- Заманхат
- 14 Қараша, 2017
ТҮРКІ ЕЛДЕРІНІҢ ГАРМОНИЯЛЫҚ ЭКОНОМИКА ОДАҒЫ – ЗАМАН ТАЛАБЫ
Ораз Баймұратов, Қазақстан Республикасы Ұлттық Ғылым академиясының академигі, Әлеуметтік экономика және қаржы институтының директоры
Түркі әлемі елдері – Азия мен Еуропаның ұлан-ғайыр аумағын қамтитын, халқы жер бетінің түрлі құрлықтарында қоныстанған этностар жиынтығы. Даму тарихы шырмауықтай өрілген бұл халықтар бірде замананың талайлы ағыс-ағынында құшақтары айқасып жанасып жатса, бірде атылған оқтың жылдамдығындай тездікпен бір-бірінен алшақтап кетіп, уақыт алаңында жол-жөнекей түйісіп отырды. Олар бізге бүгінгі күннің айнымас сәулеттік келбетін жасап қалдырып, Шығыс пен Батыстың дамуына орасан зор ықпал етті. Түркі этносының әлемдік мәдени мұраға қосқан үлесіне баға берудің өзі оңай емес. Шығыстың «алтын шумақтары» саналатын Хайям рубаяттары болсын, көз қарықтырар сарайлардың мәрмәр күмбездері болсын, отбасылық тәрбиенің даналық қазынасы болсын, үлкендердің жас ұрпаққа өсиет еткен ғақлия сөздері болсын – мұның бәрі әлемдік мәдени мұраның жауһар жәдігерлері. Сонымен қатар, түркі әлемінің тұтастығына арқау болатын аса маңызды, әрі құнды нәрсе – оның руханилықтың «шатыры», имандылықтың күмбезі, бейбітшілік пен бауырластықтың шаңырағы болған Ислам жолын ұстануы. Туыстық қан, тарих пен ұлы дін байланыстыратын дәнекерден мықты дүние жоқ! Прогрессивті даму, экономикалық өркендеу, саяси тұрақтылық пен рухани сауығу жолында түркі елдерінің алдында сан алуан түрлі әрі аса күрделі міндеттер тұр. Мақала авторы бұл міндеттерді шешудің бір жолы түркі елдерінің экономикалық одағын құру деп біледі. Кіші Азия елінің бірі, осы одаққа басты қатысушының бірегейі саналатын, көпбағдарлы саясатты шебер ұштастырушы Түркия интеграциялық өзара қарым-қатынастардың дамуына оң әсер ете алатын, Еуропа мен Азия арасындағы көпір іспетті. Халықаралық қаржы орталығын және Азиялық ислам қаржыландыру орталығын құруға талпынған Орта Азия елі – Қазақстан үшін Түрік Республикасының тәжірибесін пайдаланып, онымен әріптестікте болу аса пайдалы. Осы мақала авторы өзінің бір жарияланымында Кеден одағының (КО) Түрік Республикасының енуі арқылы кеңеюі туралы жазғанын айта кету керек: «Түркия + ТО = Гармония» (2012 жылғы 26 қараша). Кеден одағының (КО) қазіргі қызметі жайлы тақырып – бұл одақты жақтаушылар мен оған қарсылардың ең сүйікті «тартыс» алаңына айналды. Соңғы тарап, өз кезегінде, жаңа сұрақтарды үсті-үстіне қоя отырып, тарсылдай жауған бұршақ сияқты «қарсы» аргументтермен атқылауын тоқтатар емес. Алайда, автор бұл мақалада аталған тақырыпқа қайта оралуды мақсат етпейді, өйткені, ол мәселе тәптіштеліп жазылған, ал, оны жаңаша бағытта баяндау уақыттың еншісінде. Авторға қолына қалам алдырған мақсат – бүгінгі күнге жеткен ілімді жан-жақты қайта толғанып, тоқи отырып, әлемдік тарихтың жаңа тарауына атау беруге, дүние жүзіне қоғамдық дамудың жаңа көрінісін, атап айтқанда, қоғамның шынайы руханилық пен имандылық арқылы гармониялық дамуын көрсетуге тырысу. Әңгіме дәстүрлі ислам дінінің гармониялық дамуға тигізетін әсері жайлы болмақ. Гармония бір-бірімен үйлеспейтіндей (дисгармония) көрінетін Тәуелсіздік пен интеграцияны бір-біріне залал келтірмейтіндей шеберлікпен қиюластырады. Гармония болуы үшін қоғам іргетасының берік қалануы, атап айтқанда, шынайы руханилық пен имандылықтың мықтылығы аса маңызды. Ал, үнемі қайталанып отыратын және соның салдарынан тереңдей түсіп, түптің түбінде халықтар мен олардың өркениеттерінің жойылып кетуіне алып келуі мүмкін дағдарыстар, қақтығыстар, зілзалалар дисгармонияның көрінісі болып табылады. Мұндай жағдайларға ықылым заманнан бүгінгі күнге жеткен адамзат тарихының іштен тынған парақтары куәгерлік етеді. Жаратушыға сенбеуден, моральдық азғындаушылықтан Жер бетінен жойылып кеткен Ад, Самуд, Гоморр және Содом және көптеген тағы басқа халықтарды, Фараондарды еске түсіріңіз. Біздің қазіргі дінге сенбейтін замандастарымыз шынайы өмір мәнін жоғалтып алған сияқты, олардың тек материалдық игіліктерді иеленуге, күйтшілдік, құмарлық, кірпияздық сезімдерін қанағаттандыруға ғана ұмтылатындықтарын аңғаратындаймыз. Мұның салдары моральдық азғындауға алып келетіні түсінікті. Адамдар мұндай жағдайға, біздің ойымызша, адасудың, білімсіздіктің, бейқамдықтың, зиянды дағдылар мен басқа да себептердің салдарынан душар болуда. Қазіргі адамзаттың сөздік қоры жаңа сөздермен – адамзаттың күнәһарлығы мен бәлеқорлығы туралы түсініктердің синонимдерімен толығуда. Зинақорлық пен айуандық, парақорлық пен жемқорлық, ашкөздік пен әдепсіздік ұғымдары жойылмай отыр. Міне, осы «дерттер», аяқтағы кісен сияқты, дамуға жасалған кез-келген ұмтылысты тежейді. Арбаны қапталымен сүйреуге болмайды ғой! Алар сабақ айқын – жеке адамнан бастап барша қоғамның дамуы жолын бүкіл нәрсенің түпқазығы болып табылатын шынайы руханилық пен имандылықтың негізінде гармонияға түсіру қажет. Бұл – ауқымды өзгерістер табалдырылығында тұрғандардың қолындағы таптырмас құрал, оларға қойылатын жаңа талап. Негізгі тірегі мәдени ортақтық қана емес, шынайы руханилық пен моральдық келбетті қалыптастыруға бейімділік болып табылатын интеграция күллі әлемдік қоғамдастықтың дамуына қуатты түрткі бола алады. Мысалы, біздің заманымыздың өзекті мәселелерінің бірі сыбайлас жемқорлықпен – қоғамның әлеуметтік «кеселімен» күрес болып отыр. Мұндай күресті тұтас интеграциялық бірлестік болып жүргізген оңайырақ. Өйткені, интеграцияға енген бір елдегі сыбайлас жемқорлыққа қарсы күресті күшейту бірыңғай экономикалық кеңістікке қатысушы екінші елдің ынта-жігерін тудырады. Өйткені сыбайлас жемқорлық қоғамға, оның экономикасына жасалған соққы деуге болады. Сыбайлас жемқорлық капиталдың жылыстауын күшейтеді, бизнес сыбайлас жемқорлардың қысымына ұшырауға тәуекел ете алмай, бір елден екінші елге көшеді. Егер бір елде сыбайлас жемқорлықпен күрес жемісті жүргізілсе, инвестиция мен бизнес өздеріне қолайлы, салықтары төмен, әкімшілік тосқауылдар жоқ сол елге қарай ұмтылады. Осындай жолмен интеграциялық бірлестік ішіндегі бір елдің демократиялық дамуы екінші елге оң әсер етеді. Кеден одағы туралы сөз болғанда, бұл одақтың әлемдегі жалғыз интеграциялық бірлестік емес екендігін атап өту керек. Дүние жүзінде мұндай бірлестіктер баршылық. Кеден одағына мүшелік Қазақстанның басқа өңірлік құрылымдарға енуіне кедергі бола алмайды. Бұл одақпен қатар, Түркиямен, мысалы, Өзбекстанмен, Қырғызстанмен, Түркіменстанмен және Тәжікстанмен (Ассоциациялық мүше ретінде) Экономикалық одақ неге құрмасқа?! Оны «Түркі елдерінің экономикалық одағы» деп атауға болады. Оларды біріктірудің ортақ негізі бар – генетикалық ортақтық, біртұтас ислам діні, тілдік туыстық, салт-дәстүрдің ұқсастығы (қонақжайлылық, жасы үлкенді сыйлау, өзгенің құндылықтарына деген толеранттылық және т.б.). Қазақстан Республикасының Президенті Н.Ә.Назарбаевтың жуырда жариялаған латын қарпіне көшу туралы бастамасы – туыстас халықтардың интеграциялануын дамытуға серпін беретін тағы бір фактор. Интеграцияланудың ортақ негізі – аса құнды рухани құндылық. Рухани құдылықсыз интеграциялық бірлестіктердің өмірі қысқа болып, тез ыдырауға бейім тұрады. Дәстүрлі ислам дінінің шоғырландырушы, топтастырушы мәні аса зор. Мұны елемеу – кешірілмес қателік. Мысалы, бірыңғай рухани негізі болмаған, оның үстіне, діннен ашықтан-ашық бас тартқан бұрынғы Кеңес одағын алайық. Жалаң атеизм ресми идеология болған бұл Одақтың ерте ме, кеш пе, жойылуы тиіс еді. Рухани негізі әлсіз, діни сенімнен ада бұл Одақ бар-жоғы 70 жылдан астам ғана «өмір сүрді». Қазіргі кезде біз перспективаларының айқындығы тұманды албион бұлыңғыр, неғайбыл күмән тудыратын Еуроодақтың да тұрақсыздығын көріп отырмыз. Көптеген халықтар мен өркениеттердің жер бетінен шынайы руханилықтың, Бір Жаратушыға деген сенімнің болмауынан жойылып кеткеніне тарих куә. Тарих пен қазіргі заманнан алар сабағымыз ақиқат – халықтар мен өркениеттер Гармонияның негізі саналатын шынайы руханилық пен имандылық болғанда ғана тұрақты дами алады. Керісінше, дисгармония халықтардың толыққанды бақытты өмір сүруін қамтамасыз ете алмайды. Оның алдағы өмірі қауіпті екендігі қасиетті Құран Кәрімнен белгілі. Шынайы руханилық қана елдер мен халықтардың оң әлеуметтік эволюциясының берік негізі қызметін атқарады, онсыз материалдық игіліктердің соңынан қуу тұйыққа апарып тірері хақ. Шығыс даналығы бойынша, әрбір өзеннің пайда болатын көзі болады. Сол сияқты көп экономикалық одақтардың көзі – материалдық құндылықтар, ал біз ұсынып отырған одақтың көзі – рухани құндылықтар. Елдердің экономикалық, демографиялық, демократиялық дамуы шынайы руханилық пен имандылық қағидаттарына негізделуі қажет. Мұндай дамуда гармония тұрақты болып, ұзақ уақытқа созылады. Әлеуметтік өсімді құрайтын бұл ұғымдардың біреуінің болмауынан даму жартыкеш, уақытша, дисгармония болады. Ал, шынайы руханилық пен имандылық қағидаттарынсыз, тарих көрсеткеніндей, тұңғиыққа батудан, кез-келген жүйенің ыдырауынан қашып құтылу мүмкін емес. Шынайы руханилық, имандылық болған жерде кез-келген мемлекеттің даму негіздерін үйлестіруге, тұрақты, ұзақ уақытқа созылған даму жолына түсіруге болады. Шынайы руханилық пен имандылық қағидаттары негізіндегі толық әлеуметтік гармония дегеніміз – Жаратушының рақымымен адамдар мен халықтардың екі дүниеде бақытты ғұмыр сүруі. Сондықтан да, гармония құтқарушы күш деп атаймыз! Бақытымызға орай, ислам әлемінің оңтайлы дамуға мүмкіндігі мол. Мұндай дамуға дәстүрлі ислам діні тірек болып отыр, қазіргі заманғы радикализм мен террордың оған қатысы жоқ. Шынайы руханилық пен имандылық қағидаттарына негізделген құтқарушы гармония тұжырымдамасының халқының басым көпшілігі (80%-ға дейін) ислам дінін ұстанатын Қазақстанда пайда болуы кездейсоқ жағдай емес екендігін баса айтуымыз керек.Бұл тұжырымдаманы ең алдымен басқа да барлық ислам елдерінің қолдануына болады. Оның әлемнің басқа мемлекеттерінде де болашағы зор. Бұл ойымызды ислам экономикалық моделі мен қаржысының әлемге таралуы айғақтайды. Қазақстанның Кеден одағына, басқа да интеграциялық құрылымдарға кіруімен байланысты барлық мүмкіндіктері, егер, олар толықтай пайдаланылмайтын болса, «пайдасыз зат» түрінде жүзеге асырылмаған күйде қалуы мүмкін. Бұл еліміздің дамуы үшін тұйыққа тірелумен бірдей болар еді. Бұлар жүзеге міндетті түрде асырылатын мүмкіндіктер болмағанымен, оларды пайдалану – әбден нақты іс. Бұл – еліміздің билік және басқару органдарының ерекше маңызды міндеті. Әсіресе, руханилықтың, оның интеграциялық процестердегі, атап айтқанда, экономиканы дамытудағы рөлін баса айтуымыз керек. Бұл ретте Қазақстанның орасан бәсекелестік артықшылығы даусыз. Гармониялық дамудың зор әлеуеті ислам экономикасы мен қаржысының қағидаттарынан тұрады. Нақты экономика саласының қаржылық көздері мен инвестициялау тетіктерінің ішінен, біздің зерттеулеріміз көрсеткеніндей, ислам инвестициясы және пайызсыз кредиттер айтарлықтай тиімді болып отыр. Ислам банктері коммерциялық қызметтермен қатар ақшаға мұқтаж клиенттерін өтемсіз қолдау қызметін атқаратындықтан, олардың кәсіпкерлердің серіктестері саналуы заңды. Жалпыадамзаттық құндылықтарға негізделген ислам қаржысы конфессиясы мен ұлтына қарамастан барлық тұрғындарға қолайлы. Бұл сөзімізді мұсылман тұрғындары 60%-ды құрайтын, ал, ислам банктерінің клиенттері мұсылман еместер де болатын Малайзияның тәжірибесі дәйектейді. Бұл банктердің басты өлшем-шарттары адалдық, өзара көмек қолын созуға даяр тұру, бизнестің әділеттілігі мен ашықтығы болып табылады. Ислам экономикасының мәні инвесторлар, банктер мен басқа да қаржылық институттар мен компаниялардың арасындағы өзара сенімділік деңгейінің жоғары болуында. Нақты сектор компаниялары үшін ол барынша гармонияда, тиімді және дәстүрлі банктермен бәсекелестік қатынаста болмайды. Исламдық қаржыландырудың түрлендірілген «инвестициялар + пайызсыз кредиттер» моделі дәстүрлі қаржылық құралдармен салыстырғанда, исламдық қысқамерзімді немесе ұзақмерзімді инвестициялардың бәсекеге қабілеттілігін арттыруға мүмкіндік береді. Олардан экономиканың нақты секторын және әлеуметтік саланы қаржыландырудың бірыңғай банктік кешенін қалыптастыруға болады. Ислам инвестициялары мен банкингті отандық инновациялармен біріктіру – халықты жұмыспен қамту, оның әл-ауқатын арттыру жолында білім беруді, ғылым мен бизнесті дамытуда ынта-жігер алу деген сөз. Инновациялық-инвестициялық жобалардың негізгі «генераторы» бизнес болып табылады, сондықтан, кәсіпкерлер жаңа экономикалық одақ ішінде ынтымақтасып, үшінші елдердің осыған ұқсас бизнес-қауымдастықтарымен сұхбатты жолға қоюы қажет. Жаңа одақтың қызметі таза экономикалық өлшемдермен ғана анықталады десек, бұл мәселені тым тар мағынада түсіну болар еді. Түркия Қазақстанмен және басқа да туыстас елдермен бірге бизнесті рухани сауықтырудың және сол арқылы біздің бүкіл өміріміз үшін үйлесімді экономика мен жалпы гармониялық қоғам құрудың бастамашысы бола алады, өйткені, бұл елдер – бизнесті жаңа сапаға трансформациялаудың алғышарттары бар елдер саналады. Біздің елдерімізде тарихи конфессиялық толеранттылық, сонымен қатар, адамдардың бір-біріне деген достық ықыласы, құрметтеу қасиеттері жоғары қойылады. Көптеген мемлекеттер әліге дейін дисгармониядан арыла алмай отырса, түркі елдерінің жаңа экономикалық одағында бизнес, алкоголь, темекі және есірткі өнімдерін өндіру сияқты бірқатар салаларды қоспағанда, экономикалық алыпсатарлықсыз, ойын бизнесінсіз, сыбайлас жемқорлықсыз, басқыншылық мақсатта қолданылатын әскери қару-жарақ және адам денсаулығы мен қоршаған ортаға зиянды өнімдер өндірісінсіз, таза, адал, әділетті қызметке айнала алады. Бұл жаңа Одаққа табиғи, материалдық және ақша ресурстарын барынша үнемдеуге, адам өмірінің салауатты салтын нығайтуға мүмкіндік береді. Ислам экономикасы мен қаржысының қағидаттарын қолдану бизнес пен бүкіл қоғамды рухани сауықтыруға алып келетін тәсілдің өзі саналады. Мұндай прогрессивті құбылыстың шегі болмайды, ол интеграциялық бірлестіктің бүкіл аумағына біртіндеп таралатын болады. Гармония салтанат құрған жерде кемсітушілік қатынастар, «кіші мен үлкен» деген ұғым болмайды, онда теңдей әріптестік үстемдік құрады. Гармонияға қаншалықты тез ұмтылған сайын, біздің елдеріміздің өз егемендіктерін қорғауы жақсара түседі, оның үстіне, бүкіл еуропалық кеңістікте рухани-адамгершілік өсу миссиясын таратушыға айналады. Менің әріптестерім баспасөзде атап көрсеткеніндей, 2014 жыл қазақстандық ғылымның көрнекті жетістіктерімен әйгілі болды: бұрын белгісіз болған «Әлеуметтік-экономикалық гармония заңы» ашылды. Ресей жаратылыстану ғылымдары академиясы мен Халықаралық ғылыми жаңалықтар мен өнер табыстары авторлары академиясы (Мәскеу қаласы) бұл Жаңалықты мойындап, осы мақала авторына Диплом тапсырды. Әлемнің дуальдылығы – Гармония әлемі мен дисгармония әлемінің болатындығы дәлелденді. Бұл әлемдердің әрқайсысының өзіне тән экономикалық заңдылықтары, құндылықтық бағдарлары болады. Мысалы, гармонияның негізгі заңы «рухани қажеттіліктер ақылға қонымды материалдық мұқтаждықтар мен жеке адамдардың ниеттерінен жоғары тұрады» дегенді білдіреді. Менің әріптестерімнің пікірі бойынша, бұл тамаша Заң Ислам доктринасы негізінде Қазақстанда ашылғанымен, оның жалпыәлемдік мәні орасан зор. Ол Жер ғаламшарының миллиардтаған тұрғындарының өмір сүру салтын реттейді, мемлекеттердің гармония дамуына алып келеді, өркениетімізді құлдыраудан сақтауға жәрдемдеседі. Гармония мәселелері қазақ, орыс және ағылшын тілдерінде (АҚШ) жарық көрген «Harmony of Economy and Society: the Paradigm ofD + 3D, laws, and problems» атты кітапта егжей-тегжейлі баяндалды. Гармония формуласы қарапайым: «D+3D», бұл үйлесімді демоэкономикалық (яғни, әлеуметтік-экономикалық) даму үшін әлеуметтік эволюцияның 3 құраушысы да – демократия, демография және демоэтика (руханилық пен имандылық) осылай дамуы қажет дегенді білдіреді. Мұндағы демоэтика әлеуметтік Гармонияның міндетті түрдегі негізі болып табылады. Гармонияның басқа әр түрлі ұғымдары әдебиетте кездеседі. Солардан ажырату үшін біз Гармония деген сөзді үлкен әріппен жазамыз және оны басқа тілдерге аудармаймыз. Гармония барлық нәрседе әлеуметтік әділеттілік пен ынсаптылық, адалдық, ашықтық, серіктестік сияқты қағидаттар негізінде құрылады. Гармония қасиетті Құран Кәрімнің халал (рұқсат етілген әрекет немесе зат) және харам(тыйым салынған әрекет немесе зат) туралы қағидаларын барынша бұлжытпай ұстанады. Бұл, сайып келгенде, экономиканы халықтардың шынайы руханилық пен имандылық деңгейін есепке ала отырып бағалағандағы жоғары бәсекеге қабілеттілігін қамтамасыз етеді. Оның өмірді гүлдендіретін ғаламат күші де, гауһар тас сияқты жарқырап тұратын әдемілігі де осында! Рухани негіздегі әлеуметтік гармония идеясын әлем барған сайын ұғына түсіп, қолдау көрсетуде. Осы жолдар авторын қоса есептегенде, 57 елден 500 жеке мүшені және Қазақстанды қоса алғанда, 80-нен астам елден 1 000 000-нан аса ұжымдық мүшені біріктіретін халықаралық үкіметтік емес ұйым – «Жаһандық Гармония одағы» (ЖГО) құрылды. Біздің елімізде де «ЖГО – Қазақстан» деп аталатын үкіметтік емес ұйым тіркелді. Түркі әлемінің қалған басқа да елдерінде осындай ұйым құру өте-мөте қажет-ақ. ЖГО миссиясы – әлемді гармониямен қамтамасыз ету және гармониялық білім беру арқылы ғылыми негізде гармониялық өркениетке жол салу. ЖГО – XXI ғасырдағы халықаралық бейбіт қозғалыс – ядролық қару қолдана отырып, үшінші дүниежүзілік соғысқа ұласу қаупін тудыратын түрлі қақтығыстардың туындау қатеріне қарсы жаһандық оң балама. Қазіргі кезде әлемге төніп тұрған қауіп аз емес. Біздің жаңа одағымыз осы қатерлерге жауап бере алады және әлеуметтік гармонияға бағытталған қозғалыс кезінде халықтардың бірігуінің, елдіктің және туыстықтың шамшырағына айналуға қауқарлы. Осы жолдардың авторы бұқаралық ақпарат құралдарында«Манифест гармоничного сознания. Кризисы, катаклизмы и конфликты: как преодолеть разрушительную синергию трех «К»» деген мақаласын жариялаудың сәті түсті. Бұл жарияланым елімізде де, шет елдерде де қызығушылық тудырып, «Перед лицом угрозы третьей мировой войны. Мир и разоружение из Гармонии»атты халықаралық жобаның мазмұнына енді. Біздің ЖГО мақұлдаған ұранымыз әрі үмітіміз – «Гармония әлемді сақтайды!» Алла тағала бәріміздің игілікті істерімізді қабыл етсін!
932 рет
көрсетілді0
пікір