- Еркін ой мінбері
- 09 Сәуір, 2014
ТАҒЫ ДА СОЛ ЖЕЛАУЫЗ ЖИРИНОВСКИЙ
Аманхан ӘЛІМҰЛЫ
Соңғы кездері Ресей мен Қазақстан Бұқаралық Ақпарат құралдарындағы Ресей думасының вице-спикері ЛДПР саяси партиясының төрағасы Владимир Жириновский мен әлдеқандай бір жазушысымақ (шығармасын білген соң осылай айтып отырмыз – Ә.А.) Эдуард Лимоновтың қазақтар мен Қазақстан туралы айтқан сөздері бұл күндері қазақ қоғамын қатты сілкіндіріп отыр. Жарайды, Лимоновты аузы жеңіл, сөзі мен ісі арасында тұрақтылық жоқ, ұшарын жел біліп, қонарын сай біліп жүрген жазушы сымақ дейік-ақ, ал, енді, Ресей сияқты алып мемлекеттің думасының депутаты Владимир Жириновский жайында не айтуға болады?
Ол кейбір дуалы ауыздардың айтуынша қоғам қайраткері, мемлекет жанашыры сияқты көрінеді. Біз осы бір сөздерге сенер едік-ау, өкініштісі, ол мырзаның Қазақстан, тіпті, Украина туралы айтып, жазған сөздерін оқып біле отырып, оған қоса естігенде жоғарыдағы айтылған сөздердің бірде-біреуіне сеңгің келмейді. Өйткені, ол сендіре алмайды. Сендіре алмайтыны, оның кезінде «Қазақтарда жазу болмаған, олардың дамыған тілі де жоқ» деген ешқандай да ғылымға, тарихи негізге иек артпаған сөзін естіп, білгенде жағамызды ұстаған едік. Енді, оның 20-шы ақпан күнгі «Отан қорғаушылар күніне» арналған шеруде: «...Город «Верный» – мой любимый город, который переименовали в черт знает что – Алмату, должен быть центром Среднеазиатского Федерального округа, в который войдут Казахстан, Узбекистан, Киргизия и т.д., Украину – в девятый федеральный округ с центром Харьков...» – деген сөзін естіп, шынында да, егер де, Ресейдің мемлекеттік думасында осындай адамдар отырып, олар жоғарыдағыдай жауапсыз сөздерді айтатын болса, онда Ресейдің болашағы да солар секілді жауапкершіліксіздіктің көрінісі болып қалмайды ма деп те ойланасың.
Жалпы, Владимир Жириновский өзінің іс-әрекеті мен әрбір сөйлеген сөзіне жауап бермейтін желбастық пен желауыздыққа әуес басбұзар саясаткер ретінде танылып, елбұзарлық негізде күн кешіп жүргенін көргенде еріксіз таңқаласың. Бұл мақаланы Ресей мемлекеттік думасының әр отырысының шырқын өзінің айқай-шуы, бас бұзар іс-әрекеті, даукеспе іліп-қақпаларымен бұзып отыратын Владимир Жириновскийдің кезекті бір сандырағы деп жазбай-ақ қоюға болар еді. Оның үстіне «Ит үреді, керуен көшедіге» сайдыра салсақ, ештеңеміз де кетпейтін. Бірақ, соның бәріне қарамай біз азамат, әрі журналист ретінде олай ете алмадық. Олай етпейтін де едік. Оның себебі, оның жоғарыдағы айтып, жазған пікір-тұжырымдарымен бірге, жақында мәскеулік әріптес достарымыздың қолымызға тигізген В.Жириновскийдің «Последний бросок на Юг» кітабы. Бұл «еңбек» немқұрайлы қарауды, сондай-ақ, үндемей қалуды көтермейді. Аталған жинақ алғаш рет 1993 жылы ақпан айында жарық көріп, екінші басылымды бастан кешіріп отыр. Яғни, бұл аталған кітапқа, кітаптағы идея мен идеологиялық ой-тұжырымға, автор ұсынған бағыт-бағдарға ресейде қызығушылар көп деген сөз. Оның үстіне Владимир вольфович көтеріп отырған саяси-қоғамдық мәселеге жинақтың аңдатпасында «книга сразу стала политическим бестселлером и в то же время политической классикой» деп баға беріледі. Оған алғысөз жазған белгілі профессор, тарих ғылымының докторы В.Александров «В ней Жириновский выступает не только как политик-провидец, но и как крупный ученый-геополитик» деп владимир вольфовичке көпшік қоя келе, «..но жириновский остается тем ученым-политиком, который дал мощный толчок исследованиям в сфере геополитики в нашей стране, да и за ее пределами» десе, онда шын мағынасында да Жириновскийдің аталған еңбегіндегі Ресейге ұсынылып отырған бағдарламалық-бағыттық ұстанымына ешқашан да, ешуақытта да немқұрайлы қарауға болмайды екен. сосын, кез келген кітап, әсіресе, ол саяси мән-мағынасы бар жинақ болмаса екі рет қайта басылымға ие бола бермейтіні бесенеден белгілі жай. Бұл тұрғыдан келгенде В.Жириновскийдің аталған кітабы ресейлік кейбір отарлау саясатынан әлі де арыла қоймаған саясаткерлердің ойынан шығып отырғандығын ерекше тілге тиек етуге тиіспіз.
Өйткені, Алланың өзі «сақтансаң сақтаймын» дейді. Оның үстіне өзін патриот санайтын кез келген азаматтың іргеміздегі Қытайдан бастап, Ресейге дейінгі аралықтағы саяси-аймақтық мәселелерде айрықша сергектік танытуы, оның отаншылдық-жершілдік, мемлекетшілдік-ұлтшылдық сезімі мен намысын қайрап отыратыны тағы да анық. Бұны айтып отырған себебіміз, аталған кітапта Жириновский мырза өзінің отарлаушы бағыт-бағдарды ұстанған мысық тілеу шовинист іс-әрекетін насихаттайтын үндеу-ұранында: «...России терять нечего. Это ее последний рубеж. Она должна преодолеть его – или погибнуть. Как когда-то наши солдаты под Сталинградом говорили: велика россия, а отступать некуда – позади Волга. И сегодня я говорю вам, русские: «Велика Россия, но мы должны спуститься вниз, на Юг, к Индийскому океану, иначе мы не спасем наше отечество, нашу Россию», – дейді. Әрине, бұл ниет-құлық, түзу, айналасына көз алартпайтын, отарлаушылық саясаттан ада сөз болса, оны құптап, қуаттауға болар еді. Өкінішке орай, олай емес. Оның астарында оңтүстік бағыт-бағдардағы ел-жұртты, аймақ-ауылдарды баса-көктей өтіп, яғни, оларды отарына айналдыра келе орыс солдаты «смоет свои сапоги в Индийском океане» деген идея ниетті алға тарту. жириновский мырза осы бір еңбегінің болашақта ұлттық құндылыққа айналып, өзі алға тартып отырған идея мен идеологияның болашақта орындалатынына көзі жететіндігі соншалықты, ол «Меня поймут и по-настояшему оценят мои предвидения лет через 20-30, в общем то в XXI веке, также, как и прогнозы Бисмарка о необходимости для Германии избежать войны с Россией оценили гораздо позже, чем он их высказал» дейді. Өздеріңіз білсеңіздер, құрметті оқырман, мұндай асқақтық пен астамдық бір кезде фашизмнің негізін қалаушы гитлерге ғана тән қасиет емес пе еді. Бұдан шығатын қорытынды, Жириновскийдің бұл кітабы болашақ орыс ұрпағына қалдырар бірден-бір жоспарлы еңбегі екендігі. Ал, бізге келсек, осыдан кейін ЛДПР-дің төрағасы, философия ғылымының докторы, құқыққорғау және қорғаныс, қауіпсіздік академиясының академигі, профессор, Әлеуметтік ғылымдар академиясының академигі, Ресей Федерациясына еңбегі сіңген заңгер владимир Вольфовичтің аталған еңбегіне немқұрайлы қарауға құқығымыз да, азаматтық көзқарасымыз да жол бермеуі керек.
Жириновский мырза аталған кітабында өркениеттің қашанда Оңтүстіктен басталғанын тілге тиек ете келе, оның, яғни, оңтүстіктің Ресейдің саяси-қоғамдық өмірі мен геосаяси тыныс-тіршілігінде ерекше орын алуы керектігін баса көрсетеді. Сөйтеді де, автор ол туралы «Ведь, когда другие партии ведут речь о том, чтобы отрезать Казахстан, Киргизию, Среднюю Азию, они не понимают, что мы задвигаем Россию в тундру, где могут быть только минеральные ресурсы, где человек не может жить и развиваться» дей келіп, өз партиясының ресейдегі басқа партияларға қарағандағы шовинистік ниет-құлқын анық білдіреді. Аталған кітаптың қауіп-қатерлігі де сонда. Әрине, бұған қарап біздің бүкіл ресейліктердің, тіпті саяси қайраткерлердің ой-тұжырымдары сондай деп қабылдауға ешқандай да негіз-ниетіміз жоқ. Бірақ, ойланып-толғануға құқымыз бар...
Бір қызығы, Владимир Вольфович кей-кейде аталған кітабында өзінің жоспарлы ниет-құлқына, тілге тиек етіп отырған аргументтері мен логикасына қарама-қайшы пікір айтады. Олай болмаса ол «...разве не так же страшны политические стихии, искусственно создаваемые определенными политическими силами, которые хотят самовыразиться таким образом? радикалы, левые и правые, хотят коренным образом что-то изменить забывая, что человеческому природу нельзя резко изменить. поэтому любые радикальные элементы, любые экстремисты наносят огромный вред человечеству» дей келіп, «Гитлер был экстремистом, Бонопарт – экстремистом, даже Петр 1 в чем-то был экстремист» демес еді ғой. сонда Оңтүстікке ең соңғы жорықты бастауды жоспарлап, оған бағыт-бағдар беріп отырған өзі кім?! владимир вольфович осы туралы бір сәт ойланып көрді ме екен? Әрине, ойланған емес, ойланбайды да. Әйтпеген жағдайда, бұл ел арасын арандатудан туған экстремистік пиғыл-ниет екендігінде еш дау болмаса керек. Аталған кітабының өн бойында өзі сол бағыт-бағдардағы жоспарды ұсына отырып, оның соншалықты өзгеге айып тағып, оларды аты-жөндерін айтып айдарлай көрсететінін қайтерсің.
Жалпы, Владимир Вольфовичтің көңіл көзінің ауқымы кең де, қиялы ұшқыр. Егер, олай болмаса о мырза «Казахстан, киргизия автоматически включаются в состав России, а таджикистан и восточный Узбекистан – можно судьбу этих народов решить позже. На Западный Узбекистан, Каракалпакия тянутся к россии, и Туркмения – все это в состав России. Эти границы должны быть прочные, неизменные» демеген болар еді. Міне, осы бір пиғыл-ниеттің өзінен-ақ жириновский мырза сияқты азуын айға білеген кейбір орыс саясаткерлерінің көздеген мақсат-мұраттарын сезінуге болмай ма. Ол енді бірде өз отанының 22 миллион шаршы шақырымды алып жатқанын тілге тиек ете келе, сол аймақты қамтамасыз ететін тұрғылықты жұртшылықтың негізгі көпшілігін Оңтүстікке карай ығыстыруды ұсынады. Онын ішінде: «...южные регионы россии, бывший казахстан, талды-Курган, Верный, фрунзе, душанбе и дальше в сторону индийского океана» бар. Міне, осы жерлердің бәрін игерген кезде, оның айтуынша «русский язык автоматически станет господствующим» болады екен. Осы бір жолдарды оқығанда менің «Өз туған жер, өсіп-өнген елінде бағы ашылмаған Тілімайлаған» жан дауысым көңілімді қаузап, көкірегіме өксік үйірді. Жөн-жосығы жоқ мұндай ұлы арман, кең көлемдегі мақсат-мұрат жириновский секілділердің басына тегін ұялап, тіліне бекерге оралмайды ғой. Орыс тілінің қаншалықты қанат жайып, қазақ тілінің қалтарыста қалып, кілең екінші сортты тіл ретінде айналымға түспей келе жатқаны да сол «господствующий» тілдің ықпалынан емес пе? Жоғарыдағыдай мысық тілеуді оқып отырып таң қалмасқа ешқандай да амалың жоқ. Енді бірде, ол өзін мысалға келтіру арқылы бүкіл орыс халқына төмендегідей ой айтады: «Вот я, например, жил по всей стране. А если бы я жил в одном только городе, в Алма-ате, я больше с экономил бы. У меня был бы садик там, была бы уже квартира, знакомые. А я всю страну перебороздил, а сколько мне приходилось начинать с нуля, сколько потратить сил, энергии, средств. Поэтому если бы мы оставались на своих местах и действовали локально, в пространстве, которое нас окружает, которое нам близко, у нас были бы лучшие условия жизни. И к этому стремятся все народы. поэтому идея «последнего броска на Юг» – благородна, она несет с собой только положительное».
Жириновскийдің айтып, жазуынша бүкіл Оңтүстікті алғаннан кейін олар, яғни, орыстар ондағы бүкіл халыққа тең жағдай жасап, оларды ұшпаққа шығарады-мыс. Ал, әрбір тұрғын өзінің қай ұлтқа жататынын анықтайтын құқыққа ие болатын көрінеді. Соған қарамай ол: «Но в паспортах не будет графы «национальность», в анкетах не будет этой графы», – дей келіп, өзінің екі жүзді пиғылын анық танытып алады. Байқайсыздар ма, осынау идея біздің Қазақстандағы кейбір «қазақстандық ұлт» деген идеяны алға тартушылардың көксеген мақсат-мұраттарымен астасып жатқан жоқ па? Енді, бірде ол «Итак, гражданское общество. Итак, планетарное мышление» дейді. Не деген қыздырма қызыл сөз. Айтпақшы, мұндай тұжырым-түйінді Олжас Сүлейменовтың әртүрлі, әр саладағы пікір-ой, жазбаларынан да кездестірген екенбіз ғой. Бұл өмірлік-қоғамдық, ұлттық-мемлекеттік негізден ада утопист-нигилист интеллигенцияға тән ниет-құлықтың көрінісі емес пе? солай. Әйтпесе, ғаламдық сана-сезім, ой-жүйе (планетарное мышление) жалпы көпшілік ұлтқа не халыққа тән қасиет емес, ол жеке тұлғаларға ғана лайықты қадір-қасиеттегі құндылық. Мұндай елден ерекше бітім тек қана генилерде ғана болады. сонымен айтарымыз, жоғарыдағы тұжырым-пікірлерді айтқан Жириновскийдің Қазақстанда да әріптестері әрі мұраттастары бар екен. Сонымен бірге, ол өзінің үлкен ұлт өкілі екендігін жан-жақты дәлелдей келіп, «Юг надо освободить от этой заразы – национализма, шовинизма малой нации по отношению к соседней большой» дейді. Бұл аз ұлттарды жұтып қоятын жайын құлықты орыс шовинизмін алға тартатын дугин насихатындағы Еуразия идеясының ұшқыны емес пе? сосын, автордың ойынша аз ұлттарда намыс, өзін-өзі құрметтейтін қадір-қасиет болмай, үлкен де көп ұлттардың құлақ кесті құлы болуға тиіс секілді. Ол оны айтып, ойлап қана қоймайды, батыл іс-әрекеттер арқылы орыс жұртшылығын өзі тілге тиек еткен бағыт-бағдарламаны орындауға шақырады. Мұнда отарлаушылық озбыр ойдың салқыны жатқан жоқ па? Әрине, солай. Міне, көрдіңіздер ме, тәуелсіздік алып, егемен ел атанғандағы біздің елімізге еніп жатқан отаршылдық бағыт-бағдардағы идея мен идеологиялардың бір-бірімен тығыз байланыста екендіктері осыдан-ақ байқалмай ма? Ал, біз болсақ алды-артымызға қарамай қиял-ғажайып, нигилистік-космополиттік «қазақстандық ұлт», «жалпы азаматтық құндылық», «ғаламдық ой-жүйе, сана-сезім» секілді ұлттық қадір-қасиетті кетіріп, ұлттық мемлекетімізге нұқсан келтіретін идеялар мен идеологияларға толы ой-жүйелеріміз, тұрмыс-салттарымыздай насихаттаймыз. Оны айтасыз, о мырза со кітабында: «...Россия поднимется, обогатиться, создаст мощную армию на юге россии, в районе города верного (ныне Алма-Ата). Южные границы россии будут пролегать здесь. Вот это скопление, присутствие русских войск будет давить на среднеазиатский регион», – дейді. Осы бір жолдарды оқып отырып менің есіме еріксіз америка әскери базасының Қырғызстандағы «Манас» аэродромына орналасуы мен алып қашты әңгіме ретінде айтылып, кейін сиырқұйымшақтанып кеткен, енді АҚШ әскери базасы Қазақстанда да болады екен деген қауесет түседі. Бұл да со жириновский сандырағының салқыны ма деп те қаласың.
Құрметті оқырман, біз Владимир Вольфович Жириновскийдің «Последный бросок на Юг» атты жинағын тілге тиек ете отырып айтарымыз, қандай да бір саяси-қоғамдық өмірдегі етек алған жайларға мейлінше сақтықпен қарағанымыз жөн және оны кім көрінгеннің айтқаны ғой, «соған да назар аударамыз ба?» деген немқұрайлылықтан барынша арылуға тиіспіз. Егер, Жириновскийдің «Последный бросок на Юг» кітабы екі қайтара жарық көріп, бүкіл Ресейді қосып, ТМД елдеріндегі азаматтардан қызығушылық қолдауын тауып жатса, онда осы бір желбас деуге келерлік мемлекеттік дума депутатының жазғандарына барынша жауапкершілікпен қараған жөн екен. Қазақ «ойыннан от шығады» немесе «жындының айтқаны емес, сандырағы келеді» дейді. Осы бір қанатты қағиданың астарында азғантайда болса ақиқат барлығына еш шүбәланбауымыз керек. Мәселеге осы тұрғыдан келгенде «Последный бросок на Юг» кітабы – әлемдегі ең қатерлі де қауіпті кітап. Аталған жинақты оқып отырып менің есіме Гитлердің «Майн кампф» кітабы еріксіз түсті. Оны да кезінде ешкім елеп-ескермей, оның Германия жастарына тигізер ыкпалының қаншалықты екенін талғап-таразылаған жан болмаған. Міне, соның салдарынан өмірге фашизм келген еді. Сондықтан да, біз кез келген саяси-қоғамдық рөл атқаруға негізделген идея мен идеологияны насихаттайтын «последный бросок на Юг» сияқты кітаптарға немқұрайлы қарамауымыз керек. Оны зерттеп-зерделеп, мүмкіндігінше оның үлкен геосаясаттағы орнын айқындап, зиянды жақтарын әшкерелеп отыруға тиіспіз.
361 рет
көрсетілді2
пікір