономикада баяулау бар. Осы жағдаятта қара алтынның бағасына белгілі деңгейде әсер етеді. Бұл – мұнай бағасының құлауының бір себебі. Екінші бір мәселе, мұнай бағасының саяси астары. Оның екі бағытын анықтауға болатын сынды. Біріншісі, Украинадағы жағдай. Ресейдің араласуы. Қырымды аннекциялауы. Батыс салған санкцияға қарсы шара қолдануы. Тал қармап жатса да, Мәскеудің Батысқа қыр көрсетіп қалуға ұмтылуы. Осының бәрін безбенге салған Батыс (АҚШ деп ұғыңыз) Ресейді оқ шығармай-ақ әлсірету, күйзеліске ұшырату жолын таңдады. Ол мұнай бағасын құлату еді. Өйткені Ресей бюджетінің басым бөлігін мұнай мен газдан түсетін доллар құрайтыны белгілі. Қара алтынның бағасы түсті дегенше, Ресейдің жағдайы шатқаяқтады дей бер. Расында, қазір Ресей сондай күй кешуде. Медведевтің ел бюджетін «қайта қарайтын күн туды» деп мәлімдеуі, президент Путиннің Кремльде отыра беруге байыз таппай, Қытай, Оңтүстік Шығыс Азия, Латын Америкасын аралап, ел экономикасын арашалайтын нарық іздеп, табанынан таусылуы, рубль құнсызданып, инфиляцияның өршуі, банк саласының тығырыққа тірелуі, көптеген әлеуметтік, қорғасын саласына арналған бағдарламалардың қысқаруы – соның куәсі. Бір сөзбен айтқанда, Ресей экономикасы күйзелісте. Ал бұдан оңалу ұзаққа созылмақ. Яғни бірер жылдың жұмысы емес. Осылайша, АҚШ әлемде мұнай өндіруден алда тұрған Сауд Арабиясымен келісе отырып, діттеген мақсатына жетті. Көпшілік сарапшылар Барак Обама КСРО-ны құлатуға Рейган (КСРО-ны құлату үшін кезінде АҚШ Сауд Арабиясымен келісіп, мұнай бағасын 9 долларға дейін түсірді. Осының өзі-ақ мызғымас одақтың түбіне жеткен) жасаған сценарийді қолданды деседі. Солай сияқты. Екінші мәселе, Сауд Арабиясы АҚШ-пен келісе отырып, Ресейді тұқыртуымен қатар, АҚШ-тың өзіне қарсы астыртын әрекет етіп жатуы да мүмкін. Оған себеп, Вашингтонның Эл-Риядты мұнай өндіруде алғашқы орнынан ығыстырып шығаруы. Өйткені АҚШ-та тақтатас мұнайын өндіру құлашын кеңге жая бастады. Осылайша, араб әлемімен бәсекеге түсті. Тіпті суырылып алға шықты. Туғанынан көзін мұнаймен тырналап ашқан арабтар бұған көнгісі жоқ. Әу баста Барак Обамамен Сауд Королі көктемде құпия кездесіп, Ресейге қарсы мұнай бағасы арқылы ықпал етуді ойластырғанда, қара алтынның бағасы 80 доллар көлемі деп есептеуі мүмкін. Өйткені тақтатас мұнайын өндірудің құны осы шамада жүзеге асырылуда. Бұдан түсіп кетсе, өзін-өзі ақтамайды. Ал федералдық бюджеті 100 доллар деп есептелген Ресей үшін мұнай бағасының 80-ге түсуі үлкен соққы. АҚШ пен Сауд Арабиясының есебі де осы төңіректе құрылуы мүмкін. Бірақ мұнай бағасы бүгінде 77-нің ар жақ бер жағында дірілдеп тұр. Бұл ненің белгісі. «Бұл-Эл-Риядтың Вашингтонға қарсы жасаған әрекеті. Егер мұнай бағасы 70, не болмаса 60 долларға құлайтын болса, АҚШ-та тақтатас мұнайын өндіру өзінен-өзі тоқтамақ. Себебі өндіру құнын ақтамайды. Жағдай осылай болса, Сауд Арабиясы мұнай өндіруден әлемде қайтадан бірінші орынға көтерілмек. Эл-Риядтың мұнай бағасын 80 доллардан да төмен түсуіне мүдделі болып отырған себебі осы» деседі сарапшылар. Мүмкін. Дегенмен, кейбір сарапшылар, «тақтатас мұнайын өндіру технологиясы тез дамып, қолданысқа енуде. Демек, мұнай бағасы 50-60 долларға түссе де, тақтатастан мұнай өндіруге бөгет бола алмайды» дейді. Бәрі мүмкін. Халықаралық зерттеу мекемелері де қара аспанды төндіруде. Олардың есебінше, мұнай бағасы жыл соңына дейін 70-тің деңгейіне дейін құласа, алдағы жылы 60 доллардың көлемінде болуы мүмкін деп сәуегейлік жасауда. Қалай айтсақ та, бүгінде мұнай саясаттың қол жаулығына айналған сияқты. Мұны ешкім жоққа шығара алмас.
308 рет
көрсетілді0
пікір