- Заманхат
- 17 Маусым, 2015
Асқар Татанайұлы шығармашылығына аз-кем кідіріс
Екі ұлы империяның арасындағы шекара сызығының сызылуы қазақ халқын екіге бөліп қана қойған жоқ. Сонымен бірге, оның мәдениеті мен әдебиетін де екіге бөлді. Сол себепті де, екі ел арасындағы әдеби байланыстың аздығынан XX ғасырда қытай елінде ғұмыр кешкен суреткер – Асқар Татанайұлын ата жұрттағы оқырманның бірі білсе, бірі білмейді. Абай – жалпы қазақтың жаңа реалистік жазба әдебиетінің негізін салса, Ақыт, Жүсіпбекқожа, Асқарлар қытайдағы қазақ жазба әдебиетінің қалыптасуына өз үлестерін қосқан.
Асқар шығармашылығының ауқымы өте кең. Өйткені, ол өмір сүрген кезең – тұтастай ХХ ғасырдың бас-аяғы. Асқар өзі өскен ортадағы күрделі қоғамдық жағдайды еңбектеріне арқау ете білді. Асқардың ақындық өнеріне келсек, ол ақын ретінде өзгеше бөлек ой, пікірді айта білетін, тақырыпты аса бір көркем шеберлікпен бейнелей алатын суреткер. Ақынның «Оқы, балам, жақсы оқы» атты өлеңіне қарайық:
Маған білім керек-ақ,
Уақыт мұрсат бермейді.
Үйренуге махаббат,
Жүрегімді кернейді.
Қазақ әдебиетінде, мысалы, Абайдың төрт мезгіл туралы өлеңдері қалай тамаша бейнеленсе, Асқардың да жыл мезгілдері туралы жазған өлеңдері өз алдына бір төбе. Айталық, «Қыс», «Көктем», «Алтай жазы», «Жазғытұрым», «Жаз», «Төрт мезгіл» сынды өлеңдерінің көркемдік құрылысы ерекше:
Түн үскірік–
Тұр ышқынып,
Сары аязды келді қыс.
Боран борап,
Қармен орап,
Жапты жерді теп-тегіс.
Аспан түнек,
Жатыр түнеп,
Соғып қыстың ызғары.
Келсе де қыс,
Бізде ұлы күш,
Қажымайтын қайрат мол.
Соқса дауыл,
Алмай дамыл,
Болашаққа тарттық жол, – деп келетін «Қыс» туралы өлеңнің алғашқы шумақтарында ақын қыстың табиғат көрінісін бейнелесе, сол арқылы өздеріндегі ерік-жігерді де жалғай түседі [1].
Асқар поэзиясының ең басты ерекшеліктерінің бірі – шығармаларында жасандылық пен көз бояушылықтың болмауы. Ақын өлеңдерін оқыған сайын Алтайдың асқар шыңдарынан сылдырап аққан мөлдір бұлаққа бас қойғандай мейірің қанбай, оқыған сайын оқи бергің келеді. Ендеше, ақынның жалған жалалы болып жүргендегі жазған «Серт» деген өлеңіне қарайық:
Сертім сол сескенбеймін,
қажымаймын,
Қайрат қып ауыр күрес жүрген
сайын.
Бермеймін, шынықпасам,
шырайымды,
Не керек қасірет-қапа, қайғы-уайым.
Өмірден тартып жатқан бұл тақсырет,
Жеткенде жанымды өртеп
жалындаймын.
Ер басына күн туған қиын заманда өзіне берілген серт түрінде жазылған өлең қиналған сайын жігерін жани түседі.
«Сегіз аяқ» – ұлы ақынның жазушылық еңбегінің орта тұсында туған үлкен бір белдей әрі мол, әрі барлық жағынан көркем келісті шыққан, зор шығарманың бірі», – дейді М. Әуезов [2]. Ақын Абайдың сегіз аяқ ұйқасына еліктеп бес буынды тармақтарды негізге алып өлең жазады:
Шілде мен тамыз,
Ұжмақ қой нағыз,
Жайқалып орман жапырағы.
Егіні, малы... –
Жарасып бәрі,
Алаңсыз шаруа отырады.
Сағымдап күннің шуағы,
Жетілген жаздың құрағы.
Сегіз аяқ үлгісінің тамаша игерілгені соншалық, ой бейнелеуі, ырғақ пен буын сәйкестігінен мін таба алмайсыз.
Эпикалық жанр – Асқар шығармашылығында көлемді бір сала. «Арқалық батыр», «Ел қорғаны – Абылай», «Ғылымсыз – ғұмыр тұл» жыр-дастандары ақын қолынан шыққан көркем туындылар. Кез-келген уақиғалы шығарманың тартымды болуына автордың берген бағасы мен көркемдік шеберлігі тікелей әсер етеді. «Ел қорғаны – Абылай» дастаны ақынның шоқтығы биік шығармаларының бірі. Дастан былай басталады:
Өмірге ғасырлардан ғасыр жалғап,
Зуылдап өтіп жатқан жылдарға арнап.
Сөз қозғап, ой толғасаң әр дәуірдің
Тағдырын тебіренесің бірден толғап.
Ақын – ұлтымыздың тарихын, мәдениетін, ұлттық философиясын бар ынта-ықыласымен зерттеген тұлға. Сол себепті де ол заманының саңлағы атанған Абылай ғұмыр кешкен кезеңді, ерлігі мен ұлт мүддесін қорғау жолындағы еңбегін жақсы біледі. Асқар – қазақ фольклоры мен драматургиясы арасындағы күрделі байланысты бір арнаға тоғыстыра білген драматург. «Арқалық батыр», «Талап», «Қалың мал», «Құлдықтан құтылғандар» пьесаларын жазып, өлкеде қазақ драматургиясының негізін қалады.
Бұрын ұлттық топырақта өнікті дәстүр болмағандықтан алғашқы драматургтеріміз жанр табиғатын, форма қисындарын еуропалық әдебиеттер үлгісінде үйреніп, соларды нұсқа тұтты. Бұл жайтқа, театр жөнінде 1926 жылы жазған белгілі мақаласында, Мұхтар Әуезов назар аударған, ал, тақырып таңдау, сюжет сұрыптау, образдар жасауға келгенде, әсіресе, драматургияда дағдылы дәстүр болғандығын көреміз. Мұндай бауырласудың бір себебі, қазақ тұрмысында театрға жақын элементтердің, әдебиетте драматургияға туыс түрлердің молдығында еді [3].
Академик Р. Нұрғалиев Жұмат Шанинның шығармашылығына тоқталғанда, «Арқалық батыр» трагедиясына әдеттегі драмалық шығармаларды талдау – образды бағалау, идеясын көрсету, конфликтіні ажырату, сюжет ерекшеліктерін айқындау тұрғысынан ғана келуге болмайды. Өйткені, бұл туынды – ұлттық әдебиетіміздегі ең алғашқы күрделі пьесалар үлгісінің бірі. Сондықтан, негізгі компоненттерге анализ бере отырып, диалогтың жасалуы, авторлық ремаркалардың түрлері, көріністер, перделер арасындағы байланыс, тіл бояулары – осы сияқты мәселелер төңірегінде де байлам жасау қажеттілігі туады, – дейді. Дәл сол сияқты кейіпкеріміздің «Арқалық батыр» пьесасына да талдау жасау үлкен еңбекті қажет етеді деп ойлаймын.
Пікірлерді жинақтай келе, бір мақаланың көлемімен Асқар туындыларының сыр-сипатын толық ашып беру мүмкін емес екенін білдік. Шағын мақала Татанайұлы шығармаларын түсіну үшін емес, оқырманның ақын еңбектеріне деген ынта-ықыласын тудырса біздің мақсатымыздың орындалғаны деп білеміз.
Мырзабек Радоллаұлы
Пайдаланылған әдебиеттер:
1. А. Татанайұлы. Ел қорғаны – Абылай. Алматы, 2008. 23- бет.
2. М. Әуезов. Абай Құнанбаев. Алматы, 1967, 136 бет.
3. Р. Нұрғалиев. Жұмат Шанин, Арқалық батыр. Алматы, 1988 ж., 26 бет.
474 рет
көрсетілді0
пікір