- Ұлттану
- 06 Қаңтар, 2014
Талғам мен таным таразысы (Әдеби сын - эссе)
Ең бастысы әдеби орта болса
немесе Тәкен тағылымы
Баяғыдан қалыптасқан әдетіміз әлі де сол қалпында. Анау-мынау ұрыс-керіске бергісіз қызу пікір талас кейде мойын тамырлар білеуленіп, шеке таспалары шодырайғанша толас таппайтын. Алдында әдемі әдебиет кештерінен басталған сыр-сұхбат айлар өте айбарланып, салихалы ізденістерге ұласып, құныға-құныға кітаптар ақтарып кететінбіз. Басшымыз да бастаушымыз да ақын Бәтимә Батырбекова болатын. Ол бізге әдебиеттен сабақ берген. Келе-келе бұрынғы талпыншақ шәкірттері тырнағы өскен тірнек қыраннан топшысы бекіген мұзбалаққа айналып тұғырын тастап, шырқау биікке самғап кетер хәлге жетті. Бұдан әрі ұстаздың өзі шәкіртке айналып, талантты түлектердің қарым-қауқары, ой-өрісі, біртін-біртін өз заманының ортақ зердесі деңгейіне жетіп, кейде тасып төгіліп сапыру бермей буырқанып қайнап жатқанына тәнті болатын. Енді, ақын қыз өзі де ширығып, жазғандары мен жазар өлеңдерін әбден иі қанып, көңілінен шыққандары болмаса, бірлі жарым олпы солпылау дегендерін жалаулата бермей, қымтай бастаған. Мыналардың беті жаман. Олардың ондайлығын шығып жатқан кітаптарды талқылап, жүндей түтіп, ұнамды-ұнамсызын, тақырыбы мен тілін, баяндау, уақиғаны өрбіту машығы – түптеп келгенде автор мен кітаптың жетер мәресі мен шырқау биік арман-аңсарын алақандарына салғандай ғып жіліктеп тастайтыны сұмдық. Сонда, олар кітаптан кемшілік іздеп, сынап-мінеуді мақсат етпейді, өздерінің алып ұшқан асау көңілдеріне қанат бітірер қасиетті Музаны іздеп, сөздер мен сөйлемдерден тұшымды тың өрнектер, әсерлі бояулар күтетін.
Топ басшысы Төлеген Тоқбергенов. Мұның стихиясы – сыншы В.Белинский, Әуезов пен Шолоховты пір тұтады. Онан соң Мырзабек Атенов, Жанғали Меймандосов. Арасында біз де бармыз. Бұлардың бәрі де өлең жазады. Түбітиек бозбалалық шақ өтіп, қылшық мұртымыз тебіндей бастаған. Бір жазда Мәскеуден ауылға Тәкен Әлімқүлов келді. Жанында қосағы Эмма бар. Екеуі аппақ боп, жеңіл киінген. Қос аққудай боп қатар жүріп Шолаққорғанның шығыс жағындағы Өрқақпаның түбіндегі Бибі Майрам бұлағына келіп тамсана дәмін алып, ұзақ су ішті. Бізге бәрі таңсық. Жүргені, тұрғаны, сөйлеген сөзі, тамақ талғағаны бәр-бәрісі. Мырзабектің үйіне түсіп, сол кезде ауыл кеңестің төрағасы болып істейтін Әтенов Мелдекеңе ат тауып беріңіз, біраз сергіп, серуендеп қайтайық деп қолқа салған. Ал, мына кітапшыл топқа ол кісінің әңгіме айтқаны қызықты. Көбіне үндемейтін адам, енді кілең жас жігіттер айнала қоршап алған соң көсіліп бір кететін шағы болатын. Көбіне Абайдан бастап, орыс әдебиетіне, одан Еуропаны аралап, А.Пушкинге келіп тірелетін. Ол кезде Пушкиннің туғанына 150 жыл толып, оның қазақ тілінде қалың кітабы шыққан кез. Сол кітаптағы Тәкен аударған бірнеше өлеңдер бар. Төлеген мен Мырзабек сол аудармаларды дауыстап жатқа оқып берді. Мақам басқа, өздері көп оқыған қиссалардан, он бір буынды қара өлеңге келмейді. Біртүрлі жаңаша ырғақ, екпіндетіп, қолды сермеп оқығанды қалайтындай. Жастарды осы жаңа леп қызықтырады.
Құшады мұнар, ышқынып теңіз,
Жағаға шыға келеді ойнап.
Толқынға төніп шыңда тұр бір қыз,
Аққудай түнгі қанатын қомдап.
Жарқ та жұрқ етіп қанаты жалын,
От нажағай тартады қызды.
Ұшырып қыздың орамал шәлін,
Ұйтқиды дауыл теңселтіп құзды.
Бозғылт бір тартып, жылтылдар
аспан,
Тұманда сұрғылт тамаша теңіз!
Дауыл, көк толқын, бәрінен асқан,
Емес пе ғажап шыңдағы сол қыз!
«Құшады мұнар..» деп аздап пауза сақтап, одан әрі әр сөзді мәнерлеп, өздері өмірі көрмеген, бірақ, өлеңнен танып тұрған теңіз тынысын сезгендей.
– Бәрекелді! Әдебиетке бет қойғандарың жақсы екен!
Онан кейін жазушы ағамыз ұзақ-ұзақ әлем әдебиетінің классиктері жайлы әңгімелер, ән жалғастырып кететін. «Жас кезде оқығанның пайдасы көп, біріншіден уақыттан ұтасыңдар, ойынның есебінен, екіншіден осы кезде оқығандарың ойда ұзақ сақталады. Ал, сендер оның үстіне оқығандарыңды ортаға салып талқылайды екенсіңдер, бұдан өте жақсы талғам қалыптасады».
Қазақ ақындарынан Қасым Аманжоловты, Қуандық Шаңғытбаевты, ерекше бөліп айтатын. Ғали, Мұзафар, Тақауи, Қалижан ақындардың аударма жасаудағы ізденімпаздықтарына тәнті екендігін жасырмады.
– Аударма жасау кісіні, ақынды дегенім ғой, қатты өсіреді. Сендер кітап оқумен қатар айналаны мұқият зерттеп, зерделеуге мән беріңдер. Қандай шөп өседі. Мысалы қырғыз ақыны Молдақылыштың «Шу баяны» дастанында тізбектелетін өсімдік атауларына ғалымдар таң қалған. Жусан мен бетегеден басқаны білмейтін жазушы төл туындысында табиғаттың нендей өрнегін жасамақ. Оқушыны осымен де ынтықтыруға болады. Төрт түлік малдың атаулары ше? Білетіндер түйенің жүз атауы бар дейді. Қыран құстар ше? Олар сұңқар, жағалтай, күйкентай, тұрымтай, қырғи, тұнжыр, тұйғын, лашын, қаршыға, ителгі, бидайық, самұрық болып кете береді. Қара бүркіт, көк бүркіт, сары бүркіт болса, бұлардың әр қалай мінез, ерекшеліктері бар. Тау қыраны, түз қыраны құм қыраны дегендей... бұлардың да айырмашылықтары бар. Оқу бар да, ой өрісті кеңейту бар. Қазақ әдебиетінің майталманы М. Әуезов Еуропалық әдебиетте Виктор Гюгоға ерекше ден қояды. Оның «Абай жолы» романының ұзын ырғасында бейне жүйесінде, сөйлем ырғағында, иә, иә, балалар, прозалық шығармаларда да сөйлем ырғағы болады, міне сонда романтизмнің бой көрсетуі тегін емес. Мен М.Әуезовтың кең тынысын, зор серпінін ұнатамын – деген.
Ағаның дәрісінен кейін бұлар мүлдем құтырып кетті. Өз ойларының тым қарабайыр емес екендігіне көз жеткізгендік, жазушы ағаның батаға бергісіз «бәрекелді»-сі оларға қанат бітіргендей еді. Кейінірек бұл ортаны бала Асқар (Сүлейменов) жағалап жүрді. Бірақ, ол әлгіндей әңгімелерге араласқан жоқ. Көбіне сырт көз, бақылаушы есепті, қызығушы, тыңдаушы қалпында жүрді.
– Жазушы ең алдымен мәдениетті, аса білімді болу керек – деген еді – Тәкен аға. Онан соң бой күту, өзіңді өзің ұстай білу. Бұл – сыртқы көрініс, одан сөйлеу мәдениеті, ішкі мәдениет деген аса маңызды, бұдан ойға берілу, қиялға да ерік берген жөн. Жаңа сендер Пушкинді оқығанда тәп-тәуір өнер көрсеттіңдер. Оны қайдан үйреніп жүрсіңдер?
– Радиодан, кинолардан...
– Ираклий Андронниковтан.
Тәкен аға қалың қастарын кербез керіп таңданып қалған.Әсерленген шақтарында есі есіп әлем жазушылары, олардың романдары жайлы әңгіме айтады.Міндетті түрде оқу керек деп Гюгоны, Флоберді, Бальзакты, Вальтер Скотты,Толстойдың «Война и мирін», Әуезовтың барлық жазғанын қалт жібермей оқып отыруды ұсынатын.Кейін біз қызмет істеп жүрген кездерде әлгі Созақтың Бердяевына алып бар деп Сапарбек інісіне тапсырма беретін.Ол кім еді десе,өй саған не болған Әлгі кім еді, е е, Дулатты айтам, сол балада білім бар. Айтпақшы Чех сырасынан біраз әкеп таста дейтін.
Алғашқы келгенде бәрімізді әуес көріп, орыс жеңгеміз көздері күлімдеп, жоқ оттай жанып, әрқайсымызға кезек қарап таң қалып, аузы ашылып қалған. Ұзақ-ұзақ жүрістерден шаң жұтып аңызақ қауып тау асып әзер жеткен бір қиырда қара домалақ жасөспірімдер Пушкинді жатқа айтып тұрғанына мүлде сенетіндей емес. Сонада, елге барып қайтайық дегенде қуана мақұлдаған еді. Еділден өтіп Ақтөбеге жеткенде пойыз терезесінен ұзақ қарап неткен ұшы-қиыры жоқ шексіз дала деп жалыға бастағанын айтып жатыр. Одан Арал, Шалқар, Қызылорда..
– Әй, Тять! Сенің елің өзі СССР- ға жата ма, өзі? – деп әзілдеген.
– Күте тұр, Ұлылықтың, кеңдіктің не екенін сезесің әлі.
Енді, міне, өзі таңдаған қосағының неге жазушы болып кеткенін, керемет ақындығын Мәскеудегі небір сұңғыла білгіштер зор бағалағанда жаңылмаған екен. «Ақынды туған жерінен таны деп пе еді Гёте. Мына жігіттер ше! Жанып тұр ғой, жанып тұр. Қандай таза өздері» – деп түйген.
Көзқарақты оқушылардың есінде болар, (біз алға озып кеттік-ау, осы) кейін бұлардың қай-қайсысы болсын аға жазушының үмітін әркім өз хал-қадарынша ақтағандай болды. Төлеген жұрт таныған әдебиет сыншысы болса, Жанғали белгілі композитор, әрі уыты бөлек сықақшы ақын, ретінде танылды. Мырзабек те қара жаяу емес, екі үш эссе кітаптың авторы. Өнер мен әдеп жайлы ағымдағы көзқарастарға үн қосып отырады. Сол өнерге сусаған топтың өмір сүру дәстүрі ісі әлі күнге дейін сорабынан жаңылған жоқ. Арасынан анау айтқандай қадау-қадау, бүкіл ел танырлық тұлғалар шыға қоймағанымен өздерінің күнделікті өмір салтының өзімен өзгелерге, сол өздері күн кешіп отырған орталарына талғам-танымның дұрыс қалыптасуына ықпалы болмай қалған жоқ. Ең басты нысана әдеби сауаттылықты көтеріп, көркемдіктің не екенін біліп, талдай алуға жетісу болатын. Жақсы мен жаманды ажырата білудің өзі адамдық кемелдіктің бір белгісі деп саналған. Олардың айнымас досы кітап, ұстазы Тәкен еді.
Иә, бүгінгіге қарағанда жұтаңдау ақпарат қоры. Ол кезде орайы келсе арғы бергіден көсілтіп әңгіме айтатын шежіре қариялардың алдын көрудің өзі бір ғанибет-тін. Әйтпесе, сөзден басқа, кітаптан басқа рухани алданышы жоқ, балалық деп аталатын, бірақ, оның қызығын емін-еркін бастан кешірмеген біздер үшін Тәкендей тірі жазушымен кезігіп, оның дәрісін тыңдау өте сирек олжа болғаны рас.
***
Айдың сәулесі, білте шамның жарығымен таңды таңға ұрып кітап оқыған көздер бұл күнде кенересі қырауланып, қалың-қалың шынылардың ар жағынан парақтан парақ оздырып, әріп қуалаудан әлі де жалығар емес
Кім болсаң да үлкенің, кішің мейлің,
Бастан асып жатса да ісің мейлі,
Бір мезгіл кітап бетін ашпайтұғын,
Адамдарды мен мүлде түсінбеймін. Дегенді уәр тұтсақ, Бұл да Тәкеңнің ғибратынан болар.
Иә, бұл күнде кітап оқып отырған бала көрсек сүйсінетін болдық. Біртүрлі ішің жылып, әлгіні жақын тартасың.
Қауіп санар құс келіп, құс қайтымын,
Білесің кемтар да өзін қыйнайтынын.
Көзі жоқтар қолымен кітап оқып,
Қолсыз жан тіспен қалам ұстайтынын.
Иә, әркімнің әрқалай айналысар ісі бар, бірақ, біздер баяғыша ауық-ауық бас қосып жаңа кітаптар жайлы, әдебиет пен өнердің жай-күйі жайлы пікір алмасуды естен шығарған емеспіз. Келісім былай: Мен бір екі газет, бір екі жорналға жазылсам, сен одан басқасына, ал, анау, одан да басқаларына жазылып алып тұрамыз. Кітап та сондай. Кейін ауысып оқып, пікірлесіп, өз ойларымызды ортаға саламыз. Кейін бұған интернет қосылды. Бұл нарық заманына бейімделудің бір жолы. Мүмкін болғанша жаңа кітаптардан қапы қалмау. Соңғы қатты талқыланған кітап Ш.Айтматовтың «Таулар құлағанда» немесе «Мәңгі қалыңдық». Одан бері де біраз уақыт өтті. Қазір М.Мағауиннің «Шыңғысханына» шұқшиғанбыз. Бұл шығарма хақында пікірлер екі жарылып, әзірше келісімге келе қоятын түріміз жоқ. Жо, жоқ, шығарма жайлы емес, Ұлы қағанның өз басы туралы.
– Шыңғысханды қазақ қылудың қажеті қанша?Алдымен түрік қылып алайық-та.
– Түрік екенінде шүбәң болмасын. Мына Азиялықтар түгілі қазір анау балтық жағалауы елдері де түрік тектілерге кіреді екен.
– Мынауың қызық екен.
Осы төңіректегі ізденістер мен мақалаларды қуалап тауып оқып жатырмыз. Алда әлі талай шайқас болары хақ.
– Бұл – жалғыз біздер емес бүкіл қазақ зиялыларын екі топқа бөліп тынатын шығар. Жә, оны қоя тұралық, бұл тарихи зерттеудің еншісі.
Қазіргі кездегі талас-пікір эстрада, ондағы әндер мен әншілер жайы, қатын дауыстылар мен қызтекелер. Мағауиннің зерттеуінде Шыңғысхан мұндай сұмдықты қатаң жазаға тартқан көрінеді. Табылған Жасысында (олар 64 баптан тұрады екен) табиғатқа сай емес жыныстық азғындау өлім жазасына лайық деп көрсетіліпті.
Жер жүзін жаулап келе жатқан жаһандану мен оның әсері. Аз ұлттардың жойылып, жұтылып кетпеу, қорғаныс иммунитеттік қауқары мен оны нығайтудың шаралары. Бәр - бәрісі әңгіме дүкен арқауы. Міне, бүгін тағы да Сәбет екеуміз концерт тыңдап отырып, көңілге түйгендерімізді ірікпей айтып отырмыз.
– Осы да сөз бе? Ән бе осы да? «Билеші, билеші, қабағыңды түймеші».
– Жә, бұл пікірді айтып жүрген жалғыз сен емессің. Әлденеше мәрте айтылып келеді. Мәселе соның қанша айтылғанымен одан шығып жатқан қортынды жоқтығында. Әлгі И.А. Крыловтың «Вася, мұның қалай, ұят емес пе? Ет, балық ұрлап жегенді қою керек қой. дегеніндей; Ал, мысекең болса тыңдап жатып жей береді, жей береді».
– Жалпы, байқайсыз ба, адамдар бұл күнде өзгеріп кеткен. Адамдарды бұрынғы айтылғандармен ұялта алмайсың. Вася мысық жесе жей берсін, И.А.Крылов айтты екен деп ырзығынан қағылу керек пе? Мәселе мысықта емес, аспазшыда ғой, бәрін көріп, біліп отырып, Вася мысықтың күнде ұрлық жасап жүргенін көріп тұрып еш шара қолданбауында ғой деймін. Тап қазіргі біздегідей. Ұрлық болып жатыр, жемқорлық асқынып барады, адамдар азып барады. Әдеби процесс те сондай. Адамына қарай заманы. Енді не қыл дейсің. Жаман шығармалар қаптап жүр, оларға қанша айтқанмен сынның қауқары өтпейді.
– Үйткені оны тыңдамайды. Жалпы, айтшы өзің осы күні кімнің айтқанын кім тыңдап жатыр.
– Ала-құла дүние, ала-құла адамдар. Құндылықтарға ала-құла түсініктер. Осы мидай араласып кеткен қоймалжың дүниеден жақсыны аман сақтап қалу, оны көпшілікке паш ету, жақсы деген мынау деп шұқып көрсету, жинақтай айтқанда көркемдікті насихаттау керек қой.
– Меніңше осы тұста үлкен бір пәлсапалық мәселені шешіп алған жөн ау.
– Шешіп алу емес, назар аудару десеңші.
– Дұрысы солай шығар. Авторитарлық дәуір өткен. Бедел, әлдекімдерді пір тұту. Олардың айтқанына тақ тұру деген қалған сияқты. «Болмашы епшіл, болсаңшы көпшілдің» постиндустриялық заманда дәурені өткен сыңайлы. Жекелік алға шыққан кезеңде қоғам өмірінен сырт, әлеуметтен, көпшіліктен тыс тұлға қалыптаспайды. Жекенің бір өзі өзін тұлға санайды да шығармашыл ортада бір өзін бір стиль сезінеді. Бүгінде ол елдерде (батысты айтам) тұлғаға - геройға сусап отырған қоғам жоқ. Оның бәрі қияли шығармалар мен анимациялық балалар фильмінде ғана. Найтмэн, человек паук деген сияқты. Кейде Гераклды да шақырып қояды.
– Оның біздегі көрінісі бәлкім кентаврға бет бұруымыз ба екен?
– Пассионарлық тұлға керек қой, әсіресе үлкенді сыйлап үйренген бізге. Қазіргі тұлға өркениеттіліктің үлгісін көрсететін, жылжып бара жатқан уақытты алдын-ала сезінетін, парасат, пайымы мол жаңашыл болуы керек шығар. Үміт, харекет, білік. Міне бізге не керек! Ал, кентавр мен көк бөрі тамырларымыз.
– Тұлға керек екені рас. Бірақ, бізде жақсы бір нәрсе ойласаң қазақ қылығымыз қосарланып қалмайтыны бар. Ау салсаң шылауға ілікпей қалмайсың. Тұлға деп біреуді шығара бастасаң, мен содан кеммін бе дегендей іштарлар қоса көтеріледі.
– Немесе руластар өздері-ақ әлгі адамыңды көре алмаушылыққа ұшыратады.
– Жә, аржағы белгілі «етекбастылық» қой. Бәрібір елге тұтқа, жұртқа серке керек. Әлеуметте де, саясатта да, әдебиетте де сында да.
Биікке бастаған екенсің, тау соқпағының қақпа тастары мен еңістің шеңгелі етекке жармаспай қалмайды. Шыдас керек, алған беттен қайтпау.
– Міне, міне...
Өлеңнің көркі өрнегінде болар
Айтпаса сөздің атасы өледі. Міне қараңыз: әдейі сынның обьектісі етейін деп тұрғаным жоқ, кезі келген соң айтуға тура келді. «Қазақ әдебиеті» газетін әрдәйім күтіп аламыз, ең бір жақсы көретін, көп жылдан бері үзбей оқитын басылым ғой. Міне, сол газетте сын туралы әр нөмір сайын ащы-ащы сөздер айтылып, сөйтейік, аямай сынайық, жауырды жаба тоқу болмасын деген сарындағы мақалалар үлкен-үлкен сыншылар мен жазушылардың аузымен айтылып жатады. Енді қараңыз, сондай, әдебиетке жаны күйзелген мақалалар басылған номірдің өзінде талғамы төмен өлеңдер жарық көріп жатады. Ау, мен не деймін, домбырам не дейдінің кебі дерсің. Қайда еді, алып қойыпем ғой сол газетті.
– Раушан! Оу, Рәкесі! Менің мына жерге қойған газетім қайда?
– Тұрған шығар орнында.
–Қанша рет айтам, менің қағаздарымды жинамай-ақ қойыңдаршы осы. Ә, міне таптым.
Міне, мына газетте (01.03.2013 № 9 ) бір-екі автордың топтама өлеңдері жарияланды. Сол өлеңдердің бір екеуін оқып көрейік;
«Ортақ бағыт» деген өлең
Барлық жанға бұл дүниеде
Ортақ екен бір бағыт.
Ол бағытты айқындайтын
Күндіз-түні тоқтамайтын уақыт.
Уақыт өте, өсіп, ер жетерсің,
Мүмкін кемел жасқа келерсің.
Бірақта бір сәтте бөгелмей,
Мәреге жетіп, дүниеден өтерсің.
Толассыз жалғасады уақытпенен
Адамдардың өмірдегі көш жолы.
Бағыт бізге ортақ болғанымен
Болады әр адамның өз жолы.
Өлеңді біз түгел келтірдік. Ішінен іріктеп алынған әлжуаз шумақтар екен демеңіздер. Бәрі осы. Ақын не айтқысы келген? Немесе осы айтқандарында қандай поэтикалық сезім, әйтпесе әсер бар?
Автордың тағы бір өлеңін алып көрейік «Толық адам» деп аталатын өлең былай басталады.
Орта жастан асқанда
Келесі жартыға аяқ басқанда,
Өтті деп қалай, кеткен жарты
Есеп беру бізге керек сияқты.
Одан әрі;
Келтіре алмассың өткенді
Қайтара алмассың кеткенді.
Нені сен орындай алмадың?
Негізгі осы болу керек сұрағың.
Бұдан әрі жалғастырудың керегі жоқ шығар. Не жөнді ұйқас жоқ, не буын бунақ жағы ретті емес. Кейде буыны асып кетеді, кейде жетпей жатады. Бәрі де сын көтермейтін дүние. Ертеректе мұндай туындылар республикалық маңдай алды басылым түгіл аудандық газетте де жарық көруі екі талай болатын. Бұл әлде көркем өнердегі демократия ма? Кім не айтқысы кесе айта беретін. Біздіңше, әдебиетте мәселе жәй ғана айтуда емес, қалай айтуда емес пе еді? Поэзия бейнелі ойлау емес пе еді?
– Түу, Дүке, сонша күйіп-пістіңіз ғой – деді Сәбет. – Мұндай өлеңдер кез келген облыстық газеттерде, тіпті, республикалықтарында да жиі кездеседі ғой. Тіпті алтындатып, жалтылдатып кітап етіп бастырып жатқандар қаншама.
Айтпақшы, бұл Сәбет дегеніңіз мамандығы басқа болғанымен қазақ әдебиетіндегі жағдайларды бір адамдай білетін, өнердің шын жанашыры десе болғандай. Оның әдебиетшілерді бір қызықтыратын ерекшелігі Тәкен шығармаларын бүге-шігесіне дейін білетіндігі. Және ең бастысы «Абай жолы» романын жатқа айтатындығында. Талай тексергенбіз, сол қалың кітаптың кез келген томының кез келген бетін ашып, оқыңыз да ар жағын Сәкеңнің еркіне беріңіз, сіз тек кітаптан қарап салыстырып отырыңыз. Ары қарай жатқа айта береді. А.С. Пушкиннің айтатыны бар еді. Талантты ақын болу бар да жақсы оқушы, талантты оқушы болу бар, ал, оның өзі үлкен өнер деп. Мынау тап соның өзі. Сол үшін де оның Сәкеңді айтам, қазіргі әдебиет өнер жайындағы пікірлерін тыңдап онымен санасудың, сырласудың өзі бір ғанибет.
– Иә,баяғы аталарымыз қырманда істеп жаңа бастырылған дәнді күректеп, қызылдап жататын еді. Сол сияқты рухани ырзықты да жел шақырып қызылдап, тазалап алу қажет-ақ. Ығырмағы, шөп-шаламы, ұшығы дегендей, қажетсіздің, керек еместің бәрі желмен ұшып кетуі керек. Оған бұрқыраған мінезді жел емес, жайлап, екпіндеп соққан самал болса жетіп жатыр. Айтып отырған самал мен күрегіміз бүгінгі сынымыз бен талғам тазалығы.
– Әлгі көп оқудың қажеттігі де осы тұста керек. Әйтпесе, сендер ақын жазған нәрселерді талдауға тиіс емессіңдер, ол ақынның туындысы, ол солай жазды, солай қабылдаңыздар, талдамаңдар! – дейтіндер де бар. Олардың ұстанымы да ұғынықты. Ол шығармашылық еркіндік. Бірақ, еркіндіктің жөні осы деп бүгінгі поэзия биігінен төмендемеу керек қой. Онсыз да кітап аз оқылатын кезде талғамсыз оқушының қолына әлгіндей нашар кітаптар немесе топтама өлеңдер кездесіп қалса, оқы, оқы дегендерің осы ма, мұндай әдебиетіңе болайын деп мүлдем жеріп кетпесіне кім кепіл?
– Иә, әр нәрседе де біліктілік керек. Өнер мен әдебиетке тіпті де талғам қатал жоғары болғаны жөн. Үйткені ол рухың, зияткерлігің мен, өрең. Мұны тәрбиелейтін сын. Әдеби көркем сын. Әне, анау тұрған кітапты алыңыз-шы. Гегель. Эстетика. Мына бір жерінде айтады: «Критика – самовыражение литературы». Әдебиетің қандай болса сының да сондай. Немесе керісінше сынның деңгейі қандай болса, әдебиетің де сондай деген мағынада.
– Негізі, әдебиетке де Д.Менделеев керек-ау. Әр шығарманың салмағын, қасиет ерекшелігін көз алдыңа кесте ғып жайып салып, әркім көрсін өзінің қай жерде, қай деңгейде тұрғанын.
– Солайы солай ғой, реалды шындыққа жақындасақ, осы кезде кез келген өнімнің сапасын анықтайтын сарашылар, экспертиза, бар емес пе? Өнер саласында да осы күні ән байқауларында талапкер әншіге сенің ана жерің анандай, мына жерің былай болса дұрыс болар еді деп, соңында баға қойып жатады ғой. Оған әншілер пәлендей мінез көрсетіп жатқан жоқ. Үйткені сын айтып отырғандар сол саланың ең білгірлері. Ал, әдебиетке келсек, сөзге тұрмайды. Сын айтсаң сотқа беріп жатады. Бұл қалай, сонда қамбаға салар астықты ұшық пұшығымен шөп шаламымен үйіп соған малданып отыра беруіміз керек пе? Ішкі мәдениет жалпы адамзат жеткен деген деңгейді мойындау деген болу керек қой. Сондай тазаланудың жоқтығынан әдебиетті көркем сөзді, оның киесін қадірлемеуден сөз арасы былғанып жатқанына көп болды. Натура бар, тұрмыстық сөз қолданыс бар, көркем тіл бар, көше тілі, жаргон бар бәрін араластыра беруге бола ма екен.
– Онан соң, эротика тағы бар. Неғұрлым еркін болам деп, анайылыққа, тіпті боғауызға барудың қажеті бар ма?
– Осының бәрі батысқа еліктеудің салдары. Олардың көптеген фильмдерінде боғауыз сөзді шімірікпей соға беретін тұстары аз емес.
– Эротика болған, оны батысқа апарып жапсыра берудің керегі жоқ. Бұрыннан бар, тіпті, ауыз әдебиетінде де кездеседі. Бұрындары сауықшыл халық қандай бір жиын тойларда пәленшемен түгеншені айтыстыру керек, деп ақын қыздарды сөзшең жігіттермен ұштастырып қызығына бататын. Сонда жеңіліп бара жатқан жігіт осылай айтсам қыз бәлкім тосылып қалар деп тұспалдап та, ашық та, көбіне жұмбақ түрінде айтылмайтын сөздерді айта бастаған. Оған ыға қоятын қыз жоқ. Ә десе мә деп жауап қайтарып тастайтын. Ауылда өскен баланың көрмейтіні жоқ. Жыныстық деген таңсық емес. Мұның ақыры қыз ағаларының жігітті таяққа жығуымен тойдың шырқы бұзылатын. Бұған мысалды кез келген ауылдың әңгімесінен ақын қыз бен ақын жігіт бопты, олар сондай-сондай сөздер айтып ұтып кетіпті деген сияқты деректерден қанығуға болады. Бірақ, ақынның шын ақындығы онымен өлшенбеген. Қайта абыройына дақ түсіретін шалалық, тілі ащылық деп бағаланған.
– Бүгінгі сыңарезулікті пайдаланып, енді баспа жүзінде өздерінің өнерін эротикамен, жалаңаш тәндікпен көрсетіп жүрген жағдайлар орын алуда. Бірер жыл бұрын газеттердің бірінен сондай бір топтамаға кезіккенім бар. Ақын қарындасымыз бұл жолы құштарлықты жыр етемін деп мүлдем нақтылыққа барған екен.
«Бал бұлақтан құныға бір жұтамыз,
Қызу айқас, жеңілеміз, ұтамыз.
Алқын жұлқын шабыттанған шақтарда
Білмей қалдық, қайда қалды лыпамыз».
Рас, кей сөздердің оралымы дәл сондай болмағанымен негізгі сөздер сол қалпында алынды. Одан әрі ақын қыз «Жайрап қалдым қауындай боп қақ жарылып» деген бейнелеуге дейін барған. Сезім қуалау, гедонизм.
Негізі, эротика кез келген ақында бола береді. Үйткені ол өмір, ол шындық. Ес білген адамның бір қызығы осы емес пе? Сол шындықтан әсерлену нәтижесінде ақын өз ішін бір мезгіл босатып та алғысы келетін шығар. Ол Абайда да бар. Басқада да бар. Осы кезеңде Исраил да сол тоғайға біраз ат шалдырғанын оқырман ұмытпаған шығар. Осыдан он шақты жыл бұрын белгілі ақын Иран Ғайып
«Айқайласа бірігіп,
Үстімізбен кірігіп,
Жанып күйіп жайланып.
Астымызбен байланып» деп жазған-ды.
Кезінде Мұқағалиға сол дәуірдің поэзиясы туралы баяндама жасатқан екен. Көптеген ақындарға талдау жасап, қазақ поэзиясы Қадір, Сағи, Тұманбай, Жарасқандармен шектелмейді, әлі талай жаңа есімдер келер соларға үлгі боларлық жол ұсынылуы керектігін айтқан. Махаббат лирикаларына тоқтала келіп, Жарасқанның «шторм» атты өлеңін ерсі көргенін айтады. Өлеңнің шторм аталуы бой бермей тұрған құштарлық.
«Қолымды апардым дірілдеп
Үстіне жұп-жұмыр тізеңнің».
«Меніңше деп жазды Мұқағали бұл өлең ешқандай талдауды керек етпейді. Бәрін де өзі айтып тұр. Қазақша айтуға ұят. Жас ақынның мұншалықты әбестіктен аулақ болғаны жөн. Сын қайрақ. Сын әдебиеттің құмшарығы. Сынды қылыш деп ұғыну ұшқарылық. Оның от шашқан шақпақ шарығына түскен қару өткірленіп, үшкірленіп жалтырап тұрмақ».
Өлеңшілдік қазақтың негізгі қасиеттерінің бірі, бірі ғана емес-ау бірегейі.
«Туғанда дүние есігін ашады өлең, өлеңмен жер қойнына кірер денең» деп, Абай атам содан айтқан болар. Сол ақындық, өлеңшілдік келе-келе заманның ыңғайына ығысып:
«Ақын ғаріп емес пе,
Заман ғаріп емес пе,
Байды өтірік мақтаса.
Әділеттен аттаса» – деп ақындық қуатын теңбіл жоталы жолбарыс жетелеген Жамбыл бабамыз айтқандай «Асыранды ақындар» көркем сөздің тұқымына тұз құйып жүргендердің шығар жері екені белгілі.
– Бірақ, билік соны қажетсінеді ғой. Қайсы бір патшаның болсын өз сұрқылтайы болған. Орыста сонау заманда М.Ломоносов Екатерина патшайымға небір одалар арнады емес пе! Және көркемдік деңгейі де тәп-тәуір.
– Бұл екеуіне де керек. Ақын патшаның ықыласына бөленіп, шығармашылықпен еркін айналысуға мүмкіндік алады. Ал, билік дуалы ақын аузымен өз дегенін іске асыруда жәрдемші деп табады. Эзотеризм.
Ақындардың бұдан басқа да түрлері баршылық. Өлеңді кәсіп қылуы өз алдына, оны қызықтап, ермегіне айналдырып, бір нәрселерді ұқсастырып, ұйқастырып жататындары да бар. Әлеуметтік тәп-тәуір мәселелерді қозғай отырып кейде шалқып кеткенде қалыптан шығып, ақындық қабілетті қызық-қызық өлеңдер құрауға жұмсайтын кездері де болады. Тәуелсіздіктің 20 жылдығына орай көптеген ақындар өздерінің мадақ жырларын жазды. Соның бірі «Үш қоңыр» газетінің 2011 жылғы № 33, 28 қыркүйекте жарияланған Серік Қапшықпай ұлының тәуелсіздік жыры айдарымен көлемді толғауы жарияланыпты. Автордың өлең жазуда едәуір төселіп қалғандығы көрініп тұр. Техникасы, сөз сонылығы, ұйқастары ешбір мынау деген ақыннан кем емес. Сол жыр-толғауда еліміздің ұшан-қиыр даласын, әсем табиғатын жырлай келіп, кейде сабадан асып, тасып, төгіліп кетеді. Сондай шалқымалы тұстарда
Дәнін көр ау, қай маңның,
Бәрін де кіл ім.. әлгі!
Бидайыңнан айналдым
Ұрғашы адам сыңайлы, – деп дәннің болмыс бітіміне қарап отырып әйел мүшесіне ұқсатып отырғанына жолықтық. Бірақ, бұл бір байқаусыз айтылған тосын теңеу емес екен. Одан әрі жырлай келіп:
Бәрінде бар қай маңның
Собығы ұзын бұл әлгі...
Қурайынан айналдым
Еркек адам сыңайлы, – деп, тағы да бір анайылыққа, қарабайырлыққа ұрынады. Біз сөзіміздің бас жағында «Қ.Ә.» газетінде жарияланған Ғалым Мұтановтың топтамасына біраз көңіліміз толмағанын білдірген едік, Маралтай ақынның сөзімен айтсақ, өлеңдік деңгейге көтеріле қоймаған дүниелер. Одан эротикалық шумақтардың авторы болған Салтанат қарындасымыздың әдеттен тыс қатты құштарлықты жалаңаш суреттеген тұстары да аз кем сөз болды.
– Оу, Дүке, интернетті қайтпексіз? Ғаламторда небір айтуға ауыз бармайтын өлең жазып жариялап жатқан қыздар шықты ғой.
– Ойбай, айтпа! Жыныстық қатынасты қызықтап жазып, қайткен кезде тәнің қандай сезімде болды... деп, ауылдық жерде хайуандық әрекеттерді көріп тұрғандай сәттерді өлеңге айналдыруда. Және ең жаманы мұныңды қой, ұят емес пе деп сайтқа шыққандар да айтпайды. Қайта, молодец! деп қолтығына су бүрке түсетіндер бар.
Бір өкіндірер жері мұндай өлеңдердің (прозада да баршылық) бірен-саран емес, көптеп кездесетіндігінде.
Кезінде ұлтымыздың ұстазы Ахмет Байтұрсынов: «Әдеби еңбекті ешкім мақтаныш үшін жазбайды, шығарма мінезден туады. Ұлтымыздың қажетін өтейді сөйтіп» деп жазған екен. Өкінішке орай, ұстаздың бұл айтқандары іске асып жатқан жоқ. Керісінше, ақындықты мақтан тұтатындар баршылық. Бұл күнде қаржыларына әдемі өрнектелген кітаптар шығарып, ауыл елде кездесулер өткізіп беріңдер деп қиғылық салады. Одан келесі жылдары тағы да кітап үстіне кітап шығарып (ол кітаптарында байшыкештерді мақтап, бірдеңе дәметіп, өлеңнің құнын түсіретін жағдай бар) ал, енді не дейсіңдер, міне төрт бес кітап шығардым, Жазушылар одағына қабылдаңдар деп есік тоздыратындар бар. Өкініштісі сол, кейде солардың кейбіреулері қабылданып та жатады.
Ақындар турасында сөз болғанда ең алғы шарт – өлең, өлең болуы керек қой. Онда ырғақ, өлшем, әуезділік, тағы да бір және міндетті түрде бастысы – ұйқас мінсіз болуы. Одан басқа ақындық көңіл-күйдің құбылуына орай интонация, тегеурін, шарықтау-шалқу дегендей де болуы мүмкін. Бұл көбіне француздар мен орыстар верлибр деп атап кеткен еркін өлеңдерде көбірек бой көрсетеді. Тәңірінің өзінен дарыған қасиет - ол көркем өнер туындысы. Сондықтан, көркемдік, сұлу, бейнелі сөз айшықтанып көрініп тұрғаны абзал. Баяғыда әжелеріміз ұршық иіріп, мақтадан немесе қойдың жүнінен алаша тоқитын. Төсеніш үшін болсын, іргеге тұту үшін болсын жиектеріне өрнек салып құстабан, құс таңдай, қошқар мүйіз сынды әсем бедер салатын. Тағы да сондай өрмек құрып жәй теру жасайтын. Мұны қара теру деген. Одан көбінесе қап тігетін. Бұл енді әсемдік бұйымға жатпайтын.
Заманға лайық постмодерн
жыр көкжиегі
Жазбамыздың бас жағынды айтып едік қой. Біздер бірнеше достар кейде, ыңғайға қарай, ауық-ауық жиылып, өз ара кеңесіп, замана туралы, мәдениеттің, әдебиеттің қайда бара жатқаны жайлы пікір алысып тұратын едік. Кеңес соңында тапсырма берілетін. Жинала қалған жағдайда жай ойға келгенді экспромттық жолмен, алдын ала ойланбай айта салмау керек делінген.
– Бұл өзі қиындап барады ғой, баяғы Х1Х ғасырдың соңындағы орыс композиторлары мен суретші, әдебиетшілерінің «Могучая куча»-сы сияқты ма?
– Ондай болу қайда, бірақ болмасаң да ұқсап бақ, деген емес пе?
– Ешкімге ұқсаудың керегі жоқ. Жәй, өзіміздің достардың келесі шәй ішуіміздің үстінде не болса соны айтып немесе өсекке жол бергенше баяғы өзіміз жақсы көретін қоңыр әңгімемізді жалғастыра берейік – деді, бүгінгі асаба Сексенбай.
– Келесі жолы, Дүке, сіз осы тақырыпта бізге әңгіме айтып беретін болыңыз. Сол тапсырмамен мен бұл тақырыпты мақала сияқты жазбақ болдым. Тек өзіміз ғана болмай, басқалар да аралассын, сырлассын дегендік.
Бүгінгі күн санаға үлкен жүк түскен кез. Тау суындай арындаған, келе-келе бой бермес үлкен селге ұласқан ақпарат тасқыны ырыққа көнер емес. Ол сол өзінің ырыққа көнбейтін еркіндігінен қуат алып еркін жайылуда. Ғылыми техникалық төңкерістер үсті-үстіне жаңа серпін тауып, барған сайын өндірістік инновациялық сипат алып қарқындай түсуде. Пост индустриялық өнім өндірудің шарықтап өсуі экономикалық еркіндіктің, трансконтинентальдік корпорациялардың жалпыға бірдей қанағаттандырушылық, тұтынушылық қажеттердің мейлінше тез әрі кең көлемде сұраныстарға жауап беру ісіндегі үстемдігімен ерекшеленеді. Бұл үдемелі өркендеу тек материалдық игіліктер өндірумен шектелген емес. Ол бүкіл ақыл - ес, сананы қамтып бәрін де өз бауырына басып алуды көздеуде. Бұл айта беретін жаһанданудың көрінісі. Бұған қарсы тұрар қуат күш жоқ. Үйткені ол капитал заңына сәйкес соның өзімен құрсақтанған. Осылайша өркениетке, зайырлы қоғамға қарай жылжудың обьективті заңдылығы іске асады.
Жаңа заманның, жаңа, бұрынғыға ұқсамайтын дәуірдің өз құндылықтары болады. Ақыл, ой, сана, рухани дүние бәр-бәрісі астасып араласып, өндіріспен де кірігіп кеткен. Жаңа дәуірге жаңа көзқарастар, жаңа құндылықтар мен сол құндылықтар турасындағы пікір пайымдаулар болуын қажетсінеді. Бүкіл адамзат сөйтіп мәдениеттің жаңа сатысына қадам басты. «Мәдениет, оның тарихы дегеніміз диалектиканың атасы Гегель айтқандай рух қозғалысының талпынысы». Осы заңдылық біздің қазақ қоғамын да толық қамтып отыр. Әу баста «Алаш» арыстары, одан бері қарай С.Қожанов, С. Садуақасовтар қозғаған ұлт мүддесі, әдебиетте қызыл империяның әлі күш қуаты сарқыла қоймаған өткен ғасырдың сексенінші жылдарының екінші жартысында А.Сүлейменовтердің, Т.Әбдіковтердің, т.б. ұстанымына айналғанда былайғы шыбындағыш жұрт үрпиісіп қалғанды. Жаңа дәуір өзінің рухани саладағы, санадағы барлық жағымсыз, кесір кесапатымен бірге, оған қарсы тұрар ұлт туын ардақ тұтатындардың қарасын көбейте түсті. Соданда болар, бұл алаш азаматтарына деген қазіргі жұрттың сағынышы солғындаған емес. Үйткені қандай да болмасын үстемдікке қарсы тұрып ұлттық болмысты сақтап қалудың ішкі қуаты осы тектес тамырлардан нәр алады.
– Иә, қиын шақтарды бастан кешудеміз. Бір жағынан бұрынғы, сан ғасыр жинақталған рухани құндылықтар өз мәнінен айырыла бастаған, ал, оның орнын толтыратындай, жаныңа жақын жаңа құндылықтар қалыптасып болмаған кез.
«Дәуірлер ауысып жатқан заманға кез келгейсің» деп қытайлықтардың көне қарғысына ұшырағандаймыз. Ұлттың ұлт боп қалуы үшін қызу майдан басталды. Осыған дейін кем тұтып, біздер сияқтыларды жетекке алып келеміз дейтін ықпалды ұлттар әлі де райынан қайтар емес.
Рас та шығар біздер бірнеше ғасыр талпыншақ, үйренуші ұлт болып келдік. Бұған Абайдың өзі бас болып, орыстан үйрен деп жол сілтеді. «Біздің мәдениет үйренуші мәдениет екеніміз рас, бірақ үнемі соны ұстана берсек, оның зардап зиянын тартуымыз мүмкін. Бұлай ете берсек, түп-нұсқалық өз мазмұнымызды әлсіретіп алуымыз мүмкін (М.Қойгелдиев). Қазақта үйрен де жирен деген жақсы сөз бар. Ұлт қамы деп өз шеңберімізде тұйықталып қалуға тағы болмайды. Ұлтсыздануға қарсы әрекет аса парасаттылықпен жүргізілгені абзал. Батыс мәдениеті қаншалықты тағылымды болғанымен оның ұлттық мәдениетімізді әлсіретуге, аздыруға бағытталғаны көпшілік немесе бұқаралық деп атап жүргеніміздей, арт музыка, арт поп, арт искусство күйедей жайпап келеді. «Транскорпорациялар ұлт мәдениетін өз қолбаласына айналдыруға бағытталған, бұл жаһандану» (Дос Көшім ).
Ауыспалы кезеңдер, өліара шақтар бұған дейін болған.
Өткен ғасырдың басында капиталистік дүниеде болған жаппай тоқырау, санаға үлкен салмақ салып, мақсатсыздық, идеясыздық тоқырауға ұшырағаны белгілі. Содан дүние екіге жарылып, жаңа саясаттанған жүйелерге жол ашылды. Бұл еркіндік үшін күрес тарихының жалғасы, сана бостандығы үшін күрестің қызу басталғаны еді. Коммунистік идеяның белең алуы дәл сол кезде оған қарсы тұра алатын әлеуметтік күштің жоқтығынан болатын. Мынадай шарасыздық пиғыл соның салдары болатын. «Бірге тұрып, бірге өмір сүргенімізде ортақ мақсат болмаса мұндай өмірде мән жоқ». Бұл пікірді сонау дүниені түгел шарпыған индустрияландыру, АҚШ-тың экономикадағы үстемдігі мен мәдени, рухани салада да өз тәртіптерін, бұқаралық поп музыкаларын тықпалап жатқан кезеңде Франзуздардың қарсы тұрған кезеңінде дербес, ерікті, еркін бағыт ұстанған «Экономика және гуманизм» журналынан кезіктірген едік. Бірақ, ол қарсы тұрушылық тек тар шеңбердегі – өнер адамдарының шығармашылық еркіндік талап еткен қарсылығы ғана еді. Онда әлеуметтік мүдделер қорғалған жоқ.
Алла тағалаға мың мәртебе шүкіршілік! Елбасымыздың реформалары арқасында осындай өліара шақты бастан кешіріп жатқанда біздер алдыға үлкен мақсаттар қойып, ұлтты, халықты біріктіретін үлкен стратегиялық мәні бар көп жылдарға арналған жоспар программалар қабылдап жүзеге асырып жаттық. Алдында 2030 стратегиялық жоспар, одан, міне, енді 2050 программасы! Бұл «ешқандай измдерге» ұрынбай-ақ өз жолымызды – Қазақстандық өркендеу жолын тапқандықтың нәтижесі еді. Бұл таза прагматикалық жол; алмағайып сәттерде аяққа нық тұруда бірден-бір тиімді жол еді. Мұнда рухани салаға мемлекет тарапынан басымдық берілуі екінші қатарға шегеріле тұратыны өзінен өзі аян. Осының әсерінен қоғамда саяси ауа жайылушылық, торығу, рухани дағдарыстар түрлі деңгейде көрініс табуы заңдылық.
Сол жаппай индустриализация қарқын алып келе жатқан өткен ғасырлардағы кезеңде оған қарсы тұрып, қабылдамаған ағымдардың бірі экзистенциализм (лат. существование - өмір, тіршілік, күнелту) еді. Бұл саяси қарсылық емес, шығармашылық жолындағы адамдардың абсолюттік еркіндікке ұмтылу қозғалысы болатын. Оның пайда болуы өткен ғасырдың басында, тіпті, одан алғы ғасырда буржуазия философы Кьеркогордың ойларымен дүниеге келген. Кейін ол кеңінен жайылып искусство, әдебиет, жалпы шығармашыл интеллигенция арасынды танымал ағымға айналды. Сюрреализм (фран. сверхреальность) де осыдан қоректеніп, рухани тірек алыпты десе болады. Ол кейін АҚШ-та кең өріс алды. Әлемге танымал белгілі өкілдері Сартр, Камью, суретші С. Далилердің арттағыларға жасаған ықпалыда зор болды. Олар шындығында шеберліктің шыңына шығып, формадағы, бояудағы неше түрлі бұрын қол жетпеген құбылыстардың сырын ашып шын мәніндегі шедевр туындылар жасады. Бірақ, одан бір мән, мазмұн оқиға, сюжет іздеп әуре болмаңыз. Бәрі абстрактылы. Мысалы, Сальвадор Далидің, басқасын қояйық, «автопортрет» деген туындысына көз тоқтатсаңыз адам ақылы жетпейтін қызықты кескіндерге кезігесіз. Сәл сәл өзіне ұқсай ма, ұқсамай ма адам кейпі қолданылған материал құралы бояуларының өзгешелігімен таңдандырады. Бәрі ағып, тамып, ашыған қамыр сияқты тасып немесе кофенің қоюындай қоймалжың дене жылжып ағып бара жатып адамның иегін бейнелеген. Енді, тез тіреу қоймаса ағып түсетіндей. Дереу қураған бұтақтан тіреу қоя салған. Сонымен, адам иегі тоқтап тұр. Енді, ары қарай бет сұлбаны түгелдей қарасаң қас қабақ та сондай, тыриған арық қолы да тіреу таянышқа сүйеніп әрең тұр. Алдындағы сағат та сондай. Дөңгелек кейпі еріп ағып сопайып барады. Бәрі де ағып, тамып, еріп тұр. Бірақ, осының бәрі үлкен өнермен ыждаһатты, нәзік те жарық етіп жасалған. Бояулар жібек сияқты. Түк мән жоқ. Үлкен шеберлік қана бар. Қап! дейсің ішіңнен. Есіл еңбек нені айтқысы келді екен? Бірақ, бұндай шығарма сол өзінің құпиялылығымен де өте әсерлі.
Болмысты адамның өз ішінен іздеуді ұсынады. Экзистенция, яғни, жеке адам өзі арқылы дүниені және өзін таниды. Шындық пен ақиқатты мифтерді пайдаланып, түс көруден, қиял-елестен, абстракты ойдан, дерексіздіктен іздейді. Поэзияда, қылқалам шығармаларында шындықты, болмысты мағынасыздыққа, жетелейді. Экзистенциализмде дінге сенушілік, кейбір тармақтарында атеизм басым болып келеді. Әлгінде айтылды ғой, бұл сананың, рухтың тоқырауға ұшыраған шағында сүйенер идея таппай күйректіктен, дәуірлердің өліара шағында пайда болған ағым.
Біздер де бұл күндері өліара шақтан өтіп барамыз. Осыған дейінгі қаншама ғасырлар бойы жинақталған рухани құндылықтарды мансұқтаған кездерді бастан кешірудеміз. Бұл кезеңнің ерекшелігі шығармашылық ортада күйректік пайда болғандығы. Солай болмағанда ше? Болмыста, тұрмыста бұрынғы дәстүрлер, тәртіп пен тыйымдар өзінен өзі жоққа шықты. Әдеп, инабат, ұят, ар делінетіндер ысырылып тасталды. Әркім дара-дара, құдай пана принципі белең алған соң, алдымен күн көрісті ойлап, жұрт ақша үшін, баю үшін не бір сұмдықтарға бара бастады. Ел басқарады, халықтың қамын ойлайды дегендер парақор, жемқор, ашкөздік танытуда. Жұрттың көз алдында мемлекеттің беделі түсуде. Ай сайын, апта сайын не бір лауазымды адамдар қылмысқа ұрыныпты деген хабар естіп жатамыз. Заңдар аяқ асы болып тапталып жатыр. Онан соң, тәуелсіздіктің келуімен бұрын жабық болған архивтер ашылып, жұртшылық кеңес кезіндегі небір сұмдықтарды біліп, қатты торығып, түңіліп ашу ызасы да шектен шыға бастағанын аңғарды. Бұл жағдай жалғыз біз емес пост кеңестік елдердің бәрінде бар екендігі байқалды. Ақындар мен ғалымдар без теріп кетті дегендей күндерді бастан кешіріп жаттық.
Не навижу этот ХХ век,
Не навижу его кровавый рек.
Зачем мне закон о праве человека
Я давно уже не человек, – депті А. Соколов деген ақын.
Өнерде талғамсыздық етек алып, батыстың бейбастақ музыкасы мен санадан аулақ түйсікті ғана қоздыратын күмпілдек билері жастардың есін жаулап алды. Осындай шақта әлгі жоғарыда айтылған өмірден түңілуді медет тұтқан экзистенцияның ұшқындары бізге де жетіп күйректік бой көрсете бастады. Алғашқыда осындай жылауық поэзия белең алғаны рас. Бірақ, бұған Мұқағали сияқты ақындар тобы көп бой алдыра қойған жоқ. Туған жерді сүю, оның табиғатын, әлеуметтің өршіл рухын жырға қосу, ел, жер, азаматтық парыз жайында тебірене толғау, өрнекті ой кешулер өрісін таба білді. «Еңкейген қартқа таяныш, жылаған балаға жаялық етіп» өлеңнің азаматтық рухын түсірген жоқ.
Ойлы жас!
Өлең менің сырласымдай,
Сырлассам да құмарым жүр басылмай.
Айтып өткен ақында арман бар ма,
Жүрегінің түбіне кір жасырмай.
Немесе:
Сәби халқым, сарыла сыр ақтарам,
Жалған ой, жасырын күй жырақ маған.
Сенің үнің мендегі, сенің жырың,
Сенің ойың мендегі тұрақтаған.
Бұл өмірді жырлау. Қандай жағдай болмасын ақын елінің өмірге құлшынысын бәсеңдетпей, тұйықтан алып шығуды өзіне міндет санайды. Қадыр, Тұманбай, Сәкен, Рафаэль, Несіпбек, Фариза, Ақұштап т.б. өздеріне тән азаматтық, адамгершілікті арқау еткен позицияларында қалды да, Темірхан, Иран Ғайып, Маралтай тектес ақындар тегеурінді түрде ұлттық намысты қайрау, ояту бағытындағы күрескер, адуын жырларын өмірге әкеліп жатты. Сонау Көк бөрілер мен Күлтегіндермен үндесіп, қайсар бабалардың рухын шақырып, туларын көтерісті. Ал, ақындардың бір тобы өз ішіне үңіліп, дүние сырын іштей ұғынуға талпынуы абстракцияға, әлгі айтылған экзистенцияға, дерексіздікке берілуі бекер емес. Осы тұста поэзия іштей түлеп, жаңа жағдайларда жаңа форма табуға талпыныс жасағаны да байқалды. Ішкі драманы беру, адам жан дүниесінің құпия қалтарыстарына үңілу сияқты психологиялық тітіреністер шеберлене түскендей. «Өз заманының шындығын көрсете алмаған, сезіндіре алмаған поэзия бос қиял іспетті» депті В. Белинский сын жоқ жерде өнер де жоқ депті тағы да.
Бірте-бірте өмір қалыпты арнаға түскеннен кейін күйректік, мұңшылдық сарын жайлап сейіле бастар ма екен? Әй, қайдам. Бұл заманның сұрқы бөлек. Халық ретінде, ұлт ретінде жойылып кетпеудің жолын қарастыру керек. Осы бағыттағы тегеурінді күш ұлттық рухқа мін боларлық тоғышарлық, рухсыздық, намыссыздық шалақазақтық пен ашкөздік енжарлық пиғыл-мүдденің өрісін тарылта түсу ісінің зәрулігін ұғындырудың мәні зор. Бұл ардың ісі, әдебиеттің ісі болса керек. Әйтсе де, пендешілік мұң жуық аралықта тарқай қоймайтын түрі бар.
– Бұлай таусыла сөйлеудің керегі жоқ. Мұңның да мұңы бар. Қара бастың, ішіп жемнің мұңы басқа, бүкіл ұлттың жоғын жоқтап, тілеуін тілеген мұң басқа. Шынтуайтына келгенде осы мұң, қасіретке бой алдырғандық кей ақындарда жасандылық емес пе екен деген ой да келеді. Ал, жасандылық қашан да болсын эстетикалық шөл қандырып, жағымды әсер етеді дегенге сену қиын. «Жер наны үшін ұн керек, ел қамы үшін мұң керек» деген ғой Асқардың сыныптасы Разық.
Рас, көне заманнан, Эсхил дәуірінен, тіпті, одан да әріде трагедиялар мен небір ғылыми трактаттарды өлеңмен жазып, са¬наны алға сүйреген керемет үлгілері болған. Одан, тас қашап, мүсін жасау, қала салу, сәулет, сурет өнері өз алдына ғажайып дүниелер. Адамзат мәдениеті мен өнерін алға сүйреуде Леонардо да Винчи, Микеланджело, Рафаэльдердің, Тициан, Рембранд, Рубенстердің өнегелі істері небір керемет жолын қуушы қылқалам шеберлерін тудырғанын ешкім жоққа шығара алмайды. Қайта өрлеу дәуірінен кейін өнердегі нағыз бәсеке өзінің шырқау шыңына жеткені аян. Әр бір жұрттың өнер туындыларына аялы көзбен қараған жөн деген екен Гетенің досы, Берлин университетінің ректоры Г.Фон Гумбольт.
– Әлемдегі қай халықтың болмасын өнерінің бір қылы қисайса, ол бүкіл адамзат мәдениетіне келген нұқсан деп ұғу керек, – деп. Мәдениеттерді қарсы қоймау керек. Олар бір-бірімен көзге көрінбейтін жіптермен байласып жатыр деп жалғастырады ойын әлгі ғұлама қария.
Көшпенділер мәдениеті өз алдына бөлек бір әлем. Далиған даланың қалалары мен темір мен алтыннан түйме түйген өнеріне қызықпаған көрші қалмаған. Сансыз соғыстарды бастан кешіріп жатқан дала өлеңді жанына жан серік еткені мәлім. Ол қаласа қару, жанына от салар ұран, толқыған көңілге тоқтам айтар аталы сөзі, қамыққанда жан сергітер жақын сырласы болды. Ақ өлең тектес әрі өсиет, әрі ұран тектес. Тоны көк, Күлтегін жырлары соның айғағы. Жыр дастандар, толғау сөз, батырлар жыры, қисса, шежірешілер сөзі, жыраулар тебіреністері, дастандар мен лиро эпос, айтыс, терме өнерлері еш бір халықта біздегідей кемелдікке жете алмаған. Қазақтың қара өлеңі поэтиканың нағыз академиясы десе болғандай. Ал, өрнекті сөз - жыр нұсқалары күйлермен астасып жатады. Осыларды еске ала отырып, бүгінгі қазақ өлеңі туралы ренішті пиғыл танытудың өзі артық сияқты. Сол мол дүниеден басқа елдердің кең хабары болса, олар әлдеқашан өлең құрауда кімнен үлгі аларын айтқызбай ақ сезер еді. Үйткені ол түп нұсқа. Үйткені ол түп-тамырдан нәр тартқан текті сөз. Үйткені ол ешқашан өңі солғын тартпайтын киелі дәстүр.
Бұдан біздің ақын-жазушылар ешкімнен ештеңе үйренбесін деген сөз шықпайды. Жағымды, көңілге қолай, жаңа заманға сай ырғақты болсын, басқа болсын өнер туындылары бізге де жат емес. Дегенмен, батыста пәлен ақын бар екен деп тықпалай берудің де керегі шамалы. Бар екенін білгеннің өзі де жеткілікті, онда да оларды қайталамау үшін. Тіпті, кей жазушыларды әлдекімдер мақтады екен деп, біздер де дүрмекке ере бермеуіміз керек сияқты. Осы Г. Маркес дегенді жиі ауызға алады. Оның «...Жүз жылы...» батысқа әлдеқандай болғанымен біздерге пәлендей өнегелік те шеберлік түрғысынан да мәні шамалы сияқты. Кейіпкер әйел пәлен еркекпен әуйі болғанын мақтан етсе, төбесінен ұрғашы торғай өткізбейтін еркек мауығы мүңкіген шақтарында, тіпті, өз бауырларына, ет жақындарына да көз сүзетіні қай бір адамдық қасиет? Әйтеуір, батыстағыларды жақсы біледі екен дегенге мәз болмай, еліктеуді де пір тұтуды да талғам таразысынан, өз ұлт дәм татымымыздан күтуіміз керек қой.
Ақындығымен де сыншылығымен де ерекше көзге түскен Иосиф Бродскийді көп айтады. Талант екені даусыз, тума талант. Әйтпесе, сонша атақ алып, пәлен университетте профессор болып жүргенде оның нақтылап алған жалпыға міндетті он жылдық білімі де жоқ. Бар болғаны сегіз класты Кеңес елінде жүріп зорға алған адам. Ал, оның ақындығына, талантына дау жоқ. Осы тұста оның ССРО-дан қуыларда сотқа берген жауаптарына назар аударып көрелік.
Сот: Сіздің мамандығыңыз?
Бродский: Ақын, аудармашы.
Сот: Сізді ақын деп кім айтқан? Қалай білуге болады?
Бродский: Кім болушы еді? Мені адам деп кім таныды?
Сот: Сіз ақындықты оқыдыңыз ба?
Оларды даярлайтын... оқытатын жерде...
Бродский: Мен оны білім, оқу арқылы берілетінін естімеппін.
Сот: Енді немен беріледі?
Бродский: Құдайдан ғой деймін.
Сот: Сотқа қандай талап, тілегіңіз бар?
Бродский: Маған не деп айып тағып отырғанына түсінбедім (Фрида Вигдо-рованың интернеттегі жазуларынан).
Ақынды еркіндігі үшін, шығармашылықта тым ерік еркіндігі үшін сотқа тартты. Еркінмін деп, ауа жайылушылықтың жақсылыққа апармайтынын Кеңес үкіметі ерте түсінді.
Міне, осы керемет ақынның өлеңдері, эсселері батыста кең таралып, үлкен бағаға ие болды. Сол үшін де оған Нобель силығы берілді. Бірақ, ол солай жазды екен деп, атағына құлдық ұрып, қазақ ақындары оған еліктей қойған жоқ. Оның өлеңдері абстрактылы, өзін өзі іздейтін, мәнге көп мән бере бермейтін стильде жазылған. Мысалы «Ария» деген өлеңінде
Полдень в комнате: тот покой
Когда низы как во
Сне пошевелив рукой
Не изменит ни чего, – деген жолдар бар. Мұнда Бродский дәстүрлі өлең жолдарын бұзып, қалыптасқан тұрақты сөз тіркесін (во сне) үзіп ұйқас үшін екі жолға бөліп тастайды («как во» мен «ничего» ұйқасуы үшін ал, во сне басқа жолға жер аударылады). Келесі бір шумақты талдап көрелік:
«Муха» деген өлеңінде де осындай жағдай.
Теперь ты медленно ползешь по глади
Замызганной плиты, не глядя
Туда, откуда ты взялась в апреле.
Теперь ты еле
Передвигаешься. И ничего не стоит
Убить тебя.
Немесе:
Трудным для подражания
Птичкиным языком
Лишь бы без содержания («Рождественские стихи» 2008 ж. С-Петербург кітабы).
Міне, көріп отырсыз мазмұн, мән дегеннің керегі жоқ деп ашық жазып отыр. Өлеңші қазақ үшін мұндай әрекеттің еш өнегесі жоқ.
– Айтпақшы мен бір қызық айтайын. Сіз айттыңыз ғой, әлгі Бродский айтыпты «шебер ақын болса торғайдың шырылын салсын» деп. Бізде бір бала бар қарлығаштың шырылын айнытпай салады, міне былай – деп Сәбет сөзді бұрып жіберді.
– Қане, қане?
– Тіцә, тіцә! Шіррә ә ә.. ли, шіррәәә! уағалайкү уәлайкү..уәлию, ашыри машыри, чыррр!
– Келеді әй, хе хе! Уағаләйку уәли, ә?
– Хе, хе, хе! Қызық ә?
– Жалпы, қарлығашты мұсылман құс дейді ғой, Періште мен пенденің арасында жүретін.
– Солай болса солай шығар, тілі мұсылман сөздеріне келеді екен.
– Иә, Бродскийді айтам-ау, Жалпы бұл ақынның көп өлеңдерінде осындай тіркес бұзу, мәнсіздікті өлең еткен жағдайлар едәуір баршылық.Тегі, батыс елдерінде шығармаға әлеуметтік мән жүктеуді дұрыс көре бермейді. Біз әлемдік классика деп, жатып жастана оқитын Бальзактар мен Стендальдарды Фрацияның өзінде өткен ғасырдың ортасында-ақ оқымайтын болғандығы хабарға кезіккенім бар.
Махаббат мұңы
Тоқтаусыз тамшылаған өмір тамшыларында махаббат дәмі сезілмесе, сылдырап ағып кеткен лайсаң судан айырмасы қайсы? Бірде есіңді алардай тым тәтті балдай, бірде ащы, бірде кермек сол тамшылар махаббаттың тылсым сырымен ақындар жырына арқау болғалы қашан. Сол сезім тамшыларының ең ескісі де, сағыныштысы, ащысы да тәттісі – мұң. Іңкәрлік, ынтықтық сағыныш тудырады. Мұның уыты мұң. Адам атадан бермен қарай жұбын іздеу, теңін табу, сүйгеніне жолығу Тәңірінің өзінен. Қаншама ғасырларда қаншама ақындар жыр арнамады. Жұбайын өзіне қаратсам деп, қайтсем көңілін өзіме бұрам деп, тотықұстар мен тауықтар қауырсындарын түрлендіріп, бұлбұлдар құйқылжыта ән арнады. Тау соғысқандай болып, небір нән пілдер мен мүйіздері қарағайдай бұлан мен бұғылардан бастап, титімдей масаларға дейін өз сүй-гендерін иемдену үшін өлімге бас тігіп бітіспес шайқасқа түсті. Серігінен айырылып қалған күнді қайғының басы болдған күн деп, аққулар көлде мұңайды. Ал, адамдар оның асқынған түрін Ләйлі мен Мәжнүнге теңеді. Әлемдегі ең ұзақ та шытырман ертегі «Мың бір түн».
Махаббат машақатынан басталғаны белгілі. Жұмыр басты пенде қай заманда да махаббатсыз күнді күн демеген. Махаббат – мәңгі, ол ешқашан ескірмейді. Кім де болсын, мейлі ол патша, мейлі пақыр болсын өз махаббатын аялап өтуге құмбыл. Көбіне жыр жазады, ән арнайды. Серілер майданға, жекпе-жекке шығады. Жүйкеге салмақ түсіп, айықпас дертке ұшырайды. Бәрі де жүректен өтеді ағымы осы дегендей қадірін кетіре бастаған кез туды. «Махаббат ғадауатпен майдандасқан. Енді міне ең асыл қасиеттердің бірі тұтқан махаббат сезіміне де қаяу түсіп, замана тұр.
«Қайран менің жүрегім мұз болмай ма» деген Абай атамның мұңы адаспай келіп жүректі тұмшалады. «Махаббат пен құштарлық» та екеуі екі жол екенін енді ұғынғандаймыз. Еркін заман ерік еркіндігін ала келді. Бұл өз кезегінде махаббат еркіндігі дегенді жетелеп жүр.
Бұрындары «мен не болсам, болайын, сен аман бол» немесе «Дүниеде сенен артық жар жоқ маған, саған жар менен артық табылса да» деп үздігетін еді. Жәй үздігіп қана қоймай, жарға деген адалдығын қорғайтын еді.
Енді: ...Бір жерден оқығаным бар еді.. Мәдина Омарованың «Қарғалар» деген әңгімесі, жарық көргеніне біраз уақыт болса да, осы заманғы, мына жолдар өмірі есімнен кетпейді.
«...Ол не себепті әке шешесінің алдында борышты сезінуі керек, түсінбейді. Жоқ түсінетін, бірақ, осы жерден әлдебір әділетсіздікті сезетін. Не себепті еркін өмір сүруден қысылуға тиіс, неге олармен бірге тұрып, олардың алдындағы «перзенттік парызын» өтеуі керек. Және барлығын бақытқа кенелту үшін жақсы біреуге тұрмысқа шығуға міндетті.
...Бір қызығы, оларға маған жарық дүниені көрсет деп жалынған жоқ. Өле өл-генше қарыздар болайын деп келісім берген шартқа отырғам жоқ. Туса өздері үшін туды. Ал қалғаны әркімнің өз еркі емес пе?..» Одан әрі қарай оқи түсейік;
– «Сәлем!
– Cәлем!
– Жалғызсың ба?
– Иә.
– Маған келсеңші.
Бір сәтке үнсіз қалған Айжан «жақсы» деді (Бұл Айжанға жігіті Бағланның телефон соққан сәті).
– Келді. Бағлан жалғыз емес екен.
– Танысып қой, менің жолдасым, бірге жұмыс істейміз.
– Марат.
– Айжан.
Марат ұзын бойлы арық жігіт екен. Күлгенде әппақ тістері жарқ ете қалады. Әдемі.
– Не ішесің?
– Сыра.
– Онда мен қазір барып сыра алып келейін, сендер дастархан жасай беріңдер. Ол шығып кетті. Содан Бағлан жоғалып кетті.
– Бағлан келмейді деді Марат.
– Қалай келмейді, сыра ше?
– Сыра тоңазытқышта толып тұр.
Айжан Бағланды іздеп телефон шалады. Аржақтан басқа бір әйелдің даусы. Бағлан келмейтін болды. Айжан жылай бастады.
– Айжан, неменеге жылайсың, саған қандай айырмашылық бар, бәрі бір емес пе?
– Ие, әрине, әрине.
– Неге жылайсың, әйелдер осы қызық, онда тұрған не бар.
– Иә, дұрыс. Ол тез шешінуге кірісті.
Тәңертең тұрып айнаға қарап еді, жүзі әлем тапырық екен...»
Бұл бүгінгі жастардың махаббатының айқын көрінісі. Обалы не керек, әңгіме жап-жақсы жазылған. Бүгінгі шындықтың суреті қаз-қалпында мөлдіреп тұр. Ел жұртымыз болып, ақындарымыз болып, аза бойымыз қаза тұрып безінетін нәрсеміз осы. Мәтіндегі «...қандай айырмашылық бар, бәрібір емес пе» деген жолдар менің есімнен мүлдем кететін емес.
Е.Тұрсыновтың «Келін» фильмі одан әрі жалаңаштана түскен. Мейлі ондағы кейіпкерлер бүгінгі қазақ болмағанымен өзге жұрт оларды қазақ деп таниды. Махаббат тұрақсыздығы. Сүйгенін аңсап, мұңға толы өлеңдер жазғанда ақындар осындайға кезіктірмесе екен деп, дүниеден, іріп бара жатқан қоғамнан жерігенде өмірді мансұқтап, мұңға күйректікке түсетіні осыдан емес пе? Содан болар қазіргі махаббат туралы жазылған өлеңдер бұрынғыша жалаң «күйдім», «сүйдім» деп емес, терең психологиялық толғанысқа түсіп, іштей үгіліп, аңсағанынан көз жазып қалғанына өкініп, көкіректерін сағыныш оты өртейді. Махаббатқа адалдығын, өліп-талып күтіп жүргенін ішкі жан-дүниесінің бүкіл күйзелісімен, ішкі драмасымен шынайы сезіндіруге ұмтылады.
«Жұлдыз» журналының 2013жылғы №3 санында бір топ ақын қыздардың лирикалық топтамаларына кезіктік. Кезіктік те бас ала алмай құныға оқыдық. Бәрі шындық. Сезім де, күйзеліс те, сағыныш та, өкініш те бәр бәрісі шынайы.
Ақсүйрік Ізмұханова «Бала талдар иіскейді жылы ауаны» атты топтамасында сол біз айтып отырған шынайы мөлдір сезімнің сырын шерткен. Өлеңдер әп-әдемі, шып-ширақ жазылып, алғашқы тармағымен ақ өзіне баурап алады.
«Ерте көктем» өлеңін оқып көріңіз:
Ерте көктем,
Ала келді жұпарын ерте кеткен.
Бала талдар иіскейді жылы ауаны,
Лебімен аймалап еркелеткен.
Сүйісуде
Көгершіндер махаббат мүйісінде.
Бір белгі бар құстарда маған таныс
Бір белгі бар көктемнің иісінде.
Ағын өктем,
Әкелгендей жаныма тағы көктем.
Балғын иіс сеземін, көкірегімді
Сенің исің секілді жарып өткен.
Бұралады
Тал қайыңды тербетіп бұлақ әні.
Мен өзіңді сағынып тұрмын жалғыз,
Үнсіз жұтып жұпарлы жылы ауаны.
Көктем жайлы өлең жазбаған ақын жоқ шығар. Әр кім өзінше көңіл ауанын жасарып жаңарып келе жатқан дүниенің құлпыруын өзінше жырға қосады. Ал, мына қарындасымыз әдетке айналған, көп өлеңдерде кездесе беретін, қайталана беретін «Жайнаған», «Құлпырған» есімшелері мен көсемшелерінен немесе «қызыл, жасыл, әдемі, сары, көк» сияқты сын есімдерден ада, ішкі сезімге үңіліп, бір кезде жанын жадыратқан бір иісті есіне алып, сол иісті мына көктем енді тағы да ала келіп, бала талдардың ырғалуымен есіне салып тұр.
Өлеңнің құрылымына да өзгерістер енгізіп, белгілі он бір буынды қара өлеңді жеке, бастапқы тармақтарынан қысқа бунақты жолға көшкен. Көп сөзділіктен, артық анықтауыштардан қашып, тек керек сөздерді ғана, сезімін жеткізеді-ау деген сөздерді ғана сұрыптаған. «Сүйісуде көгершіндер махаббат мүйісінде...» қаншалықты таныс болса да соншалықты тосын, жанға жылы махаббат идиллиясы. Біртүрлі елжіреген күйге еніп айта түссе екен деп, жо жоқ, енді ештеңе айтпаса екен деп, әлдебір түйсікпен өз басыңдағы сондай сәттерді іздестіре бастайсың. Жарайсың, қарындас, сезіміңнің мөлдірі былғанбасын.
«Күннің күркірі мұңды қозғасын,
Өзгесі бізге лайық деп пең?
Сенде ақ жауын, менде көз жасы,
Келші қосылып жылайық. Көктем !
Келші, қосылып вальс билейік!
Жауынның қандай жағымды әуені!
Ешқашан енді құлай сүймейік, жарай ма?
Мұң ғой сезім әлемі...
Бұл музыка. Жүрек лүпілдеп асау сезімге ие бола алмай, көктем мен бірге билеп, көктем оятқан ару жанның сүйгенін аңсаған жанның ішкі сезім бұлқынысы. «Ешқашан енді құлай сүймейік, жарай ма?» Құлай сүюдің дерті меңдеп үлгерген. Бұл әлгі өнер сарапшыларының өнерпаздың еңбегін бағаларда айта беретін «қауіпті сызығы». Дертке кезіге бастаған махаббаттың шек сызығы одан да қауіпті.
Атын асфальтқа жүректің қызыл бояуын жазып қоямын, сен жаңбыр өшіріп кетші, себелеп! Деп назданғанымен, өлең жолдарына симай, симай емес-ау, әдейі жазбай кеткен ішкі іңкәрлігі бар. Ол өшіріп кетпеші дегені еді. Оны оқушы өзінің әлде бір беймәлім жетінші түйсігімен сезінгендей болады. Ішінен өшіріп кетпесе екен деп тілеуін тілегендей.
Ә-ә, ұмытып барады екенбіз ғой. Бұл тебіреніске толы әдемі жыр жолдары Жадыра Байбуланова атты ақын қыздың өлеңінен үзінділер. Бұл да қара өлең емес, 10 буынды ерекше ырғақпен оқылатын өлең. Өлеңнің бұл құрылысын біреулер Тұманбай ақынға телиді. Сол алғаш пайдаланды деп жатады. Бірақ, ол көп қолданғанымен алғаш поэзия әлеміне енгізген Қасым мен Тәкен ақындар еді ғой. Тәкен аға А.С.Пушкиннің «Дауыл» өлеңін қазақшалағанда осы тәсілді алғаш рет қолданды. Тармақтағы бунақтар 3+2, немесе 2+3 бунақтардан құралып, 5+5 болып жаңа екпінді ырғақ табады. Бұл ішкі сезімнің ерекше көтеріңкі қалпын беруде аса қолайлы құрылым. Жадыра қарындас мына өлеңінің ішкі интонациясын беруде осы өлшемді алғаны қолай көрген екен.
Мәселе, әйтсе де, мұнда емес. Кей сыншылардың қазақ өлеңдері сол қара өлең төңірегінен шыға алмайды, ескіден жалықпайды дейтін ренішті сөздерінің жаңсақ екендігін көрсетуде. «Поэзияның соры – ауыл арасындағы болмашы ғана оқиғаны сөзге тиек етіп ұсақтап бара жатқан ақындардың адасуында» (Жұлдыз, 2013. № 3. 146 бет).
Ал, махаббат лирикасы үф етсең ұшып кетердей, нәзік, тым нәзік сезімдерден сүзіледі емес пе. Оны ірі, ұсақ деп айта алмайсың «айдың мүйізіне ілініп тұрған тамшы нұрдың қашан үзіліп түсерін күтіп» шыдас табатын, я тағат таусылатын шақтар болады. Сол сәттерді ұстап қалсам деп ақындар жан таласады. Ақ тер, көк тер болып сөз сараптап, сезім сүзгісінен өткізеді. Жадыра қыз сол тақылетті ақындар санатына жатады.
Сөз саптасы да осы заманғы жастардың ауызекі тілінен алынған. «Сынсам да өзіңмен сынамын бірге» Сынды, өкінді, опынды, енді қайтпек? Мұны ақын «Шаттықтан кетті шұғыла ғайып» деп, өзін сабырға шақырып «Ерегіскенде мына өмірге қосылып бірге күліп алайық» деп түйіндейді. Иә, бұл күнәһар көктем. Ақынның бұдан әрі «Жыныма тимеші», «Жүрдек пойыз», т.б. өлеңдерінде алабұртқан көңіл-күйі іштей ширыға түседі Бұл сәт көбіне ежелден таныс суретті көз алдыңа алып келеді. Дала гүлін құшағына алған ғашық жан қауызын жарып шыққан нәзік желбезектерді бір-бірлеп «сүйеді», «сүймейді деп жұлып тастап тұрған қобалжыған сәтін көргендейсің.
Бірақ қыз өз махаббатына берік.
«Бақытты болмайсың сен» – деп күз
Жылайды төгіп қанша мұң.
Жаңбыр!
Оған сүйетінімді жеткіз
Сезбеген болса әлі...
Ақын қыздың шын сүйген арудың қалпына еніп, жаңбырмен сырласқаны қызықты-ақ, әрі сондай нанымды. Бұл өлеңдетіп отырған жоқ сияқты. Жәй сырлас досымен етене беттесіп іштегі жан сырын жеткізші оған деп арзу тілегін, ең қимасын айтып отыр.
Жаңбыр! Сен оны аймала!
Жақындай алмаймын енді мен...
Онан әрі сүйгенін ақ жауынға теңейді. «Тұп-тұнық көздері үнемі, Ақжауын! Аумайсың екеуің. Білсең ғой оның да жүрегі дәл сендей мөп-мөлдір екенін.
Бақытқа сол ғана лайық,
Қуанса, шаттыққа куә бол.
Дәл сендей бір кезде мұңайып
Жыламасыншы бірақ Ол...
Міне, сүйгеніне деген адалдық! Өлең өріле береді. Жан-жүйкені қоса тарамдап өріміне сіңістіріп жіберген. Ендігі өмірі жыр боп құйыла береді.
Өлмейді сөз де, үміт те
Өзгесі өледі шын.
Өмірің өзгелік те
Сен менің өлеңімсің.
Қыздың махаббат мұңына елтіп, бірге мұңдасып, оның жүрегін құлыптап, қаламын бос қойғанының куәсі боласың. Одан әрі белгілі ...сағыныш, жанды жегідей жеген арылмайтын сары уайым мен оның серігі сағыныш. Осының бәрі өлеңмен өрілгенде жон арқаң шымырлап жыбырлап шымал өріп кеткендей сезінесің. Солайша ақын бастан кешкен хал енді сенің халіңе айналады. Үйткені бәрі рас, сенімді, сен енді Ол болып, Ол сен боп кеткендейсің. Өнердің өлеңнің құдіреті осы болар. Ақын топтамасында «Тағдыр деген...», «Мен енді», «Қара сыз...» «Көңілге тағы келген бе», «Өткелсіз» өлеңдері мұң мен тебіреністің тұманында бір батып, бір шығып, көңіл көкжиегін көлбеңдетіп өз тұңғиығына жетелей береді. Сен оқи түсіп ере бересің.
Енді, бірер сөз ақынның шеберлігі жайлы болса. Ең алғашқы байқалатын жай – өзіндік стилі, мақамы бар. Сөзге сараң, сезімге бай. Өлең құрылысы да көңіл-күйге қарай ширатылып, ширығып, көп сөзге ұрынбай сезім толқыныстарын дөп басып орын орнында тұрғандығы. Ұйқас та, ырғақ та солай. Көбіне арзан ұйқас емес тереңде жатқан ішкі иірімдер де үндеседі.
Қара сыз
Қалтырай үн қаттым.
Шарасыз
Шыға алман шырқап тым.
Тербеген тәтті мұң жүрегін
Меңдеген сағыныш сырқатпын.
Мұнда үндестік заңына лайықталған дыбыс қуалаушылық, диссонанс та алғашқы сөздері мен соңғы сөздері өз ара ұйқасып көңіл-күйдің тұтас қалпын қапысыз жеткізіп тұр. Шумақта ұйқаспаған сөз жоқ. Бәрі ұйқасып тұр. Бұл тәсіл әсіресе «Өткелсіз» атты өлеңінде қатты байқалады.
Заңына тағдырдың көндігіп,
Тағы да мұң тербеп, өлді үміт...
Жыр шыққан жүректі емдедім
Тұншыққан сезімді сөндіріп.
Өлеңді соңына дейін оқысаңыз да сол бір қалып. Алғашы сөз екінші тармақта да сөздің соңында да бір-бірімен ұйқасып, біріне бірі сезім мен байланған. Тармақтың алғашқы жолы «Заңына» болса келесі тармақ «Тағы да» болып ұйқасып басталады да соңғы сөздер тағы да «өлді үміт» «сөндіріп» болып үйлесіп көркемдік шешім табады.
Жалпы, сөздің басында да айтқан едік, қазақ өлеңдері бүгінгі таңда шеберліктің шырқау биігінде. Көп оқимыз, шет елден де, көршіден де хабар алып тұрамыз. Өлең өлкесі қандай деңгейде білгің келеді, біртүрлі қызық. Сонда байқағанымыз, сол баяғы екпін түсетін буын бунақтар ұйқастың айнымас қазығы. Ақ өлеңі, тіпті, ұйқасты қажет етпейді, Ырғақ пен екпін болса болды. Ол солай, ұйқасқа мән беріп жатқан ақын жоқ. Ал, көршілердің өлеңі сол баяғы бір буынды сөздердің ұйқасынан көп ұзап кетпеген. Ал, біздерде ұйқас екі буыннан болса, әйтеуір ұйқас, көбіне үш буын, ең көп қолданылатын қара өлеңде төрт буын болып келеді де, кейінгі кездерде бес буынды, тіпті, кейде үйірлі ұйқас, қопарыла бүкіл тармақ болып ұйқасып келетін өлеңдер баршылық. Бұдан бір сөзді қосып, не алып тастай алмайсыз. Бұл нағыз шеберлік, мінсіз ақындықтың белгісі деп білу керек.
Оның үстіне өлеңнің түр формасын, құрылымын жаңаша қиыстыруды өзіне міндет етіп қойған, сүйтіп байырғы баяндауға бейім қара өлеңнен өзгешелеу немесе сол қара өлеңді екпін, ырғақ, ішкі динамикаға қарай бейімдеп жаңа жол тапқан ақындар легі де көптеп кездесе бастады. Оны мына Айжан Табаракқызы атты ақын қыздың өлеңдерінен қапысыз аңғарамыз.
Алакеуім...
Жатыр әне ішке тартып дала демін,
Бүгін тағы...
Келмедің...
Үміт жылап
Жалғыздық құшағында қала бердім.
«Күз» деп аталатын бұл өлең үзілмейтін үміт жайында. Табиғаттың тылсым сырлары ақын қызға ой салады. Жаны кең терең түкпіріндегі қатпар-қатпар сезім қабаттарын оятып, күзгі әуенге орай мың құбылып, бұрын белгісіз қалып келген пернелерді ашып, үнге қосады. Қапелімде қолдан шығарып алған бақыт құсын өз махаббатын көп аңсап, тебірене күтіп, қайтсе де қолда қалған үміт жібінің бір ұшынан айырылғысы жоқ. Енді, сүйгенінің өз тұлғасы түгіл, оның тыныстаған ауасы, табаны тиген топырақтың өзі бұған аса ыстық.
Жүрегімнің емдей ме жарасын күз,
Санай берем бір күннің арасын жүз.
Келесің ғой сен ертең..
Қандай жақсы,
Бір қаланың жұтамыз ауасын біз.
... Жел ұшырса көңілдің жапырағын,
Мұңмен мұңдас боп тағы отырамын.
Сен келесің... біз енді бұрынғыдай
Бір қаланың басамыз топырағын.
Мына өмірге қайта ораласың.
Үзілмейтін үміт, сарқылмайтын сағыныш өз махаббатына деген шексіз беріл-гендік.
Көңілің әлі де елеңдей ме екен мен десе,
Сезімнің исі жұпарлы еді өзгеше.
...Жаның жабырқап өткен сайын сен жалғыз.
Кінәләй ма екен мен мұңлықты сол көше.
Жалғызбын...
Солай...
Күндер де құрғыр өтпейді.
Бір көрсем екен...
Мәңгіге сосын кет , мейлі.
Жапырақ үміт ілініп үнсіз мүлгиді
Тағы бір күзге жетеді, бәлкім жетпейді.
Бұл мәңгіге берілген махаббат. Осы тектес махаббатты көп іздейсің, аңсайсың, мәңгі солай болса екен деп іштей батаңды беріп, адалдыққа мінәжат еткің келеді. Тағы да көркем әдебиеттерді ақтарып кетесің. Мына өмірге қайта ораласың. Теле хабарларды көресің. МузТВ, ХитТВ, тағы сондай каналдарды көресің. Жап жақсы әуендермен араласып, көрерге зауқың соқпайтын би рэптердегі ерсі қылықтар, хайуандық әрекеттерді көріп тағы түңілесің. Жаныңдағы жастар болса үздігіп, аузының суы құрып көзін алмайды.
Осыдан келіп кітап ұстаса Д.Досжановтың «иненің ұшында» хикаяты қолыңа іліксе, әбден тоят тілеп, есіл дерті сол болып, ындыны қанбайтын Ая қыздың әтешке ұқсап кетіп бара жатқан жігітінің көлігіне қарғып мініп, тал түсте машиненің ішінде абыл ғұбыл тоятын қандырғысы келіп тұратын жиіркенішті көріністерге кезігесің. Содан жағаңды ұстайсың. Бала-шағамнан аулақ болғай деп тілейсің. Ал, әлгінде оқыған ақын қыздың махаббатқа соншалықты беріктігі туралы өлеңін уіздеп қайтадан журналыңды іздей бастайсың. Ала-құла дүние. Ала-құла адамдар. Ала-құла сезімдер. Осылардың арасынан жаныңды жадыратар жаймашуақ жылы сезім, әсерлі, қайғылы болса да бүкіл тұла бойыңды тербетер тәтті мұңды аңсайсың. Махаббат мұңы да көркем мұң. Сондай жырлар, сондай әндер іздейсің.
757 рет
көрсетілді0
пікір