- Заманхат
- 23 Шілде, 2018
Тараз шаһарының зияткер суретшісі
Борис Ткаченко бейнелеу өнеріне бала кезінен құмар болды және де сол іске бүкіл өмірін арнады. Алғаш рет Борис Андреевич кітап белгісімен 5 класс оқушысы кезінде танысты. Әкесі Андрей Карповичке еліктеп, өз кітаптарына белгі қоятын, резеңкенің үстіне штамп сияқты өрнек салып үйренген. Борис Андреевичтің алғашқы экслибрисі 1961 жылы Жамбыл облысы Мойынқұм ауданының Д.А.Фурманов атындағы орта мектебінің сурет пәнінің мұғалімі болып жұмыс атқарып жүргенде жарық көрген. Алыс орналасқан ауданда жұмыс жасап жүріп, Борис Андреевич 3 жыл қатарынан Сырттай халықтық өнер университетінде оқыған. Бұл 1960 жылы Мәскеу қаласында Н.К.Крупская атындағы Орталық халық шығармашылық үйінің, сурет және кескіндеме факультетінің сырттай оқыту курстары негізінде қаланған университет болатын. Өнер университетіндегі сырттай кәсіптік оқуда алған жаңа практикалық және теориялық білімдерін суретші өз шығармашылығында, мектепте сабақ бергенде, дәріс оқуы кезінде пайдаланатын-ды. Тоқсаныншы жылдардан бастап, суретші экслибриспен белсене айналысып, көрмелерге қатысып, бұқаралық ақпарат құралдарында насихаттады. 1991 жылдың 10-20 қазан аралығында Жамбылда «Англия экслибрисі» атты екінші көрме өтті. Бұл көрмеде Жамбыл облыстық экслибрисшілер мен графика әуесқойлары клубының президенті Б.Ткаченконың жеке жинағынан 60-тан астам жұмыс көрсетілді. Б.Ткаченко әрдайым Чехиялық Иво Прокоппен, Бакудағы Георгий Кизельмен, Вильнюстық Виктор Манжуломен, т.б. экслибрис өнерін насихаттаушы-жинақтаушыларымен хат жазысып, хабар алысып отырды. Мысалы, өзінің «Память, равная совести» атты үшінші графикалық миниатюраларының жеке көрмесін Вильнюс қаласы мұражайының бұрынғы директоры Манжуло Викторға арнаған. Көрмеге 100-ден астам жәдігер қойылды, соның ішінде 30-дан астам экслибрис жібек матаға салынды. 1990 жылы Борис Андреевич Кишинев қаласының өнертанушысы Долгов Юрий Степановичке экслибрисін арнады. Бұл жұмыстың композициясына жақсылық пен жамандықтың арасындағы мәңгі күрес жайлы А.С.Пушкиннің «Періште» атты өлеңіндегі сюжет негіз болған. Жарқыраған нәзік періште Пейіш алдында бас иді, Түпсіз тамұқ үстінен қап-қара сұм әзәзіл Түнерген күйі ұшып жүрді. Пушкиннің портреті бірінші планда ірі етіп бейнеленген, ал, оның арғы жағында сәл басын иген періште кері қарай қозғалысты айқындап тұрғандай сезіледі. Өзінің «Періште» атты өлеңімен Пушкин рухани түрдегі қайта өрлеуді, шын ақиқатты скептикалық көзқараспен қабылдаудан бас тартып, Құдайға деген сенімді қайтаруды көздеп тұр. Бұл экслибристі жасағанда штрихтарды қолданбай, композициясын ақ пен қара түстердің қарама-қарсылығына сүйене отырып, батыл шешімге барған. Сонымен қатар, өте жақсы үйлесімді таңдалған қарпі ежелгі орыс стилінде жасалып, жұмыстың түрін, мазмұнын аша түскен. Осы жұмыстың өзінен ерекше қолтаңбасы сезіліп тұрады. Тарих ғылымының кандидаты Ж.Боданов 1991 жылғы өткізілген жеке көрмесіне арнап шығарылған каталогының кіріспе сөзінде: «Соңғы жылдары Б.А.Ткаченконың экслибристері одан сайын жанданып, мазмұнды болып, жасалу техникасы жағынан аса мінсіз болып келеді» деп жазған. Оның күрделі экслибристері шетелдік жазуларға, белгі-нышандарға толы, олар көрерменнің зейінін мазмұнымен, ерекше композициясымен өзіне қаратып, суретшінің мәдениеті мен жан-жақтылығына тамсандырып таңдандырады. Суретші экслибрис жасауда осы белгі иесінің тұлғасын бейнелейтін әр түрлі бейнецитаталарды келтіреді немесе оның орнына ақындардың, жазушылардың, тарихи бейнелердің, тіпті кітапсүйердің өз портретін қолданады. Борис Андреевичтің экслибристері арабтың өрме жазуы, қытай иероглифі, кириллица немесе латын қарпі сияқты түрлі қаріптерді шебер орналастыру арқылы ерекшеленеді. Жұмыстарында латын, орыс, итальян, қазақ, қытай және тағы басқа тілдерде жазылған нақыл сөздер жиі кездеседі. Суретші шеберлігін арттыру мақсатында әртүрлі энциклопедиялық сөздіктерді қолданған, сондықтан жасалған экслибристердің барлығы да суретші парасатының терең екендігін көрсетеді. Мысалы, 1997 жылы жапон суретшісіне арнап орындаған «Netsuke» экслибрисінде, Борис Андреевич күншығыс еліне тән – Фудзи жанартауы, сакура ағашының бұтағы, нэцкэ мүсінін көп пайдаланған. Нэцкэ – көне жапон елінің ағаштан ойылып жасалған кішкентай нышаны, ол кілт тағу үшін, кимоно белбеуіне әмиян қыстыру үшін, киімді әсемдеуге арналған. Экслибристе нэцкэ бейнесінің бойымен бірге Фудзияма – Жапонияның ең биік тауы (таудың биіктігі 3776 м) тұр, бұл тау – Жапонияның рәмізі және ең танымал табиғи белгісі. Сакура – сәттілікті, көп жасауды, аманшылықты, бейбітшілікті, қуанышты білдіретін бес жапырақты өсімдік ретінде көрсетілген. Суретшінің ең жақсы көретін түстері – ақ және қара, ал, 90-ы жылдары Ткаченконың графикасында кішкентай қара фон үстіндегі ойылған ақ дақтардың шоғырлануынан пайда болған сұр түс қолданысқа енгізілді. Ал, 2000 жылдардан бастап, Тараз қаласының суретшісінде тек өзіне тән графикалық әдістер пайда болды. 2001 жылы қазақстандық ақын Любовь Шашковаға арналып тағы бір экслибрис туындысы жасалынды. Бұл экслибриске көз жүгіртіп қараған мезеттен-ақ ақынның рухани байлығы мен ой-өрісінің кеңдігін байқайсың. Киімсіз отырған қыз бен оның қолындағы нәзік гүл поэзияның белгісі ретінде бейнеленген, себебі, кейбір аңыздарға сүйенсек, нәзік көгілдір гүлкекіре рухани байлықты білдіреді. Гүлкекіре ашық алқаптарда өседі. Бір жағынан, өмірдің байлығы тек материалдық құндылықтарда емес, сонымен қатар рухани байлық – мәдениет, поэзия да бар екенін жеткізгісі келген. Екінші жағынан, гүлкекіре – биліктің және күш-қуаттылықтың белгісі ретінде танымал. Гүлкекіре Беларусь Республикасының елтаңбасынан да орын тапқан. Осы экслибристе белорус әдебиетінің классигі, аудармашы, драматург, публицист Янка Купаланың профиль түріндегі портреті да орын алған. Жұмыстың астыңғы бұрышында қайтадан гүлкекіре және кесілген ағаш түбірін кеміріп отырған құндыз бейнеленген. Бұл символдар Любовь Шашкованың туған жері туралы мағлұмат беріп тұрған секілді. Себебі, Любовь Константиновна Гомель облысының Парича ауданының Василёвка ауылында дүниеге келіп, Бобровск қаласында оқып, өмір сүрген. Борис Андреевич әр жұмысын экслибрис иесінің құрметіне деген үлкен сүйіспеншілікпен, мейлінше ұқыптылықпен орындайды, оның әр жұмысы арналған адамы туралы балладаға, интеллектуалдық суретке айналып кетеді. Борис Андреевичтің шығармалары туралы шексіз айта беруге болады, әр жұмысында оның кең ой-өрісі, білімпаздығы өзіне тән ерекше графикалық тілі мен жазуы білініп тұрады. Борис Ткаченко Қазақстан өнері үшіп көп еңбек сіңірді – 25 жыл бойы Жамбыл облысының экслибрисшілер мен графика әуесқойлары клубының тұрақты Президенті болып келеді. Сондай-ақ, ол Қазақстан Суретшілер Одағының мүшесі, Дүниежүзі халықтар өнерлерінің Халықаралық Ассоциациясының мүшесі, А.Сент-Экзюпери достарының Халықаралық клубының мүшесі, Жапон экслибрис Ассоциациясының мүшесі болып табылады. Көптеген халықаралық ірі көрмелердің лауреаты және дипломанты. Бүгінде сексеннің сеңгіріне шыққан қылқалам иесі Тараз қаласында тұрады. Үнемі шығармашылық ізденісте жүретін Борис Андреевичтің әлі де қаламы қолынан түскен емес.
Мәрзия Жақсығарина, өнертану профессоры, Айнагүл Еспай, Қазақ-Орыс халықаралық университетінің магистранты
390 рет
көрсетілді0
пікір