Заманхат
13 Қаңтар, 2015

Құрметті оқушылар!

Алдыңызға үшбу журналымды саламын, кішкене екен деп қоңыраймаңыздар!
Газет һәм журнал халық үшін екендігіне шек айту жоқ. Халықтың қай дәрежеде алға кеткендігі – халық арасында таралған газет-журнал һәм кітаптардан білінеді. Заман ғылым заманы болған соң әрбір жұрт қатарынан кейін қалмас үшін ақша аямай кітап-газет, һәм журнал бастырып халыққа таратудың әждәһәтінда. Соңғы замандарда біздің қазақ жұртында аз-мәз тіршілік көрсетіп газет шығара беруді қолға алып қараса да не себепті іске ұқсатып шығара алмайды. 1907 ж. II Мемлекеттік думаның жиынымен Шәһмәрден Қошығұлов «Серке» есімді журнал шығара бастап еді. Ұзаққа бармай, үкімет тарапынан тоқтатылды.

Сол жылы Троицкіде Есмағамбет Айманбаев «Киргизская газета» есімді орысша-қазақша бір газет шығармақ болып алғашқы нөмірді шығарды да тоқтатты. Келер жылы Орынборда Ысмағұл Иманшалов бас болып, елдің бірқатар жақсыларының басын қосып газет шығару хақында кеңесіп еді. Баяғы қазақтың ынтымақсыздығы себеп болып, бұл да ыдырап кетті. Мен тағы талап етіп, осы кішкене журналды шығармақ үшін халқыма жармастым. Жұртқа атақ шығарып білім сату үшін емес, бәлкі дәулет иесі ағалар мұны көрген соң ойға қалмас па екен деген ниетпен. Қолда пұл жоқ. Жұрт болып жұртшылық етіп, бұл журналға көбірек қыридарлық етпесе, әлбетте бұл журнал да қазақтың дүниеге шығара алмаған ісінің бесіншісі болар да қалар. Қазіргі үміт халықта. Бұл журнал айында бір мәрте шықпақшы, программасы мынау болмақ.
1. Сыртқы хабарлар.
2. Мұсылмандар тіршілігіне мысалдар, уақиғалар.
3. Фельетон (әңгімені 20 жылдарда С. Д. осылай атаған).
4. Кітаптар хақында һәм ғылым баптан кеңестер.
5. Басқарушыға келген хаттар һәм одан-бұдан. Журналға «Айқап» деп есім бердік. Бұл сөзге түсінген де болар, түсінбеген де табылар. Біздің қазақтың «Әй, қап» демейтұғын қай ісі бар?! Газет шығармақшы болдық, қолымыздан келмеді. Пұлы барларымыз ынтымақтаса алмадық. Пұлы барларымыз ынтымақтассақ та, ақшасыз істің жөні табылмады. «Қап, пұлдың жоқтығы, қолдың қысқалығы-ай» дедік. Жақсы жерлерімізді қолда сақтар үшін қала салмақ болдық. Басымыз қосылмады. Қолайлы жерлер қолдан кетті. «Қап» ынтымақсыздығымыз-ай дедік. Болыс, би, ауылнай боламыз деп таластық, қырылыстық. Жеңілгеніміз жеңген жағымызға, «ендігі сайлауда көрерміз, қап, бәлем-ай!» дедік. Осындай біздің қазақтың неше жерде «қап» деп қапы қалған істері көп. «Қап дегізген қапияда өткен істеріміз көп болған соң журналымыз да өкінішімізге ылайық «Айқап» болды.
Журналға бастыруға жіберілген сөздер қазақша, ноғайша, орысша һәм түрікше болса да қабыл алынады.
Басқарушы, бастырушы М. Сералин
РЕДАКЦИЯДАН: Құрметті оқырман! Біз де сол «Айқап» журналын шығарған алашшылдар сияқты алдымыздағы ағалар жолын ұстанып, «Ақиқат» журналын шығарып жатырмыз. Бар ниет-құлық, бағыт-бағдарымыз әрі ұстанымымыз ҰЛТ, МЕМЛЕКЕТ, ҚОҒАМ мүддесі. М.Сералиннің жоғарыдағы оқырманға хаты біздің көкейіміздегі жүрген жайларды тілге тиек еткен. Ал, біз өз тарапымыздан айтарымыз, қазіргі жаһандандыру атжалмандай меңдеп келе жатқан кезеңде, ұлт болып ұйлықпай ұпайымыз түгел болмайды. Мемлекет ұлтты емес, ұлт мемлекетті қалыптастырады. Ендеше, ұлтымыз бүгінде ақпараттық майдан өтінде тұрғанда, «Ақиқат» журналының да «Айқаптай» басты ұстанымы ҰЛТ, МЕМЛЕКЕТ, ҚОҒАМ тағдырынан тыс қалса, онда біздің кім болғанымыз?! Біздің де мақсатымыз әрі ұстанымымыз еліміздегі қоғамдық-саяси, мәдени-экономикалық, әлеуметтік-тұрмыстық өмірге белсене атсалысып, Байтұрсыновша айтқанда, ұлтымыздың «көзі, құлағы һәм тілі» болу.
Әлқисса, Құрметті оқырман, «Ақиқат» журналы өздеріңіздің рухани құндылықтарыңыз. Сол құндылықты мазмұнды да мәнді етіп шығаратын өздеріңіз. Ал, біз, редакция ұжымы Сіздерге сол жолда қызмет етушілерміз. Журналдың сүйенері – СІЗДЕРСІЗДЕР. Құрметті оқырман! Ендеше, Сіздер мен Біздердің арамызда бір-бірімізге деген СЕНІМ жүруі керек. Біз сіздердің журналды қолдайтындарыңызға сенеміз, сондықтан да, сіздер біздерге де сеніңіздер.
Журналдың Жаңа жылдық жаңа саны құтты болып, Жаңа жыл Сіздерге де бақыт, бақ әкелсін!
Ізгі тілекпен редакция ұжымы