- Заманхат
- 30 Қараша, 2015
Орыс диктаторлығы мерекесі біз үшін ұлттық қасірет күні
7 ноябрьде орыс большевиктері өз биліктерінің 14 жылдығын мерекеледі. Бұл күннің біз, түркістандықтар үшін ұлттық қасірет күні екендігі жайлы басы артық сөздің қажеті жоқ.
Халқымызға зәрін шашқан қанды диктатураның өткен он үш жылдық дәуірін көз алдыңыздан өткерсеңіз, оның қандай қайғы касірет әкелгенін айтып жатудың өзі қиын.
Орыс большевиктері алғашында нелерді уәде етпеді!
Олар халықтардың өзін-өзі билеу құқықтарын, тіпті, Россиядан бөлініп, тәуелсіз мемлекет құра алатындықтарын қабыл етті және оған уәде берді. Алайда, Түркістандағы билікті өз қолдарына алар-алмастан оларды Орталық өлке билігіне қатыстырғысы келмейтіндіктерін білдірді (III Түркістан кеңесі құрылтайының қарарларынан).
Орыс большевиктері патшалық заманда зорлықпен тартып алынып, орыс эмигранттарына үлестірілген жерлерімізді кайтарып беруге уәде еткен. Бірақ, іс жүзінде өздері патшалық замандағыдан да көп эмигранттар әкеліп, жер-жердің бәріне толтырып тастады.
Олар дін мен ұлттық құндылықтарға құрметпен қарап, мойындайтындықтарын уәде еткен. Бірақ, билік басына жайғасқаннан кейін «құдайсыздықты» шығарды. «Дін апиын» деп халықты діндарлық рухтан ажыратты, мешіттерді талқандады. Мешіт және бүкіл ұлттық құндылыққа қарсы істемеген жауыздықтары қалмады. Ұлттық саналған әрбір нәрсені шектеді.
Халықтардың бауырластығын тудыруды уәде еткенсіп ұлыстар арасында әлемде мысалы көрілмеген дұшпандықты дүниеге әкелді.
«Дүние жаннатын» құруды уәде етіп, нағыз жаһаннамды орнатты. Бұл тозақтың азабын тартушы қылмыстылар да біздің бейкүнә халқымыз.
Қызыл Москваның 14 жылдық диктатурасы Түркістанымызды жарты ғасырлық патшалық кезеңнен де қатты, мығым етіп Россияға ноқталады.
Біз патшалық Россияға қарсы күресіп жүріп, тағы сол Россияның қанды большевиктері шеңгеліне түсіп қалдық. Демек, оттан құтылып селге, қардан қашып, жаңбырға кездестік.
Москва большевиктерінің қанды диктатурасы 14 жылға қадам басты. Бұл қысқа ғана мерзім ішінде қанды орыс большевиктерінің залымдығы мен хайуани іс-әрекеттері астында жоғалған түркістандықтардың саны бүкіл советтер одағы коммунистік партия мүшелерінен екі-үш мәрте артық.
Егер бұл зұлым Москва большевиктері тарапынан кырылған түркістандықтардың қанын бір арнаға толтыру мүмкін болса, Ленин өз мүсіні үстінен қарап, бейкүнә халық қанынан тойғанша сіміру үшін денесін июге де мәжбүр болмас еді.
Егерде Түркістандағы ауыр апатта ата-аналардың жанайқайы мен мұң-зарын топтайтын бір амал табылса, шүбәсіз, қанды «Кремльдің» (Кремль Совет үкіметінің Москвадағы ресми сарайы) қалың қабырғалары қаусап, сарай ішіндегі комиссар мен чекистерді көмер еді.
Түркістандық ана, әйелдердің көз жасы, шүбәсіз, Сталин басында болған Москваның бүкіл қанқор комиссарларын тұншықтырарлық бір сел-топан құраған болар еді.
Бізді бұл қанды орыс диктатурасының тегеурінен құтқаратын бір күш бар ма? Болса, ол қайда? Бізді не өршіл дауыспен сөйлеген сөздер, не басылым мақалалары құтқара алады. Біз үшін әр нәрседен бұрын бірінші ұлттық бірлігімізді сақтау, оны күшейту және ұлттық рухымызды қуаттандыру керек.
Оған қоса өзіміз сияқты Москва диктатурасына қарсы күресіп жатқан Кавказ халықтары, Украина, Еділ-Орал мен Қырым ұлттық күрескерлерімен бірлесіп шепті күшейту керек.
Бұл халықтармен шынайы бірлікке келіп, жалпы дұшпанға қарсы қуатты шеп жасай алсақ не оларға, не біздерге бостандықпен қауышу мүмкіндігі бар. Тек сол Кавказ, Украина, Еділ-Орал және Қырым ұлттық күштерімен бірлесу әрекетіміз бізді бостандық шуағына шығара алатынын жұрттағы һәм шеттегі бүкіл түркістандықтардың айқын білулері керек.
Сондықтан, қанды орыс большевизм диктатурасы мерекесі және біздің жалпы ұлттық қасірет күніміз себебімен «Жасасын Түркістан, Кавказ, Украина, Еділ-Орал және Қырым ұлттық күштерінің бірлескен шебі» деген ұранды бір қайтара пысықтап кетпекші боламыз.
Жас түркістандық
«Жас Түркістан» журналы, 1931 жыл
326 рет
көрсетілді0
пікір